ពីនេះ ពីនោះ
សាធារណជន៖ និយាយឲ្យតម្លៃសីលធម៌ ប៉ុន្តែម្ដេចមិនគិតគូធ្វើយ៉ាងណាឲ្យមានសីលធម៌?
× ភ្នំពេញ៖ សីលធម៌គឺជាបញ្ញត្តិមួយដែលមានតម្លៃបំផុតចំពោះភាវៈជាមនុស្ស។ ព្រោះថា សត្វមិនស្គាល់អ្វីទៅជាសីលធម៌ ឬអសីលធម៌នោះទេ គឺមានតែមនុស្សទេដែលអាចយល់បាន។ ចុះហេតុអ្វីមនុស្សចាំបាច់ត្រូវមានសីលធម៌? ហើយហេតុអ្វីមនុស្សចាំបាច់ស្វែងយល់ពីសីលធម៌រស់នៅ?
ជាការពិតណាស់ នៅពេលដែលបុគ្គលម្នាក់មានសីលធម៌ វានឹងធ្វើឲ្យបុគ្គលនោះក្លាយជាមនុស្សម្នាក់ដែលមានវិន័យនៅក្នុងជីវិត។ បន្ថែមពីនេះ នៅពេលដែលមនុស្សម្នាក់មានវិន័យ នោះវាងាយនឹងជួយ ឲ្យបុគ្គលនោះមានភាពជោគជ័យក្នុងការងារ ជោគជ័យក្នុងជីវិតគ្រួសារ ជីវិតសង្គម និងទំនាក់ទំនងរវាងបុគ្គល និងបុគ្គល មិនថាស្ថិតនៅក្នុងលក្ខខណ្ឌបែបណានោះទេ។ លើសពីនេះទៅទៀតនោះ នៅពេលដែលបុគ្គលម្នាក់ កាន់តែមានភាពជោគជ័យក្នុងការងារ គឺបុគ្គលនោះកាន់តែមានសីលធម៌ ។ ហើយ បុគ្គលម្នាក់កាន់តែមានសីលធម៌ នោះនឹងនាំឲ្យបុគ្គលនោះកាន់តែមានសេចក្ដីថ្លៃថ្នូរក្នុងជីវិត។
ផ្ទុយមកវិញ នៅពេលដែលបុគ្គលម្នាក់អសីលធម៌ នោះនឹងងាយទាញទម្លាប់ជីវិតរបស់ជននោះឲ្យក្លាយជាមនុស្សដែលគ្មានវិន័យ។ នៅពេលណាដែលមនុស្សម្នាក់គ្មានវិន័យនៅក្នុងជីវិតមិនថាតែនៅក្នុងជីវិតរស់នៅប្រចាំថ្ងៃ កន្លែងការងារ នោះវាងាយនឹងធ្វើឲ្យជននោះក្លាយជាមនុស្សដែលគ្មានសណ្ដាប់ធ្នាប់ ខ្វះការទទួលខុសត្រូវ បរាជ័យក្នុងជីវិតទំនាក់ទងប្រចាំថ្ងៃ អ្នកនៅជុំវិញខ្លួនអស់ជំនឿចិត្ត និងជាពិសេសធ្វើឲ្យគេក្លាយជាមនុស្សបរាជ័យក្នុងការងារជាដើម។ នៅទីបំផុត បុគ្គលនោះកាន់តែបន្ទាបបន្ថោកខ្លួនឯង និងក្លាយជាបុគ្គលដែលគ្មានតម្លៃ។
ជារួមមក មនុស្សម្នាក់មានសីលធម៌ មិនមែនរាប់ត្រឹមតែសកម្មភាពប្រកបដោយសីលធម៌ឡើយ។ ប៉ុន្តែសីលធម៌មួយ ដែលអាចនិយាយបានថាជាសីលធម៌ពិតបាន គឺត្រូវចេញមកពីគំនិត និងសញ្ចេតនាខាងក្នុងចិត្ត និងបេះដូងរបស់បុគ្គលនោះ។ សីលធម៌ ត្រូវផ្សាភ្ជាប់ជាមួយចំណេះដឹង ព្រោះបើគ្មានចំណេះដឹង បុគ្គលនោះពិបាកបែងចែកអ្វីជាសីលធម៌ អ្វីជាអសីលធម៌ណាស់។ ហេតុនេះបើឲ្យតម្លៃទៅលើសីលធម៌ គឺត្រូវទៅសិក្សារកមាគ៌ាធ្វើយ៉ាងណាទើបមានសីលធម៌ ផងដែរ៕
© រក្សាសិទ្ធិដោយ thmeythmey.com