ប្រតិកម្មចម្រុះរបស់មេដឹកនាំពិភពលោកក្រោយមរណភាព លោក ហ្វីដែល កាស្ត្រូ

អន្តរជាតិ

នយោបាយអន្តរជាតិ

ប្រតិកម្មចម្រុះរបស់មេដឹកនាំពិភពលោកក្រោយមរណភាព លោក ហ្វីដែល កាស្ត្រូ

27, Nov 2016 , 11:48 am

រូបភាព

ដោយ: រួបរួម

ក្រោយមរណភាពរបស់អតីតប្រធានាធិបតីគុយបា លោក ហ្វីដែល កាស្ត្រូ បណ្តាមេដឹកនាំពិភពលោក បានបង្ហាញពីប្រតិកម្មចម្រុះ។ ថ្នាក់ដឹកនាំខ្លះបានចាត់ទុកថា ជាការបាត់បង់ដ៏ធំធេង ប៉ុន្តែខ្លះទៀត បានរំលឹកពីការគ្រប់គ្រងបែបផ្តាច់ការរបស់លោក ហ្វីដែល កាស្ត្រូ អស់រយៈពេលជាច្រើនទសវត្សរ៍។

ខាងក្រោមនេះ ជាប្រតិកម្មចម្រុះដែលដកស្រង់ដោយទីភ្នាក់ងារព័ត៌មាន AFP៖

លោក បាន គីមូន អគ្គលេខាធិការអង្គការសហប្រជាជាតិ ៖ «ក្រោមការដឹកនាំរបស់អតីតប្រធានាធិបតី កាស្ត្រូ គុយបាបានបោះជំហានទៅមុខលើវិស័យអប់រំ អក្ខរកម្ម និងសុខាភិបាល»។

លោក បារ៉ាក់ អូបាម៉ា ប្រធានាធិបតីអាមេរិក៖ «ប្រវត្តិសាស្ត្រ នឹងវិនិច្ឆ័យផលប៉ះពាល់ដ៏ធំធេងរបស់លោកហ្វីដែល កាស្ត្រូ»។

លោក ដូណាល់ ត្រាំ ប្រធានាធិបតីជាប់ឆ្នោតអាមេរិក៖ «[លោក ហ្វីដែល កាស្ត្រូ] គឺជាមេដឹកនាំផ្តាច់ការដ៏ឃោឃៅម្នាក់ដែលជិះជាន់សង្កត់សង្កិន ប្រជាពលរដ្ឋរបស់ខ្លួន»។

លោក វ្លាឌីមៀ ពូទីន ប្រធានាធិបតីរុស្ស៊ី៖ «បុរសរដ្ឋម្នាក់នេះ ត្រូវបានចាត់ទុកដូចជានិមិ្មតរូបនៃសម័យមួយក្នុងប្រវត្តិសាស្ត្រទំនើបរបស់ពិភពលោក»។

លោក ស៊ី ជិនពីង ប្រធានាធិបតីចិន៖ «សមមិត្ត កាស្ត្រូ នឹងរស់នៅជាអមតៈ»។

លោក នារិន្ត្រា មូឌី នាយករដ្ឋមន្ត្រីឥណ្ឌា៖ «គាត់ធ្លាប់ជាឥស្សរជនដ៏លេចធ្លោបំផុតម្នាក់នៅសតវត្សរ៍ទី១៩»។

លោក Jean-Claud Juncker ប្រធានគណៈកម្មាធិការអឺរ៉ុប៖ «គាត់ធ្លាប់ជាមេដឹកនាំប្រវត្តិសាស្ត្រប្រចាំសតវត្សរ៍ ហើយពិភពលោក បានបាត់បង់បុរសម្នាក់ដែលមនុស្សជាច្រើនចាត់ទុកជាវីរបុរស»។

លោក ហ្វ្រង់ស្វ័រ ហូឡង់ ប្រធានាធិបតីបារាំង៖ «គាត់បានដឹកនាំចលនាបដិវត្តន៍គុយបា ជាមួយក្តីសង្ឃឹមថា នឹងទទួលបានផ្លែផ្កា ប៉ុន្តែបដិវត្តន៍នេះ បានផ្តល់នូវការស្រងាកចិត្តដ៏ធំធេង»។

ព្រះអង្គ Felipe VI ស្តេចអេស្ប៉ាញ៖ «គាត់ជាមនុស្សមនុស្សដ៏សំខាន់ក្នុងប្រវត្តិសាស្ត្រដែលមិនអាចប្រកែកបាននោះឡើយ»។

លោក Justin Trudeau នាយករដ្ឋមន្ត្រីកាណាដា៖ «ពលរដ្ឋកាណាដាចូលរួម មរណទុក្ខជាមួយពលរដ្ឋគុយបាចំពោះការបាត់បង់មេដឹកនាំដ៏អស្ចារ្យម្នាក់»។

លោក បាសា អាល់អាសាដ ប្រធានាធិបតីស៊ីរី៖ «ការតស៊ូររបស់លោក បានក្លាយជាវីរភាពមួយ និងជាគំរូដល់មេដឹកនាំ និងពលរដ្ឋនៅក្នុងពិភពលោកទាំងមូល»។

លោក គឹម ជុងអ៊ុន មេដឹកនាំកូរ៉េខាងជើង៖ «បើទោះបីជាគាត់បានបាត់បង់ជីវិតក៏ដោយ ប៉ុន្តែជ័យជម្នះដែលមិនអាចកាត់ថ្លៃបាន ស្ថិតនៅជាប់ក្នុងបេះដូងពលរដ្ឋនៃប្រទេសយើងទាំងពីរ និងបេះដូងនៃមនុស្សជាតិទូទៅ»។

លោក Evo Morales ប្រធានាធិបតីបូលីវី៖ «វាមេដឹកនាំប្រវត្តិសាស្ត្រដែលបានការពារភាពថ្លៃថ្នូរបស់ពលរដ្ឋលើពិភពលោក»។

លោក Juan Manuel Santos ប្រធានាធិបតីកូឡុំប៊ី៖ «យើងទាំងអស់គ្នាយំ សោកស្តាយចំពោះមរណភាពរបស់លោក ហ្វីដែល កាស្ត្រូ»។

លោកស្រី Nkosazana Dlamini Zuma ប្រធានសម្ព័ន្ធអាហ្វ្រិក៖ «លោក ហ្វីដែល កាស្ត្រូ គឺជាមេដឹកនាំបដិវត្តន៍ដ៏ពិតប្រាកដម្នាក់ ដែលជួយលើកតម្កើងសេរីភាព និងការអភិវឌ្ឍន៍សង្គមសេដ្ឋកិច្ចនៅអាហ្វ្រិក និងប្រទេសកំពុងអភិវឌ្ឍន៍នានា»។

លោក Jacop Zuma ប្រមុខរដ្ឋអាហ្វ្រិកខាងត្បូង៖ «លោកប្រធានាធិបតីកាស្ត្រូ គឺជាដៃគូម្នាក់របស់យើងក្នុងការប្រយុទ្ធប្រឆាំងនឹងរបបអាប៉ាថេត»។

លោក Charles Michel នាយករដ្ឋមន្ត្រីបែលហ្សិក៖ «ទំព័រប្រវត្តិសាស្ត្រនយោបាយដ៏សំខាន់មួយត្រូវបានបញ្ចប់។ វាក៏ជាការបញ្ចប់សង្គ្រាមត្រជាក់ផងដែរ»។

លោក Mahmoud Abbas ប្រធានអាជ្ញាធរប៉ាឡេស្ទីន៖ «លោក ហ្វីដែល កាស្ត្រូ គឺជាអ្នកតស៊ូរមតិដ៏អស្ចារ្យម្នាក់ ដើម្បីយុត្តិធម៌ក្នុងពិភពលោក»។

លោក Rodrigo Duterte ប្រធានាធិបតីហ្វីលីពីន៖ «គាត់បានបង្ហាញពីការតស៊ូរប្រឆាំងលោកខាងលិច និងចក្រពត្តិនិយម»៕