ក្រុងប៉េកាំង បានចេញសារព្រមានខ្លាំងៗទៀតដល់ប្រធានាធិបតីជាប់ឆ្នោតអាមេរិក ដូណាល់ ត្រាំ ដែលបង្ហាញជំហរបោះបង់ «គោលនយោបាយចិនតែមួយ» ប្រសិនបើចិនមិនផ្ដល់សម្បទានអ្វីជាថ្នូរឲ្យអាមេរិកទេនោះ។ ប្រមុខការទូតចិន វ៉ាង យី បានផ្ញើសារឲ្យអាមេរិកក៏ដូចជាប្រទេសនានា ថា ការប្រឆាំងនយោបាយចិនតែមួយ នឹងមិនផ្ដល់ផលល្អឲ្យខ្លួនឡើយ។
រដ្ឋមន្ត្រីការបរទេសចិន បានបន្តប្រតិកម្មរបស់ខ្លួនលើការលើកឡើងរបស់ប្រធានាធិបតីអាមេរិក ដូណាល់ ត្រាំ ជុំវិញទំនាក់ទំនងជាមួយកោះតៃវ៉ាន់។ ចិន មិនសប្បាយចិត្តទាល់តែសោះចំពោះការប្រែប្រួលអាកប្បកិរិយារបស់ប្រធានាធិបតីអាមេរិក ដែលចង់ងាកទៅទំនាក់ទំនងជិតស្និទ្ធជាមួយតៃវ៉ាន់។ ចិន បានព្រមានថា អ្នកណាក៏ដោយហ៊ានប្រឆាំងចិនលើរឿងតៃវ៉ាន់ ប្រៀបដូចជាយកបញ្ហាដាក់ខ្លួនដូច្នោះដែរ។
ក្នុងដំណើរទស្សនកិច្ចនៅស្វីស រដ្ឋមន្ត្រីការបរទេសចិន វ៉ាង យី បានផ្ញើសារព្រមានប្រធានាធិបតីអាមេរិក ថា៖ «ប្រសិនបើលោក ត្រាំ មានចេតនាបំផ្លាញនយោបាយចិនតែមួយ ឬក៏ព្យាយាមបំផ្លាញផលប្រយោជន៍របស់ចិន វាមានន័យថាលោក ត្រាំ កំពុងទម្លាក់ដុំថ្មលើជើងរបស់ខ្លួនឯងអ៊ីចឹងដែរ»។ នេះបើយោងតាមការផ្សាយលើគេហទំព័រផ្លូវការរបស់ក្រសួងការបរទេសចិននៅថ្ងៃទី១២ ខែធ្នូ។
ប្រមុខការបរទេសចិនរូបនេះបន្ថែមថា ចិន កំពុងតាមដានការវិវត្តស្ថានការណ៍យ៉ាងយកចិត្តទុកដាក់ ក្រោយការសន្ទនាទូរសព្ទរវាងលោក ត្រាំ និងប្រធានាធិបតីតៃវ៉ាន់។ មិនតែប៉ុណ្ណោះ លោក វ៉ាង ក៏បានព្រមានបុគ្គលណា ឬកម្លាំងមកពីណាក៍ដោយ ដែលហ៊ានប្រលែងលេងជាមួយចិន។ ប៉ុន្តែគេមិនដឹងថា ចិននឹងធ្វើយ៉ាងណា បើមានអ្នកហ៊ានចេញមុខប្រឆាំងខ្លួននោះ។
ការអធិប្បាយព្រមានរបស់ប្រមុខការទូតចិនបែបនេះ ធ្វើឡើងក្រោយប្រធានាធិបតីជាប់ឆ្នោត ដូណាល់ ត្រាំ រដ្ឋបាលរបស់លោក អាចពិចារណាលើគោលនយោបាយចិនតែមួយ។
ប៉ុន្តែអ្នកនាំពាក្យក្រសួងការបរទេសចិនបានប្រាប់វិញថា ការប្រកាន់ខ្ជាប់«គោលនយោបាយចិនតែមួយ» គឺជាកត្តាដ៏សំខាន់សម្រាប់ការអភិវឌ្ឍចំណងអាមេរិក-ចិន។ តែបើនយោបាយនេះមិនត្រូវបានអនុវត្តទេ ស្ថិរភាពនៃការអភិវឌ្ឍនៃចំណងទ្វេភាគី និងកិច្ចសហប្រតិបត្តិការជាច្រើនវិស័យ ក៏នឹងត្រូវប៉ះពាល់យ៉ាងធ្ងន់ធ្ងរផងដែរ។
លោក Geng Shuang ជាអ្នកនាំពាក្យបានសង្កត់ធ្ងន់ថា៖ «ចិនទទូចឲ្យមេដឹកនាំ និងរដ្ឋាភិបាលអាមេរិកថ្មីទទួលស្គាល់យ៉ាងពេញលេញលើភាពរសើបនៃបញ្ហាតៃវ៉ាន់ បន្តរក្សាគោលជំហរចិនតែមួយ និងសេចក្តីថ្លែងការណ៍រួមគ្នារវាងចិន និងអាមេរិក...ដើម្បីធានាឲ្យបានពីភាពមិនប្រះឆានៃទំនាក់ទំនងប្រទេសទាំងពីរកាន់តែធ្ងន់ធ្ងរនោះ»។
សូមបញ្ជាក់ថា ក្រុងវ៉ាស៊ីនតោនបានសម្រេចបញ្ចប់ទំនាក់ទំនងការទូតផ្លូវការជាមួយតៃវ៉ាន់នៅឆ្នាំ ១៩៧៩ ហើយទទួលស្គាល់រដ្ឋាភិបាលក្រុងប៉េកាំងតែមួយស្ថិតក្រោមនយោបាយចិនតែមួយ។ ហើយបន្ទាប់ពីនោះអាមេរិក បានបន្តទំនាក់ទំនងមិនផ្លូវការជាមួយក្រុងតៃប៉ិកមកដល់បច្ចុប្បន្ន៕