កីឡា៩ប្រភេទនឹងបង្ហាញខ្លួននៅក្នុងបុណ្យសមុទ្រខេត្តព្រះសីហនុឆ្នាំនេះ

កីឡាជាតិ

ជាតិ

កីឡា៩ប្រភេទនឹងបង្ហាញខ្លួននៅក្នុងបុណ្យសមុទ្រខេត្តព្រះសីហនុឆ្នាំនេះ

21, Dec 2016 , 11:34 am

រូបភាព

ការសម្តែងក្បាច់គុនល្បុក្កតោ នាពិធីបុណ្យសមុទ្រឆ្នាំ២០១៥នៅកំពត។ រូបថត មុំ ពិទូរ្យ

ដោយ:

កីឡាវប្បធម៌ និងកម្សាន្តចំនួន៩ប្រភេទត្រូវបានគណៈកម្មាធិការជាតិអូឡាំពិកកម្ពុជា(NOCC)ដាក់ឲ្យចូលរួមប្រកួតប្រជែងរយៈពេល៣ចាប់ពីថ្ងៃទី២៣ ដល់ថ្ងៃទី២៥ ខែធ្នូ នៅក្នុងពិធីបុណ្យសមុទ្រខេត្តព្រះសីហនុប្រចាំឆ្នាំ២០១៦។ កីឡាទាំង៩ប្រភេទនេះនឹងធ្វើការប្រកួតប្រជែងទៅតាមពេលវេលា និងទីតាំងឆ្នេរផ្សេងៗគ្នា។

ពិធីបុណ្យសមុទ្រដែលជាព្រឹត្តិការណ៍ប្រចាំឆ្នាំដែលមានលក្ខណៈបែបទេសចរណ៍នឹងប្រារព្ធធ្វើឡើងនៅខេត្តព្រះសីហនុរយៈពេល៣ថ្ងៃចាប់ពីថ្ងៃទី២៣-២៥ ខែធ្នូ ឆ្នាំ២០១៦។ ក្នុងពិធីបុណ្យសមុទ្រលើកទី៥នៅឆ្នាំនេះគណៈកម្មការរៀបចំពិធីបុណ្យនេះបានសម្រេចដាក់កីឡាប្រពៃណី និងកម្សាន្តចំនួន៩ប្រភេទឲ្យចូលរួមប្រកួតប្រជែង ដើម្បីឲ្យភ្ញៀវទេសជាតិ និងអន្តរជាតិទស្សនាកម្សាន្ត ក៏ដូចជាចូលរួមប្រកួតប្រជែងផងដែរ។

កីឡាទាំង៩ប្រភេទនោះរួមមាន រត់ប្រណាំង(៥-១០គីឡូម៉ែត្រ), បាល់ទះឆ្នេរខ្សាច់, បាល់ទាត់ឆ្នេរខ្សាច់, ប្រណាំងកង់វិលជុំ(១០-៤០គីឡូម៉ែត្រ), ប្រណាំងម៉ូតួទឹក, ទូកក្តោង, កីឡាហោះហើរ, ប្រដាល់គុនខ្មែរ(ប្រដាល់សេរី, ល្បុក្កតោ) និងកីឡាសម្តែង(ល្បុក្កតោ,ចំបាប់, តេក្វាន់ដូ WTF, Jui Jitsu)។

កីឡាបែបប្រពៃណី និងកម្សាន្តទាំង៩ប្រភេទនេះនឹងធ្វើការប្រកួតប្រជែងទៅតាមពេលវេលា និងទីតាំងផ្សេងៗគ្នា ក្នុងនោះ បាល់ទះឆ្នេរខ្សាច់, បាល់ទាត់ឆ្នេរខ្សាច់ និងកីឡាហោះហើរ ធ្វើនៅឆ្នេរអូឈើទាល។ រីឯរត់ប្រណាំង និងប្រណាំងកង់ ធ្វើនៅឆ្នេរអូឈើទាលមុខមណ្ឌលព័ត៌មានទេសចរណ៍ ខណៈការប្រណាំងម៉ូតូទឹក, ទូកក្តោង និងប្រដាល់គុនខ្មែរធ្វើនៅឆ្នេរឯករាជ។

ចំណែកកីឡាសម្តែងរួមមានល្បុក្កតោ ចំបាប់ តេក្វាន់ដូ WTF និងកីឡា Jui Jitsu ធ្វើឡើងនៅលើទីលានពីរផ្សេងគ្នាគឺឆ្នេរឯករាជ្យ និងឆ្នេរអូឈើទាល។ ក្រៅពីការប្រកួត និងសម្តែងកីឡាទាំង៩ប្រភេទនេះ ក៏មានការដង្ហែក្បួនព្យុហយាត្រាផែនកីឡា ល្បុក្កតោ ចំបាប់ ប្រដាល់គុនខ្មែរ បាល់ទាត់ បាល់ទះ Skate Board ប្រណាំងកង់ និងកីឡាទូកក្តោង ផងដែរ៕