លោក អេង ឆៃអ៊ាង នឹងកោះហៅសម្ដេច ស ខេង សាកសួរករណីលោក កែម ឡី នៅខែក្រោយ

ជាតិ

នយោបាយជាតិ

លោក អេង ឆៃអ៊ាង នឹងកោះហៅសម្ដេច ស ខេង សាកសួរករណីលោក កែម ឡី នៅខែក្រោយ

20, Dec 2016 , 11:56 am

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេតនិងទំនាក់ទំនងរដ្ឋសភា ព្រឹទ្ធសភា លោក អេង ឆៃអ៊ាង នឹងកោះហៅរដ្ឋមន្ត្រីក្រសួងមហាផ្ទៃសម្ដេច ស ខេង មកសាកសួរព័ត៌មានបន្ថែមជុំវិញករណីលោក កែម ឡី នៅថ្ងៃទី១២ មករា ខាងមុខនេះ។

បើទោះជាស្ថានភាពនយោបាយមានភាពធូរស្រាលហើយក្តី ប៉ុន្តែគណបក្សសង្គ្រោះជាតិនៅតែរក្សាជំហបន្តយុទ្ធនាការជួយរកយុត្តិធម៌ជូនលោក កែម ឡី ដែលត្រូវបានឃាតករបាញ់សម្លាប់កាលពីថ្ងៃទី១០ កក្កដាកន្លងមក។ មន្ត្រីជាន់ខ្ពស់គណបក្សសង្គ្រោះជាតិលោក អេង ឆៃអ៊ាង អះអាងថា គណៈកម្មការទី១បានសម្រេចកោះអញ្ជើញរដ្ឋមន្ត្រីក្រសួងមហាផ្ទៃសម្ដេច ស ខេង មកសួរនាំពីដំណើរការស៊ើបអង្កេតអ្នកនៅពីក្រោយខ្នង នៃករណីបាញ់សម្លាប់លោក កែម ឡី នៅខែក្រោយនេះ ដើម្បីសិក្សាវាយតម្លៃលើលទ្ធផល ដែលសមត្ថកិច្ចបាននិងកំពុងអនុវត្ត ។

ថ្លែងប្រាប់សារព័ត៌មានថ្មីៗ មន្ត្រីជាន់ខ្ពស់គណបក្សសង្គ្រោះជាតិរូបនេះ បានបញ្ជាក់ថា៖ អ្វីដែលសំខាន់នោះយើងចង់ឲ្យសមត្ថកិច្ចពាក់ព័ន្ធត្រូវតែប្រាប់មករដ្ឋសភា អំពីលទ្ធផលជាក់ស្ដែង ការជួបការលំបាកយ៉ាងម៉េច ការងារស្រួលយ៉ាងម៉េច ព្រោះរឿងមួយចំនួនគ្មានអ្វីត្រូវលាក់បាំង គ្មានអាថកំបាំងទេ ព្រោះរដ្ឋសភាជាអ្នកតំណាងឲ្យប្រជាជាតិ។ ដូច្នេះអ្វីដែលរដ្ឋសភាចង់ដឹង គឺខាងនីតិប្រតិបត្តិដែលជាសមត្ថកិច្ចក្នុងការអនុវត្តនេះត្រូវតែផ្ដល់ជូនរដ្ឋសភា»។

បើតាមលោក អេង ឆៃអ៊ាង គណកម្មការទី១ នឹងដាក់លិខិតទៅសម្ដេចនាយករដ្ឋមន្ត្រី ហ៊ុន សែន តាមរយៈប្រធានរដ្ឋសភា សម្ដេច ហេង សំរិន នៅក្នុងសប្ដាហ៍នេះ ដើម្បីស្នើសុំអញ្ជើញរដ្ឋមន្ត្រីក្រសួងមហាផ្ទៃ សម្ដេច ស ខេង មកបំភ្លឺនៅក្នុងរដ្ឋសភា។

អ្នកស្រាវជ្រាវ និងជាអ្នវិភាគ លោក កែម ឡី ត្រូវបានឃាតករបាញ់សម្លាប់កាលពីថ្ងៃទី១០ កក្កដា ឆ្នាំ២០១៦ នៅក្នុងស្តាម៉ាតមួយ នាស្ថានីយ៍សាំងកាល់តិច Caltex ក្បែរស្តុបបូកគោ ក្នុងរាជធានីភ្នំពេញ ។ ភ្លាមៗក្រោយឃាតកម្មទៅលើលោក កែម ឡី សមត្ថកិច្ចបានចាប់ខ្លួនឃាតករ ដែលបានអះអាងថាឈ្មោះ ជួប សម្លាប់។ ប៉ុន្តែ ជាង៥ខែហើយ ដែលគ្រួសារសពលោក កែម ឡី នៅតែទាមទាឲ្យសមត្ថកិច្ចជួយរកយុត្តិធម៌ជូន លោក កែម ឡី ព្រមទាំងបញ្ចេញវីដេអូពីកាមេរ៉ាសន្តិសុខរបស់ហាងសាំងកាល់តិចនោះផង។

អ្នកនាំពាក្យក្រសួងមហាផ្ទៃ លោក ខៀវ សុភ័គ បានបញ្ជាក់ថា សមត្ថកិច្ចបានបន្តស៊ើបអង្កេតករណីឃាតកម្មលើលោក កែម ឡី នេះ ដែរ ប៉ុន្តែមិនមានតម្រុយអ្វីច្បាស់លាស់ឡើយ ហើយសំណុំរឿងបាញ់សម្លាប់នេះ ក៏បានបញ្ជូនទៅតុលាការអស់ដែរ ។ ថ្លែងប្រាប់សារព័ត៌មានថ្មីៗ លោក ខៀវ សុភ័គ និយាយថា៖ «ជនជាប់ចោទបានសារភាពហើយ សមត្ថកិច្ចបានបន្តស្រាវជ្រាវបន្ថែមទៀត តែគ្មានពន្លឺអ្វីទេ។ ចំណែកភស្តុតាង និងវីដេអូ យើងក៏បានបញ្ជូនទៅតុលាការដែរ តែយើងមិនអាចបង្ហាញជាសាធារណៈបានទេ។ តែបើចង់បញ្ចាំងវីដេអូឃាតកម្មជាសាធារណៈនោះ ទាល់តែគ្រួសារជនរងគ្រោះយល់ព្រម។ ហើយបើសិនជាគ្រួសារជនរងគ្រោះមិនអស់ចិត្ត ពួកគេអាចទៅជាមួយមេធាវីពួកគេ សុំមើលវីដេអូឃាតកម្មនោះ នៅក្នុងតុលាការបាន»៕