ជាតិ
ទិវាសិទ្ធិមនុស្ស៖ទូតអឺរ៉ុប បន្តជំរុញឲ្យអាជ្ញាធរស៊ើបរឿងសម្លាប់លោក កែម ឡី ដោយតម្លាភាព
× ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា លោក George Edgar នៅតែមានសង្ឃឹមថា ថ្ងៃណាមួយអាជ្ញាធរកម្ពុជា នឹងចាប់ជនល្មើសសម្លាប់លោក កែម ឡី មកផ្តន្ទាទោសឲ្យបាន។ ទន្ទឹមនឹងមានក្តីសង្ឃឹមលោក ក៏ជំរុញឲ្យអាជ្ញាធរបើកការស៊ើបអង្កេតករណីនេះ ដោយតម្លាភាពដែរ។
រឿងជនល្មើសបាញ់សម្លាប់លោក កែម ឡី មិនទាន់ត្រូវបានតុលាការរកមុខឃើញ ក៏ត្រូវបានលោកឯកអគ្គរដ្ឋទូតសហភាពអឺរ៉ុបប្រចាំកម្ពុជា George Edgar ឆ្លៀតលើកឡើងនៅក្នុងសន្និសីទសារព័ត៌មានក្នុងពិធីអបអរទិវាសិទ្ធិមនុស្សអន្តរជាតិ ១០ ធ្នូ កាលពីព្រលប់ថ្ងៃទី ០៩ ធ្នូ។ នៅស្ថានទូតសហភាពអឺរ៉ុបប្រចាំកម្ពុជា ក្បែរផ្ទះសម្តេចនាយករដ្ឋមន្ត្រី ហ៊ុន សែន លោក George Edgar លើកឡើងថា បញ្ហាឃាតកម្មលើលោក កែម ឡី សហភាពអឺរ៉ុបចង់ឃើញតម្លាភាពនៃការស៊ើបអង្កេតរបស់អាជ្ញាធរកម្ពុជា។ «ជាទូទៅយើងជំរុញឲ្យមានការស៊ើបអង្កេតមួយប្រកបដោយតម្លាភាព» ។ នេះជាការបញ្ជាក់របស់លោកមន្ត្រីទូតខាងលើ។
កន្លងផុត ៥ ខែ ហើយ ពោលគឺចាប់តាំងពីថ្ងៃទី ១០ ខែកក្កដា ដែលឃាតករបានបាញ់ប្រហារអ្នកវិភាគនយោបាយដ៏ល្បីលោក កែម ឡី នៅស្តាម៉ាត ក្បែរស្តុបបូកគោ រាជធានីភ្នំពេញ តែឃាតករពិតប្រាកដ តុលាការនៅមិនទាន់រកឃើញនោះឡើយ ក្រៅតែពីចាប់បានជនសង្ស័យម្នាក់ឈ្មោះ ជួប សម្លាប់ ប៉ុណ្ណោះ។ ជនសង្ស័យ ជួប សម្លាប់ ដែលមានស្រុកកំណើតនៅខេត្តសៀមរាប ត្រូវបានអាជ្ញាធរចាប់ខ្លួនភ្លាមៗនៅរាជធានីភ្នំពេញ ក្នុងថ្ងៃឃាតកម្មលើលោកកែម ឡី ។ កន្លងទៅ ភរិយាលោក កែម ឡី លោក ស្រី ប៊ូ រចនា ធ្លាប់និយាយថា លោកស្រីហាក់គ្មានសង្ឃឹមថា នឹងទទួលបានយុត្តិធម៌ជូនស្វាមីរបស់ខ្លួននោះ។
យ៉ាងណាងាកមកកាន់ប្រសាសន៍របស់លោក George Edgar ក្នុងទិវាសិទ្ធិមនុស្សបន្តទៀត លោកមន្ត្រីទូតរូបនេះ ក៏នៅតែមានសង្ឃឹមថា អាជ្ញាធរនឹងចាប់ជនល្មើលដែលសម្លាប់លោក កែម ឡី មកផ្តន្ទាទោសឲ្យបាន។ លោក បញ្ជាក់យ៉ាងនេះថា៖«យើងជឿជាក់ និងសង្ឃឹមថា នឹងមានការស៊ើបអង្កេតមួយឲ្យបានពេលញលេញ រកឃើញនូវអ្នកដែលប្រព្រឹត្តនូវអំពើល្មើស ហើយបញ្ជូនទៅតុលាការផ្តន្ទាទោសតាមផ្លូវច្បាប់»៕
Tag:
កែម ឡី
George Edgar
© រក្សាសិទ្ធិដោយ thmeythmey.com