ពីនេះ ពីនោះ
ពលរដ្ឋ៖ ត្រូវដឹងថា ខ្លួនឯងត្រូវប្រកាន់សីលចំនួនប្រាំ នៅក្នុងសង្គម
× ភ្នំពេញ៖ ការរស់នៅរបស់មនុស្សក្នុងសង្គម តម្រូវឲ្យមនុស្សស្វែងរកគោលការណ៍សីលធម៌ជាចាំបាច់មួយសម្រាប់ការអនុវត្តឲ្យបានប្រសើរក្នុងការរស់នៅជាមួយមនុស្សក្នុងសង្គម។ យ៉ាងណាមិញ គ្រប់បុគ្គលទាំងអស់យ៉ាងហោចណាស់ត្រូវស្គាល់សីលធម៌ប្រាំយ៉ាងដែលខ្លួនត្រូវយកមកប្រតិបត្តិប្រចាំថ្ងៃ ដូចជាសីលធម៌ផ្ទាល់ខ្លួន, សីលធម៌ក្នុងគ្រួសារ, សីលធម៌ក្នុងវិជ្ជាជីវៈ, សីលធម៌ក្នុងសង្គម និងសីលធម៌ក្នុងពិភពលោក។ តើសីលធម៌ទាំងនេះមានលក្ខណៈបែបណា?
១/. សីលធម៌ផ្ទាល់ខ្លួន៖ ប្រជាពលរដ្ឋគ្រប់ត្រូវមានជាចាំបាច់ និងស្គាល់ច្បាស់ពីសីលធម៌ផ្ទាល់ខ្លួន ទើបអាចជួយខ្លួនឯងឲ្យក្លាយជាមនុស្សមានតម្លៃនៅក្នុងសង្គម។ ករណីនេះ ពលរដ្ឋគ្រប់ត្រូវប្រកាន់សីលធម៌ចំពោះខ្លួនឯង ហើយធ្វើជាមនុស្សដឹងខុសដឹងត្រូវ, ស្គាល់ល្អ ស្គាល់អាក្រក់, តាំងខ្លួនជាម្ចាស់ចិត្តរបស់ខ្លួនឯង, ទទួលខុសត្រូវនឹងអំពើរបស់ខ្លួន, ក្លាហានក្នុងផ្លូវត្រូវជាដើម។
២/. សីលធម៌ក្នុងគ្រួសារ៖ ករណីនេះ ពលរដ្ឋគ្រប់ត្រូវដឹងថា ប្រសិនបើខ្លួនជាអ្នកគ្រប់គ្រងគ្រួសារ ដូចជាឪពុកម្ដាយជាដើមនោះត្រូវ ចិញ្ចឹមកូន និងទំនុកបម្រុងកូនឲ្យបានសិក្សារៀនសូត្រ, ត្រូវស្រឡាញ់កូនឲ្យបានស្មើភាពគ្នា, ព្យាយាមធ្វើឲ្យគ្រួសារមានសុខដុម, រៀបចំកូនឲ្យបានទៅជាពលលរដ្ឋពេញលេញ ព្រមទាំងរៀបចំកូនឲ្យមានគូក្រសរ និងទ្រព្យសម្បត្តិឲ្យកូនបានសមរម្យតាមលទ្ធភាពដែលខ្លួនមាន។ ការបំពេញបែបនេះ បង្ហាញឲ្យឃើញថា ឪពុកម្ដាយបានបំពេញសីលធម៌ក្នុងនាមខ្លូនជាអ្នកគ្រប់គ្រងគ្រួសារ។
៣/. សីលធម៌ក្នុងវិជ្ជាជីវៈ៖ ការរស់នៅក្នុងសង្គម តម្លៃមួយដែលសំខាន់សម្រាប់មនុស្សគ្រប់រូបផងនោះ គឺតម្លៃវិជ្ជាជីវៈ។ ដើម្បីឲ្យទទួលបានតម្លៃនេះ បុគ្គលទាំងនោះត្រូវស្គាល់ពីសីលធម៌វិជ្ជាជីវៈ ដែលជាមូលដ្ឋាននាំឲ្យខ្លួនជាបុគ្គលមួយរូបមានតម្លៃចំពោះអាជីពរបស់ខ្លួន។ ចំណុចនេះ បុគ្គលគ្រប់រូបយ៉ាងហោចណាស់ ត្រូវមានមនសិការការងារ, ព្យាយាមរកស៊ីតាមសមត្ថភាព, រកស៊ីតាមសមាជីវោ, មិនរំលោភលើអ្នកតូចជាងខ្លួន ព្រមទាំងធ្វើការហួសកម្លាំងខ្លួន នាំឲ្យមានជំងឺបាក់កម្លាំងកាយ ជាដើម។
៤/. សីលធម៌ក្នុងសង្គម៖ ជាបុគ្គលម្នាក់ មិនមែនរស់នៅដោយគ្មានទំនាក់ទំនង គ្មានមិត្តភាពបាននោះទេ។ ហេតុនេះ ការអាចយល់ និងប្រតិបត្តិបានសីលធម៌ក្នុងសង្គម គឺកិច្ចការចាំបាច់មួយរបស់បុគ្គលគ្រប់រូប។ ប្រការនេះ បុគ្គលគ្រប់រូបត្រូវស្គាល់ថា តម្លៃសីលធម៌ក្នុងសង្គមគឺ ការមិនបែកបាក់គ្នា, មិនមើលងាយមនុស្សផងគ្នា, ជាបុគ្គលស្រឡាញ់យុត្តិធម៌, ចេះរាប់អានមនុស្សទូទៅ, ទទួលស្គាល់ទុក្ខវេទនារបស់អ្នកដទៃ ព្រមទាំងមិនរំលោភឈ្លានពានអ្នកដទៃជាដើម។
៥/. សីលធម៌ក្នុងពិភពលោក៖ ការស្គាល់នូវសីលធម៌មួយនេះ និងជួយបុគ្គលឲ្យចេះរួមរស់ដោយសន្តិភាពជាមួយប្រទេសដទៃ ទៅតាមគោលការណ៍របស់អង្គការសហប្រជាជាតិ ជាពិសេសលក្ខខណ្ឌ ដែលអង្គការសហប្រជាជាតិបានកំណត់នៅទីក្រុងបានឌុងនាប្រទេសឥណ្ឌូនេស៊ី។
នៅពេលដែលបុគ្គលគ្រប់រូបអាចប្រតិបត្តិ និងរៀបចំខ្លួនតាមមាគ៌ាទាំងនេះបាន នោះនឹងធ្វើឲ្យបុគ្គលទាំងនោះមានតម្លៃក្នុងនាមជាផ្នែកមួយនៃសង្គមមនុស្ស។ ទោះបីថា ការបង្ហាញមិនបានគ្រប់គ្រាន់ ប៉ុន្តែវា គឺមាគ៌ាបង្ហាញថា អ្នកមានផ្លូវសម្រាប់រៀបចំជីវិតឲ្យក្លាយជាមនុស្សល្អបាន៕
ដកស្រង់ពីសៀវភៅ សីលធម៌វិជ្ជាជីវៈ, វិទ្យាស្ថានជាតិអប់រំ
© រក្សាសិទ្ធិដោយ thmeythmey.com