អន្តរជាតិ
ប្រមុខការទូតហ្វីលីពីន ប្រាប់អ្នករាយការណ៍ពិសេស UN ឲ្យសុំទោសហ្វីលីពីនជាសាធារណៈ រដ្ឋមន្ត្រីការបរទេសហ្វីលីពីន Perfecto Yasay
× រឿងរ៉ាវមិនចុះសម្រុងរវាងរដ្ឋបាលប្រធានាធិបតីហ្វីលីពីន Rodrigo Duterte និងអ្នករាយការណ៍ពិសេសអង្គការសហប្រជាជាតិ Agnes Callamard លើបញ្ហាសម្លាប់មនុស្សក្រៅប្រព័ន្ធតុលាការ កំពុងតែកើនកំដៅខ្លាំង។ ប្រមុខការទូត Perfecto Yasay បានប្រាប់មន្ត្រីអង្គការសហប្រជាជាតិឲ្យសុំទោសហ្វីលីពីន ក្រោយមន្ត្រីរូបនោះ បានអធិប្បាយលើប្រតិបត្តិការបង្ក្រាបគ្រឿងញៀនប៉ះពាល់ដល់កេរ្តិ៍ឈ្មោះហ្វីលីពីននោះ។
រដ្ឋមន្ត្រីការបរទេសហ្វីលីពីនលោក Perfecto Yasay បានស្នើចំៗទៅកាន់ លោកស្រី Agnes Callamard អ្នករាយការណ៍ពិសេសលើបញ្ហាសម្លាប់មនុស្សក្រៅប្រព័ន្ធតុលាការ ឲ្យសុំទោសហ្វីលីពីនជាសាធារណៈជុំវិញការសន្និដ្ឋានតាមអំពើចិត្តរបស់លោកស្រីលើយុទ្ធនាការបង្ក្រាបគ្រឿងញៀន។ លោក Yasay ថែមទាំងដាក់កំហុសលើការសន្និដ្ឋានរបស់មន្ត្រីអង្គការសហប្រជាជាតិរូបនោះ ដែលធ្វើឲ្យអាមេរិកកាត់ជំនួយខ្លួន ត្រូវផ្ដល់ឲ្យហ្វីលីពីនទៀតផង។
ក្នុងសន្និសីទកាសែតនៅថ្ងៃទី១៦ ខែធ្នូ លោក Yasay និយាយថា លោកស្រី Callamard ត្រូវតែសុំទោសលើកំហុសរបស់ខ្លួន ហើយលោកស្រី ក៏ត្រូវដកយកការសន្និដ្ឋានរបស់លោកស្រីទុកវិញដែរ និងត្រូវសារភាពប្រាប់សហគមន៍អន្តរជាតិ ព្រោះលោកស្រីធ្វើឲ្យប៉ះពាល់មុខមាត់របស់ហ្វីលីពីន។ លោកបន្តថា សេចក្ដីថ្លែងការណ៍សាធារណៈរបស់លោកស្រី ដែលស្នើឲ្យមានការការពារប្រជាជនពីការសម្លាប់ក្រៅប្រព័ន្ធតុលាការ បានបំផ្លាញកិត្តិយសយ៉ាងខ្លាំង។
«លោកស្រី Callamard បានបំផ្លាញមុខមាត់ហ្វីលីពីន។ ការលើកឡើងរបស់លោកស្រី អាចធ្វើឲ្យអ្នកដទៃសន្និដ្ឋានបានថា ការសម្លាប់មនុស្សក្រៅប្រព័ន្ធយុត្តិធម៌បានកើតឡើងលើទឹកដីហ្វីលីពីន។ ហើយគេក៏អាចគិតថា ការរំលោភបំពានសិទ្ធិមនុស្សដែលរដ្ឋាភិបាលនៅពីក្រោយ ក៏កំពុងកើតឡើងផងដែរ»។ នេះជាការបញ្ជាក់បន្ថែមរបស់ប្រមុខការទូតហ្វីលីពីន ដែលចេញផ្សាយដោយសារព័ត៌មាន Rappler ។
ទាក់ទិននឹងការអញ្ជើញលោកស្រី Callamard មកកាន់ហ្វីលីពីនដើម្បីស៊ើបអង្កេតលើករណីសម្លាប់មនុស្សក្រៅប្រព័ន្ធតុលាការ រដ្ឋមន្ត្រីការបរទេសរូបនេះអះអាងថា ហ្វីលីពីន មិនបានលុបចោលការអញ្ជើញឡើយ ហើយពេលនេះ មក ឬមិនមកជាសិទ្ធិរបស់លោកស្រី។ យ៉ាងណាក្ដី លោកស្រី Callamard ហាក់រារែកនឹងទស្សនកិច្ចនេះ ដ្បិតលោក Duterte ដាក់លក្ខខណ្ឌឲ្យលោកស្រីឆ្លើយនឹងសំណួររបស់លោកលើលទ្ធផលនៃការស៊ើបអង្កេតនេះ។
រដ្ឋមន្ត្រីការបរទេសហ្វីលីពីន អះអាងថា ក្នុងករណីដែលលោកស្រី មិនយល់ព្រមលើលក្ខខណ្ឌនេះ បញ្ហានឹងចប់ តែកុំនិយាយថា ហ្វីលីពីនជាអ្នកលុបចោលការអញ្ជើញឲ្យសោះ ពោលគឺ ការអញ្ជើញ គឺនៅតែមានដដែល។ លោកបន្តថា លោកស្រី Callamard អាចមានជម្រើសផ្សេងទៀត គឺលោកស្រីអាចចូលទឹកដីហ្វីលីពីនតាមរយៈអង្គការសហប្រជាជាតិ។ ប៉ុន្តែរដ្ឋាភិបាលហ្វីលីពីន នៅតែមានសិទ្ធិក្នុងការទទួល ឬមិនទទួលលោកស្រីបានដដែល៕
Tag:
ហ្វីលីពីន
UN
Perfecto Yasay
Agnes Callamard
© រក្សាសិទ្ធិដោយ thmeythmey.com