អន្តរជាតិ
នយោបាយអន្តរជាតិ
ក្រុមហ៊ុនម៉ិកស៊ិកសុំជួយ ដូណាល់ ត្រាំ សង់ជញ្ជាំងព្រំដែនអាមេរិក-ម៉ិកស៊ិក
×
ការសាងសង់ជញ្ជាំងតាមបណ្ដោយព្រំដែនអាមេរិក និងម៉ិកស៊ិក គឺជាគោលនយោបាយចម្រួងចម្រាសមួយរបស់ប្រធានាធិបតីជាប់ឆ្នោត ដូណាល់ ត្រាំ ។ លោកចង់សាងសង់របងតាមព្រំដែនដើម្បីទប់ស្កាត់លំហូរនៃជនអន្តោប្រវេសន៍ខុសច្បាប់ពីម៉ិកស៊ិក។ នៅពេលនេះលោក ត្រាំ មិនទាន់ចូលកាន់តំណែងផងនោះ មានក្រុមសំណង់ដ៏ធំមួយរបស់ម៉ិកស៊ិកចេញមុខសុំលោកសាងសង់របងព្រំដែនវែងអន្លាយនេះ។
ប្រធានក្រុមហ៊ុនផលិតស៊ីម៉ង់ត៍ម៉ិកស៊ិក Grupo Cementos de Chihuahua (GCC) បានសុំស្នើប្រធានាធិបតីទើបជាប់ឆ្នោត ដូណាល់ ត្រាំ ក្នុងការស្ថាបនាជញ្ជាំងដែលធំ ស្អាត មានអំណាច នៅតាមបណ្ដោយព្រំដែនអាមេរិក-ម៉ិកស៊ិកភាគខាងត្បូង។ ការសាងសង់ជញ្ជាំងតាមព្រំដែន ជាគោលនយោបាយរបស់លោក ត្រាំ ក្នុងការទប់ស្កាត់លំហូរជនភៀសខ្លួន តែវាធ្វើឲ្យលោករងការរិះគន់យ៉ាងខ្លាំង។
ក្នុងបទសម្ភាសន៍ជាមួយទីភ្នាក់ងារព័តមាន Reuters លោក Enrique Escalante នាយកប្រតិបត្តិក្រុមហ៊ុន GCC បានឡើងពីគុណសម្បត្តិរបស់ក្រុមហ៊ុនលោក ដែលជាក្រុមហ៊ុនផលិតស៊ីម៉ង់ត៍ដ៏ធំមួយនៅក្នុងតំបន់នោះ។ លោក Enrique Escalante ក៏បានសរសើរលោក ដូណាល់ ត្រាំ ដោយអះអាង គោលនយោបាយរបស់លោក ត្រាំ នឹងផ្ដល់ប្រយោជន៍ខ្លាំងដល់អ្នកជំនួញមុខរបរនេះ។
គេចាំបានថា នៅថ្ងៃប្រកាសទទួលធ្វើជាបេក្ខជនប្រធានាធិបតី លោក ដូណាល់ ត្រាំ បញ្ជាក់ថា លោកនឹងសាងសង់ជញ្ជាំងតាមព្រំដែន ហើយរបងនោះនឹងមានតម្លៃថោកបំផុត។ លោកបន្តថា លោកនឹងសង់ជញ្ជាំងនៅព្រំដែនភាគខាងត្បូង ហើយលោកប្រកាសដែរថា ម៉ិកស៊ិកនឹងចេញថ្លៃសាងសង់ជញ្ជាំងនេះ។ ប៉ុន្តែម៉ិកស៊ិកក៏ឆ្លើយតបវិញថា ខ្លួនមិនបង់លុយសាងសង់ឡើយ។
តាមពិតទៅ ជញ្ជាំងព្រំដែននេះនឹងមានចម្ងាយតែមួយពាន់គីឡូម៉ែតប៉ុណ្ណោះ ដ្បិតកន្លែងខ្លះគេមិនអាចសាងសង់ជញ្ជាំងបានឡើយដោយសារទីតាំងទាំងនោះខ្ពស់ស្រាប់ ឬក៏មិនអំណោយផលដល់ការឆ្លងកាត់ឡើយ។ តែកម្ពស់របស់វានឹងខ្ពស់ខ្លាំងតាមការចង់បានរបស់លោក ត្រាំ ។ លោកចង់សាងសង់ជញ្ជាំងដែលមានកម្ពស់ដល់ចាប់ ៩ ទៅ ១២ម៉ែត្រ ហើយនិងត្រូវធ្វើពីស៊ីម៉ង់ត៍ទាំងអស់។
ងាកទៅក្រុម GCC បន្តិច ក្រុមហ៊ុននេះជាក្រុមហ៊ុនផលិតស៊ីម៉ង់ត៍ដ៏ធំបំផុតមួយនៅម៉ិកស៊ិក ដែលមានមូលដ្ឋានក្នុងរដ្ឋ Chihuahua ។ ក្រុមហ៊ុនមួយនេះមានរោងចក្រធំបីនៅអាមេរិក ដែលអាចផលិតបាន៧០ភាគរយនៃផលិតផលលក់សរុប។ នៅពេលថ្មីៗនេះ ក្រុមហ៊ុន GCC ទើបតែពង្រីកប្រតិបត្តិការរបស់ខ្លួន តាមរយៈការទិញក្រុមហ៊ុនដទៃទៀតនៅក្នុងវិស័យមួយនេះ។ បើតាមទំហំនេះ ក្រុមហ៊ុន GCC អាចមានលទ្ធភាពសាងសង់ជញ្ជាំងតាមបណ្ដោយព្រំដែនបាន៕
Tag:
ម៉ិកស៊ិក
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com