អភិបាលរងរាជធានីភ្នំពេញ៖ ភ្នំពេញស្ទះចរាចរណ៍ធ្ងន់ធ្ងរ ជាងហាណូយ បាងកក និងប៉េកាំង…

ជាតិ

សេដ្ឋកិច្ច

អភិបាលរងរាជធានីភ្នំពេញ៖ ភ្នំពេញស្ទះចរាចរណ៍ធ្ងន់ធ្ងរ ជាងហាណូយ បាងកក និងប៉េកាំង…

26, Nov 2016 , 7:39 pm

រូបភាព

លោក អៀង អូននី អភិបាលរងរាជធានីភ្នំពេញ ថ្លែងសន្និបាតស្តីពី៖ ទីក្រុងយើងទាំងអស់គ្នា

ដោយ:

ភ្នំពេញ៖ លោក អៀង អូននី អភិបាលរងនៃគណៈអភិបាលរាជធានីភ្នំពេញ បានថ្លែងប្រាប់ក្រុមអ្នកសារព័ត៌មានថា ការកកស្ទះចរាចរណ៍នៅភ្នំពេញ មានស្ថានភាពធ្ងន់ធ្ងរ ជាងទីក្រុងធំៗមួយចំនួន ដូចជា៖ ហាណូយ ហូជីមិញ បាងកក និងប៉េកាំងជាដើម។ លោកពន្យល់ថា ឥរិយាបថរបស់អ្នកបើកបរ និងការមិនគោរពច្បាប់ចរាចរណ៍ គឺជាដើមចមនៃការកកស្ទះចរាចរណ៍នៅរាជធានីភ្នំពេញ។

ការថ្លែងរបស់លោក អៀង អូននី គឺបន្ទាប់ពីលោកចូលរួមសន្និសីទស្តីពី៖«ទីក្រុងយើងទាំងអស់គ្នា» ដែលធ្វើឡើងនៅមជ្ឈមណ្ឌលឌាយកូនៀរក្នុងរាជធានីភ្នំពេញ កាលពីព្រឹកថ្ងៃទី២៣ ខែវិច្ឆិកា។

សូមអញ្ជើញស្តាប់ប្រសាសន៍ លោក អៀង អូននី ខាងក្រោមនេះ៖

រីឯការគ្រប់គ្រងចិញ្ចើមផ្លូវវិញ ត្រូវបាន លោក អៀង អូននី បានអះអាងថា សាលារាជធានីភ្នំពេញ មានលទ្ធភាពបណ្តេញអ្នករកស៊ីតាមចិញ្ចើញផ្លូវក្នុងរយៈពេលតែ២៤ម៉ោងប៉ុណ្ណោះ ប៉ុន្តែ លោកថា បញ្ហានេះ នឹងអាចប៉ះពាល់ដល់អ្នករកស៊ីក្រៅប្រព័ន្ធ ដែលជាប្រភពរួមចំណែកនៃកំណើនសេដ្ឋកិច្ចប្រជាជន។ លោកបន្ថែមទៀតថា ការគ្រប់គ្រងចិញ្ចើមផ្លូវ គឺជាប្រធានបទមួយធំ ពីព្រោះ វាស្ថិតនៅចន្លោះបញ្ហាសេដ្ឋកិច្ច នយោបាយ និងបញ្ហាបច្ចេកទេស។ លោកបញ្ជាក់យ៉ាងដូច្នេះថា៖«អ្នកលក់តាមចិញ្ចើមផ្លូវ បើចង់សម្អាតចេញពីចិញ្ចើមផ្លូវ តែ២៤ម៉ោងអស់បាត់អស់ឥឡូវ ប៉ុន្តែកុំភ្លេចថា បងប្អូនដែលកំពុងអនុវត្តន៍សេដ្ឋកិច្ចក្រៅប្រព័ន្ធ បានរួមចំណែកធំណាស់ ក្នុងកំណើនសេដ្ឋកិច្ចរបស់ប្រជាពលរដ្ឋ។ លោកបន្តទៀតថា៖ «ក្នុងនាមខ្ញុំអ្នកមកពីគណបក្សឈ្នះឆ្នោត បើធ្វើហើយគ្រាន់តែចាញ់ឆ្នោតអត់បានធ្វើទៀត តើធ្វើៗអ្វី? ឧបមាថា ខ្ញុំធ្វើឲ្យស្អាត ប៉ុន្តែ គ្រាន់តែខ្ញុំធ្វើភ្លាម គេអត់បោះឆ្នោតឲ្យខ្ញុំ។ តើមានរឿងហេតុអ្វី បានជាខ្ញុំត្រូវសម្អាតមួយភ្លេច ហើយចុងបញ្ចប់លទ្ធផលដដែល ហើយខ្ញុំត្រូវចុះពីអំណាច? ដូច្នេះ ខ្ញុំត្រូវស៊ូក្នុងអំណាច ហើយធ្វើការងារនេះឲ្យបានជោគជ័យ»។

សូមអញ្ជើញស្តាប់ប្រសាសន៍លោក អៀង អូននី ខាងក្រោមនេះ៖

ម្យ៉ាងវិញទៀត អ្នកនាំពាក្យសាលារាជធានីភ្នំពេញរូបនេះ បានបង្ហាញពីដំណោះស្រាយមួយចំនួន ដើម្បីដោះស្រាយបញ្ហាខាងលើនេះ។ លោកបានពន្យល់ថា ពលរដ្ឋគ្រប់រូប គួរតែកែប្រែទម្លាប់នៃការបើកបរ គោរពច្បាប់ចរាចរណ៍ និងមានភាពអធ្យាស្រ័យគ្នាទៅវិញទៅមក។ លើសពីនេះ សាលារាជធានីភ្នំពេញ គ្រោងបញ្ចប់ការបំពាក់កាមេរ៉ាសុវត្ថិភាពចំនួន៦០០គ្រឿងនៅចុងឆ្នាំនេះ ដើម្បីការពារផ្នែកសន្តិសុខ និងគ្រប់គ្រងបញ្ហាចរាចរណ៍ ដោយមានគោលដៅផាកពិន័យទៅថ្ងៃអនាគត។ ក្នុងចំណោមកាមេរ៉ា៦០០គ្រឿង JICA បានជួយចំនួន១០០គ្រឿង។

ទាក់ទងនឹងការកកស្ទះចរាចរណ៍នេះ ទីភ្នាក់ងារសហប្រតិបត្តិការអន្តរជាតិជប៉ុន(JICA) បានបានបង្ហាញមូលហេតុមូលចំនួននៃការកកស្ទះចរាចរណ៍នៅភ្នំពេញ។ មូលហេតុទីមួយ គឺបណ្តាលមកពីកំណើនប្រជាជននៅរាជធានីភ្នំពេញ។ JICA អះអាងថា នៅឆ្នាំ១៩៩៨ នៅភ្នំពេញមានប្រជាជន ១លាននាក់។ ឆ្នាំ២០០៨ ប្រជាជនបានកើនឡើង ១.៣៣លាននាក់ ខណៈនៅឆ្នាំ២០១០ មានការធ្វើសមាហរណកម្ម ឃុំចំនួន២០របស់ខេត្តកណ្តាល ធ្វើឲ្យដែនដីរាជធានីភ្នំពេញមានចំនួនប្រជាជន ១.៦៩លាននាក់នៅឆ្នាំ២០១៣។

JICA បានសន្និដ្ឋានថា ចំនួនប្រជាជននៅភ្នំពេញ អាចកើនឡើងដល់ ១.៨ លាននាក់នៅឆ្នាំ២០១៦ ហើយអាចកើនឡើងបន្ថែមទៀតរហូត២.៨លាននាក់នៅឆ្នាំ២០៣៥។ មូលហេតុទី២៖ ចំនួនរថយន្តដែលបានចុះបញ្ជីនៅភ្នំពេញ បានកើនឡើង៣ដងក្នុងមួយទសវត្សរ៍ចុងក្រោយនេះ។ បន្ថែមពីនេះ ការកើនឡើងចំនួនទោចក្រយានយន្តក៏ជាមូលហេតុនៃការកកស្ទះចរាចរណ៍ផងដែរ។ ក្រៅពីការកើនឡើងនៃចំនួនយានយន្ត ការចតរថយន្តបំពានច្បាប់ ការមិនគោរពភ្លើងសញ្ញាចរាចរណ៍ ការបើកបរបញ្ច្រាសទិស គឺសុទ្ធសឹងជាមូលហេតុនៃកកស្ទះចរាចរណ៍។

ដោយឡែក ការដោះស្រាយការកកស្ទះចរាចរណ៍នៅភ្នំពេញវិញ JICA បានជំរុញឲ្យពលរដ្ឋចូលរួមគោរពច្បាប់ចរាចរណ៍ ព្រមទាំងងាកប្រើប្រាស់មធ្យោបាយសាធារណៈ ដែលធ្វើឲ្យពលរដ្ឋអាចចំណេញប្រាក់ មានសុវត្ថិភាព ជាពិសេស អាចកាត់បន្ថយចំនួនរថយន្តនៅលើដងផ្លូវ។ បើតាម JICA រដ្ឋាករស្វយ័តដឹកជញ្ជូនសាធារណៈរថយន្តក្រុង នឹងពង្រីកចំនួនរថយន្តក្រុងនៅរាជធានីភ្នំពេញ ឲ្យបាន១០ខ្សែនៅឆ្នាំ២០២០៕