ជនជាតិវៀតណាម ជិះយន្តហោះទៅលូកហោប៉ៅអ្នកកាន់ទុក្ខមហាក្សត្រថៃ

អន្តរជាតិ

នយោបាយអន្តរជាតិ

ជនជាតិវៀតណាម ជិះយន្តហោះទៅលូកហោប៉ៅអ្នកកាន់ទុក្ខមហាក្សត្រថៃ

22, Nov 2016 , 9:19 am

រូបភាព

ដោយ: តន ចាន់រិទ្ធារ៉ា

ចាប់តាំងពីមហាក្សត្រ ភូមិបុល អាឌុលយ៉ាដេត សោយទិវង្គតមក ប្រជាជនថៃរាប់ពាន់នាក់ មកតម្រង់ជួរខាងក្រៅរាជវាំងដើម្បីចូលគោរពព្រះសព។ ខណៈដែលប្រជាជនថៃកំពុងឈរជាជួរៗនោះ ក៏មានជនឆ្លៀតឱកាស ដែលភាគច្រើនជាជនបរទេស ធ្វើសកម្មភាពលូកហោប៉ៅអ្នកចូលរួមកាន់ទុក្ខ ហើយមានអ្នកខ្លះជិះយន្តហោះដើម្បីមកលូកហោប៉ៅដល់ទឹកដីថៃតែម្ដង។

ប៉ូលិសថៃបានអះអាងថា ជនជាតិថៃ ដែលតម្រង់ជួរនៅទីលាន Sanam Luang ត្រៀមចូលរាជវាំងដើម្បីគោរពព្រះសពមហាក្សត្រ ភូមិបុល អាឌុលយ៉ាដេត បានក្លាយជាជនរងគ្រោះនៃ «ក្រុមចោរលូកហោប៉ៅអន្តរជាតិ»។ មន្ត្រីប៉ូលិសថៃអះអាងដែរថា ភាគច្រើននៃក្រុមចោរលូកហោប៉ៅនេះ គឺជាជនជាតិវៀតណាមដែលខំជិះយន្តហោះ មកធ្វើសកម្មភាពលួចនៅទឹកដីថៃ។

កាសែតបាងកកប៉ុស្តិ៍ផ្សាយថា មន្ត្រីប៉ូលិសប្រចាំតំបន់ Chana Songkhram បានទទួលពាក្យបណ្ដឹងយ៉ាងច្រើនទាក់ទងករណីលូកហោប៉ៅ នៅក្នុងតំបន់កុះករក្បែររាជវាំង ចាប់តាំងពីស្ដេច ភូមិបុល សោយទិវង្គតនៅថ្ងៃទី១៣ ខែតុលាមកម្ល៉េះ។ ដំបូងពួកគេគិតថា ក្រុមលូកហោប៉ៅទាំងនោះ ជាជនជាតិថៃ។ ប៉ុន្តែក្រោយមក ក្រុមស៊ើបអង្កេតរកឃើញថា ពួកគេជាជនបរទេសទៅវិញ។

ក្រុមស៊ើបអង្កេតរកឃើញទៀតថា ជនសង្ស័យភាគច្រើនជាជនជាតិវៀតណាម ដែលធ្វើដំណើរមកកាន់ទឹកដី ដើម្បីគោលបំណងតែមួយគត់ គឺលួចទ្រព្យសម្បត្តិអ្នកកាន់ទុក្ខ។ លោក Somyot Udomraksasap អ្នកស៊ើបអង្កេតប្រចាំតំបន់ Chana Songkhram និយាយថា ប៉ូលិសបានពិនិត្យកាមេរ៉ាសុវត្ថិភាព ហើយរកឃើញជនសង្ស័យភាគច្រើនជាស្ត្រី មកពីវៀតណាម។

ប៉ូលិសថៃអះអាងដែរថា ក្រុមលូកហោប៉ៅទាំងនោះ មិនមែនធ្វើសកម្មភាពតែឯងឡើយ គឺធ្វើសកម្មភាពជាក្រុមតែម្ដង។ ពោលគឺមានអ្នកខ្លះចូលទៅរំខានជនរងគ្រោះ ហើយមានមួយក្រុមទៀតជាអ្នកធ្វើសកម្មភាព រួចយកទ្រព្យសម្បត្តិដែលលួចបាន ទៅឲ្យមនុស្សមួយក្រុមទៀត។ ពួកគេ លួចទូរសព្ទ ឬកាបូបពីហោប៉ៅជនរងគ្រោះ ឬក៏លូកយករបស់របរពីក្នុងកាតាបស្ពាយខ្នង។

លោក Somyot Udomraksasap និយាយទៀតថា ជនជាតិវៀតណាមកាន់តែច្រើន បានមកដល់ថៃ ដើម្បីធ្វើសកម្មភាពលួច។ ក្រៅពីជនជាតិវៀតណាម ក៏មានជនសង្ស័យជាជនជាតិកម្ពុជា និងអ្នកអត់ផ្ទះសម្បែងផងដែរ។ ពួកគេទាំងនោះ តែងតាមដានកម្មវិធីនានាក្នុងក្រុងបាងកក ជាពិសេសកម្មវិធីទទួលសញ្ញាបត្ររបស់និស្សិតសាកលវិទ្យាល័យ ព្រោះវាជាឱកាសល្អក្នុងការធ្វើសកម្មភាពតែម្ដង៕