អន្តរជាតិ
លោក ដូណាល់ ត្រាំ ក្រឡាស់សម្តីបន្តបន្ទាប់ ក្រោយបោះឆ្នោត
× ប្រធានាធិបតីអាមេរិកទើបជាប់ឆ្នោតលោក ដូណាល់ ត្រាំ ចាប់ផ្តើមក្រឡាស់សម្តីជាបន្តបន្ទាប់ ដោយប្តូរគោលជំហរជុំវិញការអនុវត្តគោលនយោបាយដែលធ្លាប់សន្យាក្នុងពេលឃោសនាបោះឆ្នោត។ ថ្មីៗនេះលោកបង្ហើបថា លោកមិនចាប់អារម្មណ៍រឿងកាត់ទោសលោកស្រី ហ៊ីឡារី គ្លីនតុន ដោយសាររឿងអ៊ីម៉ែលឡើយ។ មួយវិញទៀត ដូណាល់ ត្រាំ ក៏ផ្លាស់ប្តូរចិត្តឈប់បោះបង់ចោលកិច្ចព្រមព្រៀងអាកាសធាតុក្រុងប៉ារីសដែរ។ កន្លងមកលោកថា ការប្រែប្រួលអាកាសធាតុជារឿងក្លែងក្លាយ និងបោកបញ្ឆោតប៉ុណ្ណោះ។ កន្លងមក អតីតប្រមុខការទូតដ៏ល្បី លោក Henry Kissinger ក៏បានបញ្ជាក់ផងដែរថា កុំនាំគ្នារំពឹងលើអ្វីដែលលោក ដូណាល់ ត្រាំ បានសន្យាពេក។
សូមស្តាប់ការបកស្រាយរបស់លោក សៅ ផលនិស្ស័យ៖
នៅក្នុងយុទ្ធនាការឃោសនាបោះឆ្នោតប្រធានាធិបតីកន្លងមក លោក ដូណាល់ ត្រាំ បានសន្យាជាមួយអ្នកគាំទ្រថា បើលោកជាប់ឆ្នោតលោកនឹងទាត់ចោលកិច្ចព្រមព្រៀងពាណិជ្ជកម្មអន្តរជាតិ, ឈប់ខ្វាយខ្វល់រឿងប្រែប្រួលអាកាសធាតុ, បណ្តេញជនអន្តប្រវេសន៍ខុសច្បាប់ចេញពីអាមេរិក, ហាមឃាត់ប្រជាជនម៉ូស្លីមមិនឲ្យចូលទឹកដីអាមេរិក ហើយមួយទៀតលោកសន្យាកាត់ទោសលោកស្រី ហ៊ីឡារី គ្លីនតុន ដែលបានប្រើប្រាស់អ៊ីម៉ែលផ្ទាល់ខ្លួនដើម្បីបំពេញការងារជារដ្ឋមន្ត្រីការបរទេសផងដែរ។
ប៉ុន្តែ ក្រោយពេលលោកជាប់ឆ្នោត លោក ដូណាល់ ត្រាំ បានក្រឡាស់សម្តីរបស់ខ្លួនច្រើន ដោយលោកបំភ្លេចការសន្យាមួយចំនួននៅក្នុងពេលដែលលោកជជែកជាមួយសារព័ត៌មាន។ បើតាមការមើលឃើញជាក់ស្តែង លោកបានរើសមនុស្សដែលមាននិន្នាការប្រឆាំងឥស្លាម ក៏ដូចជាប្រឆាំងអ្នកស្រលាញ់ភេទដូចគ្នា ដើម្បីឲ្យបម្រើការងារក្នុងរដ្ឋបាលថ្មីរបស់លោកមែន ប៉ុន្តែលោកដូណាល់ ត្រាំ ខ្លួនឯង មិនមានគោលជំហររឹងត្អឹង និងជ្រុលនិយមដូចពេលឃោសនាបោះឆ្នោតឡើយ។ លោក ព្យាយាមសម្របសម្រួលតាមបរិបទសង្គមជាក់ស្តែងនិងបរិបទអន្តរជាតិដែលមានការប្រែប្រួលរហ័សដែរ។
ក្នុងពេលលោកជួបជាមួយសារព័ត៌មាន New York Times ម្សិលមិញ លោក ដូណាល់ ត្រាំ ត្រឡប់ទៅនិយាយល្អពីលោក បារ៉ាក់ អូបាម៉ា ហើយក្រៅពីនេះលោកក៏អះអាងថា លោកលែងតាមចងកម្មចងពៀរលោកស្រី ហ៊ីឡារី គ្លីនតុនដូចលោកធ្លាប់សន្យាដែរ។ ហើយអ្វីដែលសំខាន់ លោកចាប់ផ្តើមជឿជាក់ថា ពិភពលោកពិតជាកំពុងរងការគំរាមកំហែងដោយសារការប្រែប្រួលអាកាសធាតុពិតមែន។
១. ឈប់ចងកម្មចងពៀរលោកស្រី ហ៊ីឡារី គ្លីនតុន
គេនៅចាំបានថា ក្នុងពេលជជែកដេញដោលគ្នាលើកទី២ លោក ដូណាល់ ត្រាំវាយប្រហារលើលោកស្រី ហ៊ីឡារី គ្លីនតុន ខ្លាំងៗដោយលើកឡើងសំណុំរឿងអ៊ីម៉ែល។ លោកដូណាល់ ត្រាំថែមទាំងគំរាមកាត់ទោសនិងចាប់លោកស្រី ហ៊ីឡារី គ្លីនតុន ដាក់ពន្ធនាគារផងដែរ ក្នុងករណីលោកជាប់ឆ្នោតជាប្រធានាធិបតីនោះ។ លោកអះអាងថា ការប្រើប្រាស់អ៊ីម៉ែលឯកជនរបស់លោកស្រី ហ៊ីឡារី គ្លីនតុន ក្នុងពេលបំពេញការងារជារដ្ឋមន្ត្រីការបរទេសដែលវាបង្កហានីភ័យចំពោះសន្តិសុខជាតិអាមេរិកផងដែរ។
ប៉ុន្តែមកដល់ថ្ងៃអង្គារទី ២២វិច្ឆិកានេះ លោក ដូណាល់ ត្រាំ ចាប់ផ្តើមផ្លាស់ប្តូរពាក្យសន្យានេះ ដោយលោកប្រកាសថា លោកមិនចង់តាមចងកម្មពៀលោកស្រី ហ៊ីឡារី គ្លីនតុន រឿងអ៊ីម៉ែលទៀតឡើយ។ ក្នុងជំនួបជាមួយសារព័ត៌មាន New York Times លោកថា លោកស្រី ហ៊ីឡារី គ្លីនតុន រងការឈឺចាប់ច្រើនណាស់មកហើយកន្លងមក ហើយលោកក៏មិនគួរធ្វើរឿងណាដែលប៉ះពាល់លោកស្រី ខ្លាំងទៀតដែរ។
លោកបញ្ជាក់ច្បាស់ថា៖«ខ្ញុំមិនចង់ធ្វើបាបលោកស្រី ហ៊ីឡារី គ្លីនតុន ឡើយ។ ខ្ញុំពិតជាមិនចង់មែន។ លោកស្រីបានឆ្លងកាត់រឿងរ៉ាវច្រើនដែលឈឺចាប់ខ្លួនកន្លងមកនេះ»។
ដូច្នេះហើយគ្មានការចាត់តាំងរដ្ឋអាជ្ញាពិសេសដើម្បីសើបអង្កេតករណីអ៊ីម៉ែលលោកស្រី ហ៊ីឡារី គ្លីនតុន ទៀតឡើយនៅពេលដែលលោក ដូណាល់ ត្រាំ ស្បថ ចូលកាន់តំណែងនោះ។
២. ដូណាល់ ត្រាំ ជឿថា ការប្រែប្រួលអាកាសធាតុមានពិតប្រាកដមែន
លោក ដូណាល់ ត្រាំ ក្រឡាស់សម្តីម្តងទៀតពេលនិយាយដល់រឿង កិច្ចព្រមព្រៀងអាកាសធាតុក្រុងប៉ារីស។តាំងពីដើមមក លោក ដូណាល់ ត្រាំ ចោទថា បញ្ហាប្រែប្រួលអាកាសធាតុនេះជារឿង ក្លែងក្លាយដែលប៉ុណ្ណោះ។ ហើយលោកក៏ធ្លាប់សន្យាថា ពេលលោកជាប់ឆ្នោតលោកនឹងទាត់កិច្ចព្រមព្រៀងអាកាសធាតុក្រុងប៉ារីសស្ថិតក្រោមការដឹកនាំរបស់អង្គការសហប្រជាជាតិចោលទៀត។
ប៉ុន្តែ ក្រោយជាប់ឆ្នោត លោក ដូណាល់ ត្រាំ ទំនងជាយល់ថា ការប្រែប្រួលអាកាសធាតុជារឿងពិត មិនមែនក្លែងក្លាយឡើយ។ ពេលអ្នកសារព័ត៌មាន New York Times សាកសួរថា តើសកម្មភាពមនុស្សពាក់ព័ន្ធការប្រែប្រួលអាកាសធាតុឬអត់ លោក ដូណាល់ ត្រាំ បានតបវិញថា លោកជឿជាក់ថា វាមានជាប់ពាក់ព័ន្ធគ្នាមែន។ ហើយចំពោះកិច្ចព្រមព្រៀងអាកាសធាតុនោះ លោក ដូណាល់ ត្រាំ ប្រាប់ថា លោកបើកចិត្តទូលាយចំពោះកិច្ចព្រមព្រៀងនេះ ដែលវាមានន័យថា លោកទំនងមិនបោះបង់កិច្ចព្រមព្រៀងនេះចោលឡើយ។
សូមរម្លឹកបន្តិចដែរថា កិច្ចព្រមព្រៀងអាកាសធាតុនេះត្រូវបានគេបង្កើតឡើងនៅចុងឆ្នាំ ២០១៥ សំដៅដោះស្រាយបញ្ហាប្រែប្រួលអាកាសធាតុដែលជាគ្រោះថ្នាក់បំផុតមួយសម្រាប់ពិភពលោក។ រហូតមកដល់ខែកញ្ញា មហាអំណាចអាមេរិកនិងចិនបានសម្រេចផ្តល់សច្ចាប័នដល់កិច្ចព្រមព្រៀងនេះ ប៉ុន្តែគេដឹងច្បាស់មហាអំណាចទាំងពីរសុទ្ធតែជាអ្នកបំពុលពិភពលោកខ្លាំងជាងគេដែរ។
៣.លោក Henry Kissinger ដឹងថា លោក ដូណាល់ ត្រាំ នឹងមិនគោរពសន្យា១០០ភាគរយឡើយ
ការក្រឡាស់សម្តីបំភ្លេចពាក្យសន្យានេះមិនមែនជារឿងចម្លែកឡើយ។ វាប្រាកដណាស់ថា ប្រធានាធិបតីថ្មីមិនអាចធ្វើគ្រប់យ៉ាងតាមអ្វីដែលលោកលើកឡើងទេ ព្រោះបរិបទសង្គម និងអន្តរជាតិប្រែប្រួល។ ពាក់ព័ន្ធបញ្ហានេះ អតីតរដ្ឋមន្ត្រីការបរទេសអាមេរិកលោក Henry Kissinger ធ្លាប់ប្រាប់ថា មនុស្សគ្រប់គ្នាមិនគួរសង្ឃឹមខ្លាំងថា លោក ដូណាល់ ត្រាំ អនុវត្តតាមអ្វីដែលលោកបានលើកឡើងក្នុងពេលឃោសនាឡើយ។
អ្នកការទូតជើងចាស់រូបនេះយល់ថា រដ្ឋបាលថ្មីគួរតែប្រឹងប្រែងអភិវឌ្ឍគោលនយោបាយនិងយុទ្ធសាស្ត្រដែលអាចឆ្លើយតបតម្រូវការប្រជាជននិងស្របតាមគោលនយោបាយការបរទេសអាមេរិកផង ជាជាងធ្វើតាមអ្វីដែលខ្លួនសន្យា។
លោកបានលើកឡើង ក្នុងបទសម្ភាសន៍ជាមួយសារព័ត៌មាន CNN ថា៖ «គេមិនគួររំពឹងខ្លាំងទេថា លោក ដូណាល់ ត្រាំ នឹងធ្វើតាមអ្វីគ្រប់យ៉ាងដែលលោកបានសន្យាក្នុងពេលឃោសនា»។ហើយលោកពន្យល់ថា វាជារឿងខុសឆ្គង និងអាចបង្កឲ្យមានបញ្ហាផង ដែលគ្រប់គ្នាទាមទារឲ្យរដ្ឋបាលលោក ដូណាល់ ត្រាំ ធ្វើរឿងគ្រប់យ៉ាងដែលគេបានលើកឡើងក្នុងពេលឃោសនា ស្របពេលដែលបរិបទពិភពលោកមានការប្រែប្រួលខ្លាំងនោះ៕
Tag:
ដូណាល់ ត្រាំ
បារ៉ាក់ អូបាម៉ា
ហ៊ីឡារី គ្លីនតុន
© រក្សាសិទ្ធិដោយ thmeythmey.com