ពីនេះ ពីនោះ
យុវជន-យុវចាស់៖ មិនទាន់មានកិច្ចសហការផ្នែកគំនិតជាមួយគ្នាបានល្អឡើយ
× ភ្នំពេញ៖ បរិបទសម័យមុន មនុស្សចាស់ ចាស់ព្រឹទ្ធាចារ្យ គ្រូអាចារ្យ ព្រះសង្ឃ ជាជនតែងត្រូវបានយុវជន ក្មេងជំនាន់ក្រោយគោរពនិងឲ្យតម្លៃ។ ផ្ទុយពីសម័យមុន សម័យថ្មី កូនខ្មែរក្មេងក្ដី យុវជនក្ដី មួយចំនួនមិនគោរព ហើយព្រមទាំងមិនឲ្យតម្លៃយុវចាស់ទៅវិញ។ ប្រការនេះទោះមិនមែនទាំងអស់ តែជារូបភាពមួយដែលយុវវ័យជំនាន់ថ្មីនេះបានផ្ដល់តម្លៃទាបដល់មនុស្សជំនាន់ចាស់។
យុវចាស់មួយចំនួនក្នុងពេលបច្ចុប្បន្ននេះ នៅតែប្រកាន់ផ្នត់គំនិតចាស់ មើលមិនទាន់ឃើញពីតម្លៃនៃការវិវឌ្ឍនផ្នែកគំនិត និងចំណេះដឹងរបស់យុវជនសម័យថ្មីនេះ។ ប្រការនេះ ហើយដែលនាំឲ្យគេសង្កេតឃើញថា ពេលខ្លះទោះបីយុវជន ប្រឹងព្យាយាមបង្ហាញទស្សនៈ គំនិត ជាផែនការ ជាមធ្យោបាយដឹកនាំ រៀបចំសង្គម ឲ្យមានការអភិវឌ្ឍល្អយ៉ាងណា ក៏មិនត្រូវបានគេយកមកពិចារណា ព្រោះតែគិតថា ជាគំនិតក្មេងខ្ចី។
ចំណែកយុវជនសម័យថ្មីវិញ ព្យាយាមបង្ហាញពីកិត្យានុភាពរបស់ខ្លួន តាមរយៈចំណេះដឹងថ្មីៗនៅក្នុងសង្គមទំនើប និងសម័យបច្ចេកវិទ្យា។ ចំណេះដឹងយុវជនសម័យថ្មី បានវិវឌ្ឍនយ៉ាងល្អ គួរឲ្យកោតសរសើរ ដែលតម្លៃរបស់មនុស្សខ្មែរជំនាន់ក្រោយ បានក្រោកឡើងជាបណ្ដើរៗសម្រាប់សង្គមមួយនេះ ដើម្បីថ្ងៃមុខសង្គមមួយនេះក្លាយជាសង្គមទំនើបមួយ។ ប៉ុន្តែ យុវជនសម័យថ្មី បែរជានាំគ្នាពើងទ្រូងបង្ហាញភាពអស្ចារ្យ ទៅលើយុវចាស់ ព្រះសង្ឃ ចាស់ព្រឹទ្ធាចារ្យនោះទៅវិញដែរ។
ព្រោះទង្វើបែបនេះ វាមិនត្រឹមតែជាសកម្មភាពប្រាស់ចាកពី ក្រឹតក្រមវប្បធម៌ដ៏ល្អរបស់ខ្មែរប៉ុណ្ណោះទេ។ ប៉ុន្តែគឺ សបញ្ជាក់យ៉ាងច្បាស់ថា កូនខ្មែរ មួយចំនួន បានធ្លាក់ចុះផ្នែកសីលធម៌យ៉ាងខ្លាំង ព្រោះពេលខ្លះសម្បីតែមាតាបិតាខ្លួនក៏គេមិនគោរព ថែមទាំងជេរប្រមាថ និងវាយបន្លែមទៀត។ លើសពីនេះ ទៅទៀតមានយុវជនមួយចំនួន ស្ទើរមិនបានផ្ដល់តម្លៃសោះឡើយទៅលើចំណេះដឹងរបស់មនុស្សជំនាន់មុនខ្លួន រហូតដល់មានពាក្យអ្នកជំនាន់មុនមាន គំនិតមិនទាន់សម័យបច្ចេកវិទ្យា ជាដើម។
ប្រការនេះហើយ ដែលបង្ហាញឲ្យឃើញថា ទាំងយុវចាស់ និងយុវជនជំនាន់ថ្មី ហាក់មិនទាន់មានការបើកចិត្តឲ្យទូលាយឲ្យគ្នា ដើម្បីទទួលយក និងរៀនសូត្រពីគ្នា ដើម្បីយកគំនិតថ្មី ផែនការថ្មី មធ្យោបាយថ្មី យកទៅរៀបចំ និងកសាងសង្គមនៅឡើយ។
ហេតុនេះ រវាងយុវជន និង យុវចាស់ មិនគួរបន្ទោសគ្នានោះទេ ប៉ុន្តែអ្វីដែលសំខាន់ត្រូវគិតថា បរិបទថ្មីនៃសកម្មភាពរបស់យុវជន គឺជាទង្វើមួយដែលត្រូវតែកែ ត្រូវទាញមកវិញឲ្យពួកគេចេះគោរព និងឲ្យតម្លៃមនុស្សនៅជុំវិញខ្លួនរបស់ពួកគេ។ ព្រោះថា មិនមែនខ្លួនមានចំណេះបន្តិចបន្តួច ស្គាល់សម័យវិទ្យាសាស្ត្រ ទទួលវប្បធម៌បស្ចឹមប្រទេស ទទួលឥទ្ធិពល វិទ្យាសាស្ត្រលោកសាកល បែរមកគិតថា អ្នកជំនាន់មុន ថ្នាក់ដឹកនាំចាស់ៗ មន្ត្រីចាស់ៗលោកគ្មានសមត្ថភាពនោះទេ ព្រោះបើអស់លោកមិនមានសមត្ថភាពម្លេះសង្គមនេះក៏មិនអាចរីកចម្រើនបានមួយចំនួនធំនោះដែរ។ យ៉ាងណាមិញ មនុស្សចាស់ ក៏ត្រូវចាប់ផ្ដើមសម្លឹងមើលតម្លៃខ្ពស់របស់យុវជនមួយចំនួន ដើម្បីផ្ដើមកិច្ចសហការគ្នា រួមគ្នារវាង យុវជន និង យុវចាស់ ដើម្បីកសាងជាតិ៕
© រក្សាសិទ្ធិដោយ thmeythmey.com