អន្តរជាតិ
អតីតនាយករដ្ឋមន្រី្តម៉ាឡេស៊ី ចោទនាយករដ្ឋមន្ត្រីម៉ាឡេស៊ីបច្ចុប្បន្ន ថា«កំពុងបំផ្លាញជាតិ»តាមការដឹកនាំបែបពុករលួយ
× អតីតនាយករដ្ឋមន្ត្រីម៉ាឡេស៊ី លោក Mahathir Mohamad បានបន្តប្រើពាក្យវាយប្រហារខ្លាំងៗ ប្រឆាំងការដឹកនាំរបស់នាយករដ្ឋមន្ត្រីម៉ាឡេស៊ីបច្ចុប្បន្នលោក Najib Razak ដោយចោទថា លោក Najib កំពុងបំផ្លាញប្រទេស តាមរយៈការក្រាញននៀលនឹងអំណាច បើទោះបីជាមានចលនាប្រឆាំង និងទាមទារឲ្យចុះពីតំណែង ដោយសាររឿងអាស្រូវពុករលួយក៏ដោយ។ អតីតនាយករដ្ឋមន្ត្រីរូបនេះ ថែមទាំងសន្យាចូលរួមផ្តួលលោក Najib ដែលជាមេបក្សកាន់អំណាចបច្ចុប្បន្ នក្នុងការបោះឆ្នោតនាឆ្នាំក្រោយផងដែរ។
« លោក Najib កំពុងតែបំផ្លាញប្រទេសម៉ាឡេស៊ីហើយ ជំរុញឲ្យមានការរើសអើងជាតិសាសន៍។ លោក Najib ក៏បានប្រព្រឹត្តបទល្មើសយ៉ាងធ្ងន់ធ្ងរទៀតផង»។ នេះ គឺជាការលើកឡើងរបស់អតីតនាយករដ្ឋមន្ត្រីម៉ាឡេស៊ី និងក៏ជាអតីតមេដឹកនាំស្នូលនៃបក្សកាន់អំណាចម៉ាឡេស៊ីបច្ចុ្បប្បន្ន លោក Mahathir ក្នុងកិច្ចសម្ភាសន៍ជាមួយសារព័ត៌មាន AFP ដែលចុះផ្សាយនៅថ្ងៃទី៧ ខែធ្នូ។
ក្នុងកិច្ចសម្ភាសន៍នោះ លោក Mahathir លើកឡើងថា ការទម្លាក់លោក Najib ចេញពីតំណែង ពិតជាសំខាន់ជាងអារម្មណ៍ និងបញ្ហាបុគ្គល ដែលលោក មានទៅទៀត។ លោក លើកឡើងបែបនេះ ដោយសំដៅទៅលើកការរួមដៃគ្នា រវាងរូបលោក ជាមួយមេបក្សប្រឆាំងដ៏មានឥទ្ធិពលម៉ាឡេស៊ី គឺលោក Anwar Ibrahim ដែលជាសត្រូវដ៏ធំរបស់លោក ក្នុងពេលដែលលោក Mahathir កាន់តំណែងជានាយករដ្ឋមន្ត្រីម៉ាឡេស៊ីនោះ។
លោក Mahathir ដែលមានអាយុ៩១ឆ្នាំហើយនោះ បានបន្តទៀតថា ប្រសិនបើទុកឲ្យលោកនាយករដ្ឋមន្ត្រី Najib បន្តដឹកនាំប្រទេស នោះស្ថានភាពនឹងកាន់តែអាក្រក់ជាងមុនទៅទៀត។ លោកបន្តពន្យល់តាមន័យសេដ្ឋកិច្ចថា ម៉ាឡេស៊ី នឹងជួបវិបត្តិតម្លៃទំនិញកើនឡើងខ្ពស់ ខណៈសេដ្ឋកិច្ចដើរយឺត។
ជុំវិញការបោះឆ្នោតសកលនៅឆ្នាំ២០១៨វិញ លោក Mahathir ជឿជាក់យ៉ាងខ្លាំងថា គណបក្សរបស់លោក ដែលបង្កើតឡើងដោយមានការចូលរួមសម្ព័ន្ធ ជាមួយនឹងបក្សប្រឆាំងនោះ នឹងឈ្នះការបោះឆ្នោត ដ្បិតលោក យល់ឃើញថា ប្រជាជនម៉ាឡេស៊ីភាគច្រើន មិនគាំទ្រការដឹកនាំដោយមេដឹកនាំពុករលួយបច្ចុប្បន្ននោះទេ។ លោក សង្កត់ធ្ងន់ថា ទាំងរូបលោក និងក្រុមបក្សប្រឆាំង សុទ្ធសឹងតែចាត់ទុកលោក Najib «ជាអ្នកបំផ្លាញប្រទេស» ហើយត្រូវតែផ្លាស់ប្តូរដែរ។ សម្រាប់លោក Mahathir លោក Najib អាចឈ្នះការបោះឆ្នោតទៅបាន លុះត្រាមានការបន្លំប៉ុណ្ណោះ។
សូមជម្រាបថា គិតចាប់ពីមានរបាយការណ៍ពុករលួយ នៃការប្រើប្រាស់ថវិកាសារធារណៈ ដើម្បីបម្រើផលប្រយោជន៍ឯកជន ដែលស្គាល់ថា «1MDB» របស់នាយករដ្ឋមន្ត្រីម៉ាឡេស៊ីនៅឆ្នាំ២០១៥មក មានបាតុកម្មជាបន្តបន្ទាប់ប្រឆាំងនឹងលោក Najib។ បាតុកម្មដែលភាគច្រើនធ្វើឡើងនៅថ្ងៃចុងសប្តាហ៍ក្នុងក្រុងកូឡាឡាំពួរនោះ ដឹកនាំដោយក្រុមអាវលឿង ឈ្មោះថា «Bersih» ហើយក៏មានការចូលរួមពីលោក Mahathir ផងដែរ។
អ្វីគួរកត់សម្គាល់នោះ ដោយយល់ឃើញពីប្រព័ន្ធដឹកនាំពុករលួយខ្លាំង លោក Mahathir អតីតនាយករដ្ឋម៉ាឡេស៊ី ដែលដឹកនាំប្រទេសយូរជាងគេ បានចូលដៃជាមួយមេដឹកនាំប្រឆាំង ដែលធ្លាប់តែជាសត្រូវនឹងគ្នា គឺលោក Anwar Ibrahimណ ដើម្បីផ្តួលបក្សកាន់អំណាចរបស់លោក Najib។
នៅដើមឆ្នាំ២០១៦កន្លងទៅ លោក Anwar Ibrahim បានថ្លែងទាំងនៅក្នុងពន្ធនាគារ ក្នុងការគាំទ្រជំហររបស់លោក Mahathir ដើម្បីទម្លាក់លោក Najib ចេញពីតំណែង។ ពេលនោះ លោក Anwar សង្កត់ធ្ងន់ថា វាដល់ពេលហើយ សម្រាប់ប្រជាជនម៉ាឡេស៊ី ក្រោកឈរទាំងអស់គ្នា និងទុករឿងគំនុំបុគ្គល ដើម្បីសង្គ្រោះប្រជាជាតិម៉ាឡេស៊ីនោះ។ នៅឆ្នាំ១៩៩៨ ក្នុងពេលដែលលោក Mahathir ជានាយករដ្ឋមន្ត្រី លោកបានបង្ខំឲ្យលោកឧបនាយករដ្ឋមន្ត្រី Anwar ចុះចេញពីតំណែង និងថែមទាំងកាត់ទោស ពីបទរួមភេទជាមួយមនុស្សប្រុសដូចគ្នា៕
© រក្សាសិទ្ធិដោយ thmeythmey.com