ថ្នាក់ដឹកនាំ និងគ្រូបង្វឹកកីឡាតេក្វាន់ដូ ITF សុទ្ធតែមានគំនិតសុទិដ្ឋិនិយមថា ប្រសិនបើប្រភេទកីឡាតេក្វាន់ដូ ITF អាចមានវត្តមានក្នុងព្រឹត្តិការណ៍ស៊ីហ្គេម(SEA Games)លើកទី៣២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ នឹងអាចដណ្តើមមេដាយបានច្រើនពីព្រឹត្តិការណ៍នេះជូនជាតិកម្ពុជា។ ការរំពឹងខ្ពស់បែបនេះ បន្ទាប់ពីតេក្វាន់ដូ ITF កម្ពុជាដណ្តើមបានមេដាយចំនួន៥២(មាស៣១,ប្រាក់១០,សំរឹទ្ធ១១) ពីការធ្វើម្ចាស់ផ្ទះជើងឯកអាស៊ីអាគ្នេយ៍។
ក្រោយពីដណ្តើមបានមេដាយមាស៣១ ប្រាក់១០ និងសំរឹទ្ធ១១ ពីការធ្វើម្ចាស់ផ្ទះការប្រកួតកីឡាករតេក្វាន់ដូ ITF ជ្រើសរើសជើងឯកអាស៊ីអាគ្នេយ៍លើកទី១(1st Junior & Senior Southeast Asian Taekwon-Do ITF Championship) ដែលបានបញ្ចប់កាលពីថ្ងៃទី១៤ ខែធ្នូ។ លទ្ធផលដ៏ធំធេងនេះ បានធ្វើឲ្យថ្នាក់ដឹកនាំ និងគ្រូបង្វឹកក៏ដូចជាកីឡាករមានជំនឿចិត្តថា ប្រសិនបើប្រភេទកីឡានេះអាចមានវត្តមានក្នុងព្រឹត្តិការណ៍ស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ កម្ពុជានឹងអាចទទួលបានមេដាយច្រើនពីប្រភេទកីឡាមួយនេះ។
ជាមួយគ្នានេះអគ្គលេខាធិការសហព័ន្ធកីឡាតេក្វាន់ដូ ITF កម្ពុជា លោក បួន ហ៊ីងសុធីយ៉ា បានបញ្ជាក់ថា ប្រសិនបើគណៈកម្មាធិការជាតិអូឡាំពិកកម្ពុជាដាក់ប្រភេទកីឡានេះក្នុងការប្រកួតស៊ីហ្គេម(SEA Games)លើកទី៣២ ដែលកម្ពុជាធ្វើជាម្ចាស់ផ្ទះ នោះកម្ពុជានឹងអាចមានឱកាសច្រើនក្នុងការទទួលមេដាយ។ ព្រោះបច្ចុប្ប ITF កម្ពុជាមានការត្រៀមខ្លួនបានយ៉ាងល្អ ជាពិសេសមានថ្នាលដែលពោរពេញទៅដោយសមត្ថភាព និងទេពកោសល្យ។
អគ្គលេខាធិការរូបនេះរៀបរាប់យ៉ាងដូច្នេះថា៖«ប្រសិនបើយើងមានឱកាសចូលក្នុងស៊ីហ្គេមមែន យើងអាចមានលទ្ធភាពច្រើនក្នុងការទទួលមេដាយ។ ហេតុផលទី១យើងបានរៀបចំបានល្អ មានថ្នាល មានអ្នកបន្តវេន ហើយកីឡាករកម្ពុជាយើងភាគច្រើនពោរពេញទៅដោយទេពកោសល្យ និងកាយសប្បទាល្អ។ យើងខ្វះតែឱកាសនោះទេ ប្រសិនគណៈកម្មាធិការជាតិអូឡាំពិកកម្ពុជាអាចបញ្ចូលយើងបាន យើងសន្យាថានឹងធ្វើឲ្យបានល្អក្នុងស៊ីហ្គេមឆ្នាំ២០២៣»។
មិនខុសគ្នាពីអគ្គលេខាធិការសហព័ន្ធកីឡាតេក្វាន់ដូ ITF កម្ពុជានោះឡើយ កីឡាករ ប៉ាល់ ជីវ័ន្ត និងជាគ្រូបង្វឹកផងនោះ ក៏បានបង្ហាញពីជំនឿចិត្តផងដែរថា ប្រសិនបើតេក្វាន់ដូ ITF បានចូលក្នុងការប្រកួតកីឡាស៊ីហ្គេម លោករំពឹងថា ក្រុមកីឡាករកម្ពុជានឹងធ្វើកាន់តែល្អជាងការធ្វើជាម្ចាស់ផ្ទះជើងឯកអាស៊ីអាគ្នេយ៍។ លើសពីនេះ កម្ពុជារំពឹងទទួលបានជោគជ័យច្រើនពីប្រភេទកីឡានេះ ព្រោះក្នុងតំបន់អាស៊ានមានតែវៀតណាម និងម៉ាឡេស៊ីប៉ុណ្ណោះដែលមានសមត្ថភាពប្រហាក់ប្រហែលកម្ពុជា។
«ប្រសិនបើកីឡានេះ(តេក្វាន់ដូ ITF)បានចូលក្នុងស៊ីហ្គេមវិញ ខ្ញុំជឿជាក់ថា យើងធ្វើរឹតតែល្អក្នុងព្រឹត្តិការណ៍ស៊ីហ្គេម(SEA Games) ព្រោះអីកីឡាយើងគ្រាន់តែធ្វើលើកនេះ(តេក្វាន់ដូ ITF ជើងឯកអាស៊ីអាគ្នេយ៍) យើងទទួលបានមេដាយច្រើន ប៉ុន្តែលើកក្រោយៗទៀតអាចនឹងផ្លាស់វេនទៅប្រទេសណាមួយ យើងនឹងចូលរួម ហើយយើងនឹងស្ទង់សមត្ថភាពយើង ថាតើយើងអាចទទួលបានមេដាយយ៉ាងណាក្នុងស៊ីហ្គេម»។ នេះជាសំដីរបស់ លោក ប៉ាល់ ជីវ័ន្ត អគ្គហេរញ្ញិករបស់សហព័ន្ធកីឡាតេក្វាន់ដូ ITF កម្ពុជា។
កត្តាដែលធ្វើឲ្យកីឡាករ ប៉ាល់ ជីវ័ន្ត ដែលជាគ្រូបង្វឹកកីឡាតេក្វាន់ដូ ITF មានជំនឿចិត្តខ្ពស់ក្នុងការទទួលបានមេដាយពីព្រឹត្តិការណ៍ស៊ីហ្គេមដោយសារកត្តាសមត្ថភាព និងបច្ចេកទេសរបស់ប្រទេសក្នុងតំបន់អាស៊ាន ដោយលោកបានរៀបរាប់ថា៖«បើយើងមើលពីបច្ចេកទេសនៅក្នុងតំបន់អាស៊ាន គឺមានតែពីរប្រទេសប៉ុណ្ណោះដែលយើងគិតថា អាចខ្លាំងត្រដំត្រសងជាមួយយើង គឺមានម៉ាឡេស៊ី និងវៀតណាម»។
បញ្ហាដែលធ្វើឲ្យរាំងស្ទះនៃការដាក់បញ្ចូលប្រភេទកីឡាតេក្វាន់ដូ ITF ក្នុងព្រឹត្តិការណ៍ស៊ីហ្គេមត្រូវបានលោក បួន ហ៊ីងសុធីយ៉ា បកស្រាយថា ដោយសារបណ្តាប្រទេសក្នុងតំបន់អាស៊ានមួយចំនួនមិនបានដាក់សំណើរសុំដល់គណៈកម្មាធិការជាតិអូឡាំពិករបស់ខ្លួន ម្យ៉ាងវិញទៀត ដោយសារមិនមានការប្រមូលផ្តុំនិងផ្សព្វផ្សាយឲ្យបានទូលំទូលាយ។
គួរបញ្ជាក់ថា កម្ពុជានឹងធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២ ឆ្នាំ២០២៣ ដោយគ្រោងនឹងដាក់កីឡាជាច្រើនប្រភេទឲ្យចូលរួមប្រកួតប្រជែង ប៉ុន្តែក្នុងនោះមិនទាន់មានប្រភេទកីឡាតេក្វាន់ដូ ITF នោះឡើយ។ ប៉ុន្តែបច្ចុប្បន្នសហព័ន្ធកីឡាតេក្វាន់ដូ ITF កម្ពុជាបាននិងកំពុងស្វះស្វែងធ្វើយ៉ាងណាឲ្យប្រភេទកីឡានេះបានចូលរួមក្នុងព្រឹត្តិការណ៍ខាងលើនេះ៕