កីឡាជាតិ
×![]()
ម្ចាស់ផ្ទះកម្ពុជាបានឈរចំណាត់ថ្នាក់លេខ១ក្នុងព្រឹត្តិការណ៍ប្រកួតកីឡាតេក្វាន់ដូ ITF ជ្រើសរើសជើងឯកអាស៊ីអាគ្នេយ៍លើកទី១(1st Junior & Senior Southeast Asian Taekwon-Do ITF Championship) ក្រោយដណ្តើមបានមេដាយសរុបចំនួន៥២(មាស៣១, ប្រាក់១០ និងសំរឹទ្ធ១១) ខណៈប្រទេសម៉ាឡេស៊ី និងវៀតណាមឈរលេខរៀងបន្តបន្ទាប់។
ក្រុមកីឡាករកីឡាការិនីតេក្វាន់ដូ ITF កម្ពុជាដណ្តើមបានមេដាយមាសចំនួន៣១, ប្រាក់១០ និងសំរឹទ្ធ១១ ក្រោយពីឆ្លងកាត់ការប្រកួតយ៉ាងស្វិតស្វាញអស់រយៈពេល៣ថ្ងៃនៅវិមានពហុកីឡដ្ឋានជាតិចាប់ពីថ្ងៃទី១២ ដល់ថ្ងៃទី១៤ ខែធ្នូ ឆ្នាំ២០១៦។ ការដណ្តើមបានមេដាយសរុបរហូតដល់៥១នេះ បានធ្វើឲ្យម្ចាស់ផ្ទះកម្ពុជាឈរចំណាត់ថ្នាក់លេខ១ក្នុងព្រឹត្តិការណ៍ប្រកួតកីឡាតេក្វាន់ដូ ITF ជ្រើសរើសជើងឯកអាស៊ីអាគ្នេយ៍លើកទី១។
ចំណែកក្រុមកីឡាករកីឡាការិនីម៉ាឡេស៊ីក្រោយដណ្តើមបានមេដាយមាស ៥ ប្រាក់១០ និងសំរឹទ្ធ១៨ បានធ្វើឲ្យប្រទេសម៉ាឡេស៊ីឈរចំណាត់លេខ២ ខណៈវៀតណាមឈរចំណាត់ថ្នាក់បន្ទាប់ ក្រោយដណ្តើមបានមេដាយមាស១ ប្រាក់១៤ និងសំរឹទ្ធ១៥។ រីឯប្រទេសសិង្ហបុរីឈរចំណាត់ថ្នាក់លេខ៤ ក្រោយដណ្តើមបានមេដាយមាស១ប្រាក់៣ និងសំរឹទ្ធ៦ ខណៈថៃក្រោយដណ្តើមបានមេដាយប្រាក់១ និងសំរឺទ្ធ៦ បានឈរចំណាត់ថ្នាក់លេខ៥។ ដោយឡែក ហ្វីលីពីន និងឥណ្ឌូនេស៊ីមិនទទួលបានមេដាយនោះឡើយ។
ជាមួយគ្នានេះ លោក បួន ហ៊ីងសុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF កម្ពុជាបានសម្តែងការភ្ញាក់ផ្អើលយ៉ាងខ្លាំង បន្ទាប់ពីក្រុមកីឡាករកីឡាការិនីតេក្វាន់ដូ ITF កម្ពុជាដណ្តើមបានមេដាយលើសពីការរំពឹងទុករបស់សហព័ន្ធ ពោលគឺសហព័ន្ធរំពឹងទទួលបានមេដាយមាសត្រឹមតែជាង១០មេដាយប៉ុណ្ណោះ ប៉ុន្តែជាក់ស្តែងកម្ពុជាដណ្តើមបានរហូតជាង៣០មេដាយមាស។
ទន្ទឹមនឹងនេះ កីឡាករកីឡាការិនីដែលជាបងប្អូនបង្កើតរួមមានកីឡាករ បាល់ ជីវ័ន្ត ដែលឈ្នះមេដាយមាស៤ និងកីឡាការិនី ប៉ាល់ ឆរស្មី ដែលឈ្នះមេដាយមាស៣ សុទ្ធតែបានបង្ហាញពីមោទកភាពរៀងៗខ្លួនសម្រាប់ការដណ្តើមបានមេដាយមាសលើសពីការរំពឹងទុក ក្នុងនាមជាម្ចាស់ផ្ទះនៃការប្រកួត។
កីឡាការិនី ប៉ាល់ ឆរស្មី បានរៀបរាប់យ៉ាងដូច្នេះថា៖«ខ្ញុំមានអារម្មណ៍សប្បាយខ្លាំងមែនទែន ព្រោះអីសម្រាប់តេក្វាន់ដូ ITF នេះខ្ញុំមិនដែលបានមេដាយមាសនោះទេ នេះជាលើកទី១ហើយដែលខ្ញុំបានមេដាយមាស ហើយអ្វីដែលសំខាន់បំផុតនោះគឺកម្ពុជាយើងធ្វើជាម្ចាស់ផ្ទះ។ លើសពីនេះសម្រាប់តេក្វាន់ដូ ITF ខ្ញុំធ្លាប់បានឈប់ហ្វឹកហាត់មួយរយៈពេលនេះខ្ញុំបានចូលរួមប្រកួតជាមួយសិស្សប្អូន និងសិស្សច្បងខ្ញុំមានអារម្មណ៍រំភើបមែនទែន»។
«ខ្ញុំមានអារម្មណ៍រំភើបសប្បាយរីករាយយ៉ាងខ្លាំង ធ្លាប់តែយើងទៅប្រកួតនៅក្រៅប្រទេសដណ្តើមបានមេដាយ ប៉ុន្តែលើកនេះយើងធ្វើជាម្ចាស់ផ្ទះលើកទី១ ហើយយើងដណ្តើមបានមេដាយទៀត មេដាយនេះរឹតតែធ្វើឲ្យខ្ញុំសប្បាយចិត្តជាងការប្រកួតនៅក្រៅប្រទេសទៀតបង»។ ជាការបញ្ជាក់របស់កីឡាករ ប៉ាល់ ជីវ័ន្ត។
ទាំងលោក បួន ហ៊ីងសុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF និងកីឡាករ ប៉ាល់ ជីវ័ន្ត សុទ្ធតែមានជំនឿចិត្តថា ប្រសិនបើប្រភេទកីឡាតេក្វាន់ដូ ITF កម្ពុជាបានចូលរួមប្រកួតក្នុងព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ ក្រុមកីឡាករតេក្វាន់ដូ ITF នឹងដណ្តើមបានមេដាយច្រើនជូនជាតិកម្ពុជា៕
Tag:
តេក្វាន់ដូ ITF
បួន ហ៊ីងសុធីយ៉ា
ITF ជើងឯកអាស៊ីអាគ្នេយ៍លើកទី១
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
