ពូទីន ត្រៀមសហការជាមួយ ត្រាំ ដោះស្រាយបញ្ហាស៊ីរី និងប្រឆាំងភេរវកម្ម

អន្តរជាតិ

ពូទីន ត្រៀមសហការជាមួយ ត្រាំ ដោះស្រាយបញ្ហាស៊ីរី និងប្រឆាំងភេរវកម្ម

02, Dec 2016 , 9:30 pm

រូបភាព

ដោយ: សៅ ផលនិស្ស័យ (Sao Phal Niseiy)

ប្រធានាធិបតីរុស្ស៊ីលោក វ្ល៉ាឌីមៀ ពូទីន បន្ទន់ឥរិយាបថនិងមិនរិះគន់សហរដ្ឋអាមេរិកដូចសព្វមួយដងក្នុងពេលដែលលោកផ្ទល់សុន្ទរកថាថ្នាក់ជាតិចំពោះមុខសមាជិកសភានិងមន្ត្រីរដ្ឋាភិបាល។លោកប្រកាសថា រដ្ឋាភិបាលលោក ត្រៀមខ្លួនសហការជាមួយរដ្ឋបាលថ្មីរបស់លោកដូណាល់ ត្រាំ ដើម្បីដោះស្រាយបញ្ហាស៊ីរីនិងប្រឆាំងភេរវកម្មរួមគ្នា។

សូមស្ដាប់ព័ត៌មានលម្អិត៖

ក្នុងពេលផ្តល់សុន្ទរកថា ប្រចាំឆ្នាំនៅចំពោះមុខសមាជិកសភា និងមន្ត្រីរដ្ឋាភិបាល នៅថ្ងៃព្រហស្បតិ៍ លោកវ្ល៉ាឌីមៀ ពូទីន ហាក់បន្ធូរបន្ថយសម្តីរិះគន់សហរដ្ឋអាមេរិកខុសប្លែកពីពេលមុន។ លោកថែមទាំងប្រកាសថា លោកត្រៀមខ្លួនសហការជាមួយរដ្ឋបាលថ្មីរបស់លោក ដូណាល់ ត្រាំ ដើម្បីដោះស្រាយបញ្ហាពិភពលោកថែមទៀតផង។

យោងតាមទីភ្នាក់ងារព័ត៌មាន Reuters លោក ពូទីន បានអំពាវនាវឲ្យមានការលើកស្ទួយទំនាក់ទំនងនិងកិច្ចសហការរវាងរស្ស៊ីជាមួយអាមេរិកនៅពេលខាងមុខផង។

លោកបានថ្លែងថា ៖«យើងត្រៀមខ្លួនរួចហើយដើម្បីសហការជាមួយរដ្ឋបាលអាមេរិកថ្មី។ វាជារឿងសំខាន់ដែលយើងត្រូវស្តារនិងចាប់ផ្តើមអភិវឌ្ឍទំនាក់ទំនងទ្វេភាគីរួមគ្នាដោយឈរលើគោលការណ៍ស្មើភាពគ្នានិងគោរពផលប្រយោជន៍គ្នាទៅវិញទៅមក»។

បន្ថែមពីនេះប្រធានាធិបតីលោក ពូទីន ក៏លើកឡើងពីបំណងរបស់រដ្ឋាភិបាលលោកក្នុងការសហការជាមួយអាមេរិកដើម្បីដោះស្រាយបញ្ហាស៊ីរី និងរូមគ្នាប្រយុទ្ធប្រឆាំងចលនាភេរវកម្មអន្តរជាតិផងដែរ។លោកពន្យល់ថា សហរដ្ឋអាមេរិកនិង រុស្ស៊ីមានទំនួលខុសត្រូវរួមគ្នាក្នុងការដោះស្រាយបញ្ហាប្រឈមពិភពលោករួមគ្នា និងធានាពីសន្តិសុខ និងការមិនរីកសាយភាពនៃអាវុធនុយក្លេអ៊ែរ។

បើតាមការលើកឡើងរបស់លោក វ្ល៉ាឌីមៀ ពូទីន រុស្ស៊ី បានបន្តទាក់ទងគ្នារួចហើយជាមួយក្រុមអន្តរកាលរបស់លោកដូណាល់ ត្រាំ រួចរាល់ហើយពាក់ព័ន្ធបញ្ហាស៊ីរីនេះ។ ហើយ គេរំពឹងថា វានឹងមានផ្លែផ្កាច្រើនក្នុងទំនាក់ទំនងមហាអំណាចទាំងពីរ ក្រោយលោក ដូណាល់ ត្រាំ នឹងស្បថចូលកាន់ជាផ្លូវការនៅថ្ងៃ ២០ខែមករាខាងមុខនេះ។

តាមពិតទៅទំនាក់ទំនងរវាងអាមេរិកនិងរុស្ស៊ីធ្លាក់ចុះខ្លាំងបំផុត ក្រោយពេលដែលរុស្ស៊ីឈ្លានពាននិងក្រសោបយកទឹកដី Crimea កាលពីដើមឆ្នាំ ២០១៤ ហើយជាលទ្ធផលអាមេរិកបានដាក់ទណ្ឌកម្មជាច្រើនជំហានប្រឆាំងរស្ស៊ីផងដែរ។ ក្រោយមកទំនាក់ទំនងនេះកាន់តែធ្លាក់ចុះខ្លាំងមិនធ្លាប់មានឡើយចាប់ពីសង្គ្រាមត្រជាក់បិទបញ្ចប់ទៅ ក្រោយពេលរុស្ស៊ីចូលអន្តរាគមន៍ ក្នុងសង្គ្រាមស៊ីវិលស៊ីរីកាលពីចុងឆ្នាំមុន។

អាមេរិកក្រោមការដឹកនាំរបស់លោក បារ៉ាក់ អូបាម៉ា តែងតែបន្តចោទថា រដ្ឋាភិបាលរុស្ស៊ីចូលដៃចូលជើងជាមួយរដ្ឋាភិបាលស៊ីរីដោយបន្តទម្លាក់គ្រាប់បែកសម្លាប់ជនស៊ីវិលច្រើននាក់។ ហើយរុស្ស៊ីនិងស៊ីរី អាចជាប់ពាក់ព័ន្ធបទឧក្រិដ្ឋសង្គ្រាមថែមទៀតផង។

ប៉ុន្តែ លោក ដូណាល់ ត្រាំ មាននិន្នការផ្ទុយស្រឡះពីលោក បារ៉ាក់ អូបាម៉ា ដោយលោកចង់មានទំនាក់ទំនងល្អជាមួយរុស្ស៊ី និងចាប់ដៃគ្នាដោះស្រាយបញ្ហារួមគ្នា។ លោក ត្រាំ សរសើរលោក ពូទីន ក្នុងពេលឃោសនាបោះឆ្នោត ហើយលោកបានទូរសព្ទទៅជជែកជាមួយលោក ពូទីន ថែមទៀតក្រោយពេលលោកជាប់ឆ្នោត៕