ពីនេះ ពីនោះ
បព្វជិត និងគ្រហស្ថ៖ ត្រូវពិចារណាពីគុណធម៌ចំពោះគ្នាឡើងវិញ
× ភ្នំពេញ៖ បព្វជិត គឺជាបុគ្គលដែលជាភ្នាក់ងាររបស់សាសនាក្នុងការរក្សា ការពារ និងផ្សព្វផ្សាយអំពីធម៌វិន័យ របស់សាសនា។ ចំណែកគ្រហស្ថគឺជាជនដែលមានជំនឿ ជឿលើសាសនានានា ទៅតាមការយល់ឃើញ និងការគោរពរបស់ខ្លួន ចំពោះសាសនា ក៏ដូចជាភ្នាក់ងាររបស់សាសនាដែលជាបព្វជិត។ ប៉ុន្តែក្នុងបុព្វហេតុនៃការផ្សព្វផ្សាយ និងជឿរវាងបព្វជិត និងគ្រហស្ថក៏ត្រូវតែមានគុណធម៌ផ្ដល់ឲ្យគ្នាទៅវិញទៅមកផងដែរ។ តើអ្វីជាគុណធម៌ដែលបព្វជិត និងគ្រហស្ថត្រូវផ្ដល់ឲ្យគ្នា?
ក្នុងនាមជាបព្វជិត ត្រូវតែព្យាយាមបំពេញនូវគុណធម៌មួយចំនួនចំពោះគ្រហស្ថដូចជា៖ ត្រូវព្យាយាមសង្រួមកាយ វាចា ចិត្ត របស់ខ្លួន ឲ្យសមជាបុគ្គលដែលគួរជាទីគោរពប្រណិប័តន៍ក្នុងសាសនា ចំពោះគ្រហស្ថទាំងឡាយ ក៏ដូចជាសាធារណជនទូទៅ ។ នោះគឺមានន័យថា ជាជនដែល សមជាបុគ្គល ផ្សព្វផ្សាយ ធម៌ គម្ពី។ ក្នុងនោះផងដែរ បព្វជិតត្រូវផ្ដល់ឱវាទល្អៗ ដើម្បីបង្រៀន និងប្រៀនប្រដៅដល់សាធារណជន និងធ្វើជាគំរូដល់ប្រជាជន។ ត្រូវធ្វើការផ្សព្វផ្សាយ និងបំភ្លឺព្រះធម៌ កសាងទីអារាមសម្រាប់ជាប្រយោជន៍ដល់សាធារណជន ដឹកនាំពិធីកម្មសាសនានានា ព្រមទាំងប្រកាន់ខ្ជាប់ឲ្យបាននូវព្រហ្មវិហាធម៌ទាំងបួនគឺ មេត្តា ករុណា មុទិតា និងឧបេក្ខា ព្រមទាំងទសពិធរាជធម៌។
ផ្ទុយមកវិញ ក្នុងនាមជាគ្រហស្ថក៏ត្រូវតែមានភារកិច្ច និងតួនាទីក្នុងការតបស្នងទៅវិញនូវគុណធម៌របស់ខ្លួនចំពោះបុគ្គលដែលមានភារៈដឹកនាំសាសនា ដែលជាបុព្វជិត នោះផងដែរ។ ហេតុដូចនេះ ក្នុងនាមជាគ្រហស្ថ ត្រូវបំពេញនូវគុណធម៌របស់ខ្លួនមួយចំនួនដូចជា៖ ត្រូវតាំងចិត្តខ្ពស់ក្នុងការគោរពដោយ កាយ វាចា ចិត្តចំពោះបុព្វជិត។ ត្រូវព្យាយាមដើរតាមគន្លងឱវាទដែលល្អៗ និងផ្គត់ផ្គងចតុបច្ច័យចំពោះលោក។ ត្រូវព្យាយាមយកចិត្តទុកដាក់ ព្យាយាមសិក្សា និងធ្វើខ្លួនឲ្យក្លាយជាមនុស្សល្អតាមមាគ៌ាសាសនា។ ត្រូវចូលរួមផ្គត់ផ្គងការកសាង ជួយថែរក្សា ការពារសម្បត្តិក្នុងសាសនា មានភក្ដីភាពជំនឿ និងការចូលរួមដោយសទ្ធាជ្រះថ្លា។ បន្ថែមពីនោះទៀត ក្នុងនាមជាគ្រហស្ថក៏ត្រូវប្រកាន់យក ទាន់ សីល បរិច្ចាគ អាជ្ជវៈ មទ្ទវៈ តបៈ អក្កោធៈ អវិហិង្សា ខន្តី អវិរោធនៈ ជាប់ជាប្រចាំដើម្បីកសាងខ្លួនឲ្យក្លាយជាបុគ្គលល្អក្នុងសង្គមសាសនា និងសង្គមជាតិ។
ហេតុដូចនេះ ទោះបីជាគ្រហស្ថ ឬបព្វជិត គឺត្រូវតែមាននូវគុណធម៌ជាប់ខ្លួនដើម្បីផ្ដល់ឲ្យគ្នាទៅវិញទៅមក ដើម្បីឲ្យមានភាពកក់ក្ដៅនៅក្នុងការផ្សព្វផ្សាយធម៌ គម្ពី និងមានភាពកក់ក្ដៅនៅក្នុងជំនឿចំពោះសាសនាតាមរយៈបព្វជិត ឆ្ពោះទៅរកការកសាងសង្គមមួយដោយស្មារតីបរិសុទ្ធ។ យ៉ាងណាមិញ បព្វជិតមិនមែនមានន័យថា ល្អទាំងអស់នោះដែរ ហេតុនេះចូលកុំយកសាសនា ឬងារជាបព្វជិតមកបោកប្រាស់រាស្ត្រ។ ដោយឡែក គ្រហស្ថគ្រប់រូប ក៏ត្រូវតែជាមនុស្សដែលចេះបែងចែកល្អ និងអាក្រក់ ហេតុនិងផលឲ្យបានត្រឹមត្រូវ ដើម្បីសាងគុណធម៌រវាងគ្នា និងគ្នា៕
© រក្សាសិទ្ធិដោយ thmeythmey.com