កីឡាជាតិ
ជាតិ
កីឡាករ សុខ ចាន់មាន បន្តឈ្នះមេដាយមាសជើងឯកអាស៊ីនៅមីយ៉ាន់ម៉ា រូបភាពពី៖ ហ្វេសប៊ុកអគ្គនាយកដ្ឋានកីឡា
× ម្ចាស់មេដាយមាសពិភពលោកឆ្នាំ២០១៦ សុខ ចាន់មាន បានបន្តបង្ហាញភាពខ្លាំងរបស់ខ្លួនតាមរយៈការឈ្នះមេដាយមាសពីព្រឹត្តិការណ៍ប្រកួតកីឡាប៉េតង់ជ្រើសរើសជើងឯកអាស៊ីលើកទី២០(20th Asian Petanque Championship 2016) នៅប្រទេសមីយ៉ាន់ម៉ា។ ក្រៅពីមេដាយមាសរបស់ ចាន់មាន កម្ពុជាទទួលបានមេដាយប្រាក់២ និងសំរឹទ្ធ៣ ទៀតផង។
ម្ចាស់មេដាយមាសពិភពលោកឆ្នាំ២០១៦នៅប្រទេសម៉ាដាហ្កាស្កា សុខ ចាន់មាន ឈ្នះមេដាយមាស១ ពីព្រឹតិ្តការណ៍ប្រកួតកីឡាប៉េតង់ជ្រើសរើសជើងឯកអាស៊ីលើកទី២០នៅប្រទេសមីយ៉ាន់ម៉ា ក្រោយពីយកឈ្នះកីឡាករថៃនៅវគ្គផ្តាច់ព្រ័ត្រ។ មេដាយមាសកម្រិតអាស៊ីរបស់ ចាន់មាន មានន័យថា កីឡាកររូបនេះនៅតែបន្តបង្ហាញភាពខ្លាំងរបស់ខ្លួនលើវិញ្ញាសាវាយយកពិន្ទុ ដែលខ្លួនបានឈ្នះមេដាយមាសពិភពលោកកាលពីពេលថ្មីៗដដែល។
ក្រៅពីមេដាយមាសរបស់ ចាន់មាន អត្តពលិកកម្ពុជាក៏ទទួលបានមេដាយប្រាក់២ និងសំរឹទ្ធ៣ផងដែរ ក្នុងនោះមេដាយប្រាក់សម្រេចដោយកីឡាករ ឃួន លីហ៊ លើវិញ្ញាសាវាយយកពិន្ទុផ្នែកយុវជនចំនួន១ និងវិញ្ញាសា៣នាក់ទល់៣នាក់ផ្នែកយុវជនចំនួន១។ ចំណែកមេដាយសំរឹទ្ធរកបានដោយកីឡាការិនី កែ ឡេង លើវិញ្ញាសាវាយយកពិន្ទុ១, វិញ្ញាសា៣នាក់ទល់៣នាក់បុរសចំនួន១ និង៣នាក់ទល់៣នាក់នារីចំនួន១។
បើយោងតាមលោក អ៊ឹម ផាត គ្រូបង្វឹកផ្នែកបុរសដែលដឹកនាំក្រុមកីឡាករចូលរួមប្រកួតព្រឹត្តិការណ៍ខាងលើ មេដាយមាស១ ប្រាក់២ និងសំរឹទ្ធ៣ បានធ្វើឲ្យកម្ពុជាឈរចំណាត់ថ្នាក់លេខ២ក្នុងចំណោម១១ប្រទេសដែលចូលរួម ខណៈថៃឈរចំណាត់ថ្នាក់លេខ១៕
Tag:
ប៉េតង់
សុខ ចាន់មាន
កែ ឡេង
© រក្សាសិទ្ធិដោយ thmeythmey.com