កំណាព្យបទ គោព័ទ្ធស្នឹង
និពន្ធដោយ ប៉ាកកាខ្មៅ!
-ស្រុកសុខសាន្តបានពីយើងសាង
សាងភ័ព្វសំណាងគ្មានអ្នកឲ្យ
ឲ្យយល់ចិត្តគ្នាគិតមុខក្រោយ
ក្រោយខុសដឹងហើយកែវិញភ្លាម។
-ភ្លាមភ្លែតកុំភ្លឹកនឹករឿងចាស់
ចាស់រឿងអាមាសកុំទាក់ទាម
ទាមទារសងសឹកវឹកចុកឈាម
ឈាមពីសង្គ្រាមគ្រួសារឯង។
-ឯងឈ្លោះគ្នាមាវាចាំសើច
សើចឃើញយើងខើចខាតជាក់ស្តែង
ស្តែងជាក់ម្នាក់ៗធ្លាក់ចំបែង
បែងចែកគ្នាឯងរែងលាបពណ៌។
-ពណ៌លាបឲ្យគ្នាពៀរមិនដាច់
ដាច់បាយរាស្ត្រត្រាច់រត់ភ័យញ័រ
ញ័រញៀនហ៊ានប្លន់ភ្លេចបាបធម៌
ធម៌ថែប្រែពណ៌ជាហិង្សា។
-សារស័ព្ទប្រាប់ត្រង់មិនចង់ឮ
ឮគ្រប់បក្សឌឺដោយវាចា
ចារជាកាព្យខ្លីអង្វរថា
ថាលោកមេត្តាគិតរឿងជាតិ។
-ជាតិថ្កុំថ្កើងរស់ព្រោះរួមគិត
គិតគ្នាមូលមិត្តមិនឲ្យឃ្លាត
ឃ្លាតចាកប្រយោជន៍ធំគឺជាតិ
ជាតិសុខមុខជាតិខ្មែរតែមួយ៕