អន្តរជាតិ
រជ្ជទាយាទ Maha Vajiralongkorn យាងចូលស្រុកដើម្បីឡើងសោយរាជ្យ
× រជ្ជទាយាទ Maha Vajiralongkorn បានយាងត្រឡប់ពីអាល្លឺម៉ង់មកថៃវិញហើយនៅថ្ងៃទី១ ខែវិច្ឆិកា ដើម្បីត្រៀមឡើងសោយរាជ្យជាមហាក្សត្រថ្មី។ ការយាងត្រឡប់មកពីបរទេសនេះ កើតឡើងពីរថ្ងៃក្រោយប្រធានសភាថៃ បានសុំយាងរជ្ជទាយាទអង្គនេះ មកស្នងរាជ្យបន្តពីព្រះចៅ ភូមិបុល អាឌុលយ៉ាដេត ជាបិតា។
នៅល្ងាចថ្ងៃទី១ ខែវិច្ឆិកា រជ្ជទាយាទ Maha Vajiralongkorn នឹងជួបជាមួយបណ្ដាថ្នាក់ដឹកនាំស្ថាប័នកំពូលទាំងបីរបស់ប្រទេស ដែលដឹកនាំដោយស្ដេចរាជានុសិទ្ធិ Prem Tinsulanonda ។ នាយករដ្ឋមន្ត្រី ប្រាយុទ្ធ ចន្ទអូចា, ប្រធានសភា Pornpetch Wichitcholachai និងប្រធានតុលាការកំពូល Veerapol Tungsuwan នឹងមានវត្តមានក្នុងជំនួបដែលធ្វើឡើងនៅក្នុងរាជវាំងថៃម៉ោង ៦៖៣០នាទីល្ងាច។
កាសែតបាងកកប៉ុស្តិ៍ផ្សាយថា ក្នុងជំនួបនោះ ប្រធានសភា Pornpetch Wichitcholachai នឹងយាងរជ្ជទាយាទ Maha Vajiralongkorn ឡើងសោយរាជ្យជាផ្លូវការតែម្ដង។ គេរំពឹងថា រជ្ជទាយាទក៏នឹងយល់ព្រមលើសំណើយាងនេះដែរ ដើម្បីក្លាយជាមហាក្សត្រទី១០ នៃរាជវង្សចក្រី ដែលគ្រប់គ្រងប្រទេសថៃអស់ជាងពីររយឆ្នាំមកហើយ។ យោងតាមកម្មវិធីនៃពិធីការរាជវាំង ការប្រកាសផ្លូវការនឹងធ្វើឡើងក្រោយជំនួបនេះ។
តាមពិតទៅ នៅថ្ងៃទី៣០ ខែវិច្ឆិកា ឧបនាយករដ្ឋមន្ត្រីថៃ Prawit Wongsuwon បានបញ្ជាក់ហើយថា រជ្ជទាយាទ ព្រមតាមសំណើសុំយាងរបស់ប្រធានសភារួចហើយ និងរង់ចាំតែសំណើផ្លូវការប៉ុណ្ណោះ។ សំណើផ្លូវការនេះ នឹងត្រូវប្រគល់នៅជំនួបនៅល្ងាចថ្ងៃទី១ ខែធ្នូ នេះដែរហើយ។
រាជបល្ល័ង្គថៃទំនេរ ក្រោយការចូលទិវង្គតរបស់ព្រះចៅ ភូមិបុល អាឌុលយ៉ាដេត នៅថ្ងៃទី១៣ ខែតុលា។ នេះក៏ដោយសារតែរជ្ជទាយាទ Maha Vajiralongkorn បានបដិសេធឡើងសោយរាជ្យភ្លាមៗ និងបានប្រកាសកាន់ទុក្ខជាមួយប្រជារាស្ត្រសិន។ អំឡុងពេលនេះ ប្រធានក្រុមទីប្រឹក្សាមហាក្សត្រ Prem Tinsulanonda ទទួលបន្ទុកជាស្ដេចរាជានុសិទ្ធិបណ្ដោះអាសន្ន។
ព្រះអង្គម្ចាស់ Maha Vajiralongkorn មិនសូវមានប្រជាប្រិយភាពប៉ុន្មានឡើងក្នុងចំណោមប្រជាជនថៃ ខុសពីបិតា។ ព្រះចៅ ភូមិបុល អាឌុលយ៉ាដេត ត្រូវបានប្រជាជនថៃគោរពស្រឡាញ់ដូចអាទិទេព និងមានឥទ្ធិពលយ៉ាងខ្លាំងលើឆាកនយោបាយរបស់ថៃ។ មិនតែប៉ុណ្ណោះ ទាំងមហាក្សត្រ សមាជិករាជវង្សផ្សេងទៀត ក៏ត្រូវបានការពារដោយច្បាប់យ៉ាងតឹងរ៉ឹងទៀតផង។ ជនណាដែលជាប់ទោសប្រមាថមហាក្សត្រ ឬសមាជិករាជវង្សណាមួយ អាចត្រូវជាប់ទោសដល់៣០ឆ្នាំឯណោះ៕
Tag:
ថៃ
Maha Vajiralongkorn
© រក្សាសិទ្ធិដោយ thmeythmey.com