ជាតិ
រដ្ឋមន្ត្រីកសិកម្ម៖ ការងារកសិកម្មមិនមែនងាយស្រួលទេ
× សៀមរាប៖ លោករដ្ឋមន្ត្រីក្រសួងកសិកម្ម វេង សាខុន បានផ្តល់ក្នុងណែនាំលើការងារកសិកម្មជាច្រើន ដល់អ្នកភូមិធម្មជាតិរុនតាឯក។ ប្រជាពលរដ្ឋក្នុងតំបន់អង្គរជាង១០០គ្រួសារ ត្រូវបានជ្រើសរើសឲ្យមកស្នាក់នៅក្នុងភូមិអភិវឌ្ឍន៍ថ្មី ភូមិរុនតាឯក ហើយពួកគេទទួលបានផ្ទះនិងដីចំការចំនួន១ហិកតា ពីអាជ្ញាធរជាតិអប្សរា។ បច្ចុប្បន្នការងារកសិកម្មក្នុងភូមិអភិវឌ្ឍន៍ថ្មីនេះ កំពុងទទួលបានផ្នែកបណ្តុះបណ្តាលបច្ចេកទេសពីដៃគូជាច្រើន រួមមានប្រទេសចិនជាដើម។ សម្រាប់រដ្ឋមន្ត្រីកសិកម្ម ការងារកសិកម្មមិនមែនជាការងារងាយស្រួលនោះទេ ហើយលោកចង់ឲ្យប្រជាពលរដ្ឋប្រឹងជំនះធ្វើយ៉ាងណាងើបចេញពីភាពលំបាកនានា។
ការធ្វើកសិកម្ម គឺត្រូវពឹងទាំងស្រុងលើប្រព័ន្ធទឹក។ នេះជាការលើកឡើងរបស់លោក វេង សាខុន ដែលលោកកំពុងផ្តល់ដំបូន្មានជាច្រើនដល់អ្នកគ្រប់គ្រងភូមិរុនតាឯក ក្នុងការជួយរៀបចំប្រព័ន្ធទឹកដល់កសិករ។ លោកបញ្ជាក់ថា ការរៀបចំត្រូវធ្វើឲ្យច្បាស់លាស់ មិនមែនចេះតែធ្វើៗនោះទេ ដើម្បីចៀសវាងការស្តារឡើងវិញ ដោយត្រូវចាយលុយច្រើនសន្ធឹក។
កាលពីថ្ងៃទី២១ វិច្ឆិកាកន្លងទៅ លោក វេង សាខុន បានដឹកនាំក្រុមការងារចុះទៅពិនិត្យការងារកសិកម្មនៅភូមិធម្មជាតិរុនតាឯក និងបានឈាងមើលការរៀបចំរោងកញ្ចប់សម្រាប់ដាំដំណាំ ដែលជាកិច្ចសហប្រតិបត្តិការរវាងអាជ្ញាធរជាតិអប្សរា និងភាគីចិន។ តាមលោករដ្ឋមន្ត្រី ភូមិរុនតាឯកជាកន្លែងទាក់ទាញមួយសម្រាប់ភ្ញៀវទេសចរ ដូច្នេះភូមិនេះគឺត្រូវអភិវឌ្ឍន៍ និងរៀបចំឲ្យបានល្អប្រសើរ។
លោករដ្ឋមន្ត្រី វេង សាខុន បានផ្តល់មតិកែលម្អជាច្រើនដល់លោក ម៉ី ម៉ារ៉ាឌី អ្នកគ្រប់គ្រងភូមិធម្មជាតិរុនតាឯក។ អ្វីដែលលោករដ្ឋមន្ត្រីផ្តោតសំខាន់ គឺការរៀបចំប្រព័ន្ធស្រោចស្រព ដល់ដំណាំកសិកម្មរបស់អ្នកភូមិ និងមួយទៀត គឺការស្វែងរកទីផ្សារដល់ពួកគេជាដើម។ ក្រៅពីនេះលោក វេង សាខុន ក៏ចង់ឲ្យអាជ្ញាធរជាតិអប្សរា គិតគូរផ្តល់មេគោសម្រាប់ឲ្យប្រជាជនចិញ្ចឹមផងដែរ ក្រៅពីការផ្តល់ជូនដីចំការសម្រាប់ដាំដុះ។ល៕
សូមស្តាប់សំឡេងលោក វេង សាខុន
Tag:
វេង សាខុន
ភូមិធម្មជាតិរុនតាឯក
© រក្សាសិទ្ធិដោយ thmeythmey.com