អន្តរជាតិ
ជួប«Idol»លើកដំបូង Duterte សរសើរ Putin មិនដាច់មាត់ ខណៈ បន្ទោសបង្អាប់អាមេរិក ប្រភពរូបភាព៖ Sputnik
× នៅទីបំផុតប្រធានាធិបតីហ្វីលីពីន រ៉ូឌ្រីហ្គូ ឌើទើតេ បានជួបពិភាក្សាដោយផ្ទាល់ជាមួយនឹងប្រធានាធិបតីរុស្ស៊ី វ្លា ឌឺមៀរ ពូទីន ដែលលោក តែងតែសរសើរ យកគំរូ និងអះអាងថាចង់ជួបជជែកតាំងពីពេលដែលលោកឡើងកាន់តំណែងជាប្រធានាធិបតីមកម្ល៉េះ។ តាមរយៈជំនួបលើកដំបូងនោះ ប្រមុខហ្វីលីពីន បាននិយាយសរសើរដោយមិនដាច់មាត់ទៅកាន់សមភាគីរុស្ស៊ី ហើយ ក៏បានឆ្លៀតវាយប្រហារប្រទេសលោកខាងលិច ជាពិសេសអាមេរិកតែម្តង។
ប្រធានាធិបតីហ្វីលីពីន រ៉ូឌ្រីហ្គូ ឌើទើតេ នៅថ្ងៃ១៩ ខែវិច្ឆិកា ម្សិលមិញនេះ បានជួបពិភាក្សាទ្វេភាគីជាលើកដំបូងជាមួយនឹងសមភាគីរុស្សី លោក វ្លា ឌឺមៀរ ពូទីន ក្នុងរដ្ឋធានីលីម៉ានៃប្រទេសប៉េរូ ដែលជាកន្លែងមេដឹកនាំទាំងពីរ ត្រូវចូលរួមកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិករួមគ្នានោះ។
ដោយមិនមានការលាក់លៀមនោះ ប្រមុខហ្វីលីពីន នាឱកាសនោះ បានប្រាប់ប្រមុខរុស្ស៊ីត្រង់ៗថា លោក បានទន្ទឹងរង់ចាំជួបជាមួយនឹងលោកប្រធានាធិបតី ពូទីន មិនត្រឹមតែដោយសារ លោក ពូទីន តំណាងឲ្យប្រទេសដ៏អស្ចារ្យនោះទេ តែ ក៏ព្រោះតែ ជំនាញនៃភាពដឹកនាំរបស់លោកពូទីនតែម្តង។ នេះបើយោងតាមការដកស្រង់ពាក្យរបស់លោក ដោយសារព័ត៌មានរុស្ស៊ី RT។
អ្វីគួរកត់សម្គាល់នោះ ខណៈពេលរុស្ស៊ី កំពុងតែមានរឿងប្រទាំងប្រទូសជាមួយនឹងប្រទេសតំបន់អឺរ៉ុប រួមទាំងអាមេរិកនោះ លោក ឌើទើតេ ដែលធ្លាប់ហៅលោកពូទីនថា «Idol» ក្នុងកិច្ចសម្ភាសន៍ជាមួយនឹងកាសែត Al Jazeera ក៏ឆ្លៀតលើកទឹកចិត្តលោក ពូទីន តាមរយៈការបន្ទោសបង្អាប់ទៅលើប្រទេសទាំងនោះ។
លោក បានបញ្ជាក់ថា ប្រទេសលោក បានមានបំណងចង់ក្លាយជាផ្នែកមួយនៃលោកខាងលិច ប៉ុន្តែ ឥលូវរដ្ឋលោកខាងលិច កំពុងតែប៉ុនប៉ងវាយប្រហាររដ្ឋតូចៗ និងបំភិតបំភ័យប្រទេសតូចៗទាំងនោះ។ ហើយលោក បន្ថែមទៀតថា ឥរិយាបថទាំងនេះ គឺជាផ្នែកមួយដែលបង្កឡើងដោយ អាមេរិក និងសម្ព័ន្ធមិត្តអាមេរិកតែម្តង។
ដោយមិនឲ្យអ្នកដាក់ទណ្ឌកម្មហ្វីលីពីនខកចិត្តនោះ លោក ពូទីន ក៏បានសាទរចំពោះជ័យជម្នះនៃការឈ្នះការបោះឆ្នោតប្រធានាធិបតីហ្វីលីពីននៅថ្ងៃទី០៩ ខែឧសភាកន្លងមក ដោយលោក ថែមទាំងពន្យល់ថា កាលបរិច្ឆេទនោះ(០៩ ឧសភា) គឺជាថ្ងៃពិសេសសម្រាប់ប្រជាជាតិរុស្ស៊ី ដែលបានទទួលជ័យជម្នះលើរបបណាស៊ីអាល្លឺម៉ង់ក្នុងឆ្នាំ១៩៤៥។
ជាងនេះទៅទៀត មេដឹកនាំរុស្ស៊ី ក៏បានលើកឡើងយ៉ាងដូច្នេះថា៖ «បើនិយាយពីប្រវត្តិនៃទំនាក់ទំនងប្រទេសទាំងពីរគឺខ្លី តែ ប្រទេសទាំងពីរ សម្រេចបាននូវកិច្ចការដ៏អស្ចារ្យសម្រាប់ការអភិវឌ្ឍទំនាក់ទំនងភាពជាដៃគូគ្រប់ជ្រុងជ្រោយ និងការបង្កើនទំនុកចិត្តផងដែរ»។
សូមជម្រាបផងដែរថា កន្លងមកជាពិសេសនោះក្នុងរដ្ឋបាលអតីតប្រធានាធិបតីហ្វីលីពីន ប៊ែរនីណូ អាហ្គីណូ ហ្វីលីពីន គឺជាសម្ព័ន្ធមិត្តជិតស្និទ្ធបំផុតរបស់អាមេរិកនៅក្នុងតំបន់។ តែក្រោយពីលោក ឌើទើតេ ឡើងកាន់តំណែង ទំនាក់ទំនងស្អិតល្មួត បានប្រែប្រួល ដ្បិត ដោយសារតែ រដ្ឋបាលលោក អូបាម៉ា បានរិះគន់ពីការដឹកនាំរបស់លោក ឌើទើតេ។ ទន្ទឹមនឹងការមិនឲ្យតម្លៃទំនាក់ទំនងជាមួយនឹងអាមេរិក លោក ឌើទើតេ បានប្រកាសថា «បីប្រទេសរួមគ្នា គឺហ្វីលីពីន រុស្ស៊ី និងចិន ប្រឆាំងពិភពលោក»៕
Tag:
រុស្ស៊ី
ហ្វីលីពីន
អាមេរិក
© រក្សាសិទ្ធិដោយ thmeythmey.com