អន្តរជាតិ
កូរ៉េខាងជើង ត្អូញត្អែរ ថា ក្រុមប្រឹក្សាសន្តិសុខរករឿងតែខ្លួន...ខណៈសមាជិកអចិន្ត្រៃយ៍ ក៏ធ្វើដូចគ្នាដែរនោះ
× រដ្ឋាភិបាលក្រុងព្យុងយ៉ាង បានព្រមានថានឹងមានការឆ្លើយតបមួយឲ្យកាន់តែខ្លាំងក្លា«ក្រោមគោលការណ៍ស្វ័យការពារ» ដើម្បីឆ្លើយតបទៅនឹងសេចក្តីសម្រេចដំណោះស្រាយថ្មីរបស់អង្គការសហប្រជាជាតិដែលជាទណ្ឌកម្មប្រឆាំងនឹងកូរ៉េខាងជើងដែលបានបាញ់សាកល្បងគ្រាប់បែកនុយក្លេអ៊ែរ និងកម្មវិធីនុយក្លេអ៊ែរនោះ។ ក្រុងព្យុងយ៉ាង ក៏សម្តែងការខកចិត្តចំពោះទណ្ឌកម្មនោះ ដែលមានលក្ខណៈមិនស្មើភាព។
ក្រសួងការបរទេសកូរ៉េខាងជើង នៅថ្ងៃ០១ ខែធ្នូ បានចេញសេចក្តីថ្លែងការណ៍មួយ ដោយបានហៅចំណាត់ការរបស់ក្រុមប្រឹក្សាសន្តិសុខអង្គការសហប្រជាជាតិ «បំពានអំណាច និងរំលោភអធិបតេយ្យរបស់កូរ៉េខាងជើង»។ នេះបើយោងតាមសារព័ត៌មាន Aljazeera ដែលបានដកចេញពីប្រភពព័ត៌មានរដ្ឋកូរ៉េខាងជើង KCNA។
តាមប្រភពព័ត៌មានដដែលនោះ ក្រសួងការបរទេសដដែល ក៏បានសង្កត់ធ្ងន់យ៉ាងដូច្នេះថា៖«ប្រទេសជាច្រើន រាប់បញ្ចូលទាំងសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិផងដែរនោះ បានបាញ់សាកល្បងគ្រាប់បែកនុយក្លេអ៊ែរ និងរ៉ុក្កែតរាប់ពាន់គ្រាប់ ប៉ុន្តែក្រុមប្រឹក្សាសន្តិសុខ មិនបានហាមឃាត់ប្រទេសទាំងនោះម្តងណាឡើយ»។ សមាជិកអចិន្ត្រៃយ៍ក្រុមប្រឹក្សាសន្តិសុខអង្គការសហប្រជាជាតិមាន ដូចជា ចិន បារាំង រុស្ស៊ី អង់គ្លេស និង អាមេរិក។
សូមជម្រាបផងដែរថា ក្រុមប្រឹក្សាសន្តិសុខអង្គការសហប្រជាជាតិ នៅថ្ងៃទី៣០ ខែវិច្ឆិកា បានអនុម័តជាឯកច្ឆន្ទលើសម្រេចដំណោះស្រាយថ្មីមួយបន្ថែមដើម្បីឆ្លើយតប ក៏ដូចជាប្រឆាំងនឹងសកម្មភាពដ៏គឃ្លើនរបស់កូរ៉េខាងជើងដែលបានបាញ់សាកល្បងគ្រាប់បែកនុយក្លេអ៊ែរលើកទី៥នៅថ្ងៃទី០៩ ខែកញ្ញាកន្លងទៅ ដែលនោះគឺជាសាកល្បងមួយដ៏ខ្លាំងក្លាបំផុត។ ដំណោះស្រាយលេខ២៣២១នោះ គឺជាប្រភេទទណ្ឌកម្មមួយដ៏ធ្ងន់ធ្ងរបំផុត ដែលមានទិសដៅបិទដង្ហើមសេដ្ឋកិច្ចដើម្បីទ្រទ្រង់រដ្ឋាភិបាលក្រុងព្យុងនោះ។
តាមរយៈសេចក្តីសម្រេចជាដំណោះស្រាយនោះ សមាជិកទាំង១៥នៃក្រុមប្រឹក្សាសន្តិសុខ បានអះអាងជាថ្មីថា កូរ៉េខាងជើងមិនគួរបាញ់សាកល្បងអាវុធនុយក្លេអ៊ែរ បច្ចេកវិទ្យាមីស៊ីលបាលីស្ទីក ឬសកម្មភាពបង្កហេតុផ្សេងបន្ថែមទៀតឡើយ។ យោងតាមប្រការ២៦នៃសេចក្តីសម្រេច ដំណោះស្រាយ ២៣២១ កូរ៉េខាងជើង មិនអាចផ្គត់ផ្គង់ លក់ ឬដឹកជញ្ជូនទាំងដោយផ្ទាល់ ឬដោយប្រយោលពីទឹកដីរបស់ខ្លួន ឬនាវាដឹកជញ្ជូនដែលមានទង់ជាតិកូរ៉េខាងជើងនូវ ធ្យូង និងថ្មទៀតបានឡើយ ហើយសមាជិកទាំងអស់ ក៏ត្រូវបានហាមឃាត់ក្នុងការធ្វើលទ្ធកម្មពីកូរ៉េខាងជើងលើមុខទំនិញទាំងនោះផងដែរ។
តាមប្រការ២៦ នៃដំណោះស្រាយ ២២៧០ ដដែលនោះ សេចក្តីសម្រេច មានទិសដៅធានាបិទច្រកសេដ្ឋកិច្ច និងហិរញ្ញវត្ថុ គឺការលក់ធ្យូងថ្មដែលជាដង្ហើមរបស់កូរ៉េខាងជើងតែម្តង។ បញ្ញត្តិនោះ បង្ហាញយ៉ាងច្បាស់ពីការព្រមព្រៀងគ្នាជាឯកច្ឆន្ទរបស់ក្រុមប្រឹក្សាសន្តិសុខ ដែលរួមមានទាំងចិន ដែលជាសម្ព័ន្ធមិត្តកូរ៉េខាងជើងដែរនោះ បានសម្រេចផ្ដាច់ការនាំចេញរបស់ធ្យូងថ្មរបស់កូរ៉េខាងជើងក្នុងបរិមាណធ្យូងថ្ម ៧.៥លានតោនសម្រាប់ឆ្នាំ២០១៧ ដែលមានតម្លៃប្រមាណ៤០០លានដុល្លារ៕
© រក្សាសិទ្ធិដោយ thmeythmey.com