អន្តរជាតិ
ជប៉ុន បង្កើនថវិកាការពារជាតិដើម្បីទប់ទល់ឥទ្ធិពលចិននិងការគំរាមពីកូរ៉េខាងជើង
× រដ្ឋាភិបាលលោកនាយករដ្ឋមន្ត្រី ស៊ិនហ្សូ អាបេ បានសម្រេចបង្កើនការចំណាយយ៉ាងច្រើនសន្ធឹកសន្ធាប់លើវិស័យការពារជាតិ ក្នុងគោលដៅទប់ទល់ឥទ្ធិពលរបស់ចិន និងការពារខ្លួនពីការគំរាមកំហែងពីសំណាក់កូរ៉េខាងជើង។ ការបង្កើនការចំណាយនេះ ជាផ្នែកមួយនៃ ថវិកាចំណាយប្រចាំឆ្នាំ២០១៧ ដែលត្រូវបានបង្កើនក្នុងចំនូនដល់ទៅ៩៧,៤៥ទ្រីលានយ៉េន ហើយវាក៏ជាការចំណាយប្រចាំឆ្នាំកម្រិតខ្ពស់បំផុតមិនធ្លាប់មានពីមុនផងដែរ។
គណៈរដ្ឋមន្ត្រីរបស់លោក ស៊ិនហ្សូ អាបេ បានអនុម័តថវិកាចំណាយលើវិស័យការពារជាតិប្រចាំឆ្នាំ២០១៧ ដែលត្រូវបានបង្កើនចំនួន១,៤ភាគរយ ប្រៀបធៀបនឹងការចំណាយក្នុងឆ្នាំ២០១៦ ។ ជាផ្នែកមួយនៃការបង្កើនថវិកាជាតិប្រចាំឆ្នាំ វិស័យការពារជាតិ នឹងទទួលបានទឹកប្រាក់យ៉ាងសន្ធឹកសន្ធាប់ដល់ទៅ៥,១៣ទ្រីលានយ៉េន ដែលស្មើនឹង៤៣,៦៦ពាន់លានដុល្លារ និងត្រូវប្រើសម្រាប់ពង្រឹងសមត្ថភាពយោធា ដើម្បីទប់ទល់ការគំរាមកំហែងពីក្រៅ។
ផែនការចំណាយយ៉ាងច្រើននេះ នឹងត្រូវបញ្ជូនទៅកាន់សភាអនុម័តសិន មុននឹងយកមកអនុវត្ត។ យ៉ាងណាក្ដី គេរំពឹងថា សភាជប៉ុន ដែលគ្រប់គ្រងដោយគណបក្សប្រជាធិបតេយ្យសេរីរបស់នាយករដ្ឋមន្ត្រី អាបេ ប្រាកដជាយល់ព្រមលើផែនការចំណាយប្រចាំឆ្នាំនេះ។ ហើយក្នុងករណីត្រូវបានអនុម័តមែន វាគឺជាឆ្នាំទី៥ ដែលការចំណាយលើវិស័យការពារជាតិត្រូវបានបង្កើន។
ច្បាស់ណាស់ថា ការកើនឡើងថវិកាការពារជាតិជាច្រើនឆ្នាំជាប់គ្នាបែបនេះ គឺដើម្បីទប់ទល់ការគំរាមពីសំណាក់ចិន និងកូរ៉េខាងជើង ដែលកំពុងពង្រឹងសមត្ថភាពយោធារៀងៗខ្លួននាពេលចុងក្រោយនេះ។ ក្រុងតូក្យូ ត្រូវប្រឈមុខនឹងអាកប្បកិរិយាកោងកាចរបស់ក្រុងប៉េកាំងនៅសមុទ្រចិនខាងកើត ជាទីដែលគូប្រជែងទាំងពីរមានជម្លោះដែនកោះនឹងគ្នាមិនដាច់ស្រេច។
មិនតែប៉ុណ្ណោះ ជប៉ុន ក៏ត្រូវពង្រឹងប្រព័ន្ធការពារមីស៊ីលរបស់ខ្លួនឲ្យកាន់តែមានប្រសិទ្ធភាព ដើម្បីទប់ទល់ការវាយប្រហារណាមួយរបស់កូរ៉េខាងជើងផងដែរ។ ចុងក្រោយនេះ កូរ៉េខាងជើង បានសាកល្បងមីស៊ីលជាច្រើនលើកដែលរួមទាំងមីស៊ីលចម្ងាយឆ្ងាយមានសមត្ថភាពវាយប្រហារគោលដៅជប៉ុនទៀតផង។ ដូច្នេះ ជប៉ុនត្រូវត្រៀមខ្លួនទុកមុន ជាពិសេសការពង្រឹងប្រព័ន្ធការពារមីស៊ីលបាលីស្ទិកតែម្ដង។
ចាប់តាំងពីចូលកាន់តំណែងក្នុងឆ្នាំ២០១២មក នាយករដ្ឋមន្ត្រី ស៊ិនហ្សូ អាបេ បានសម្រេចបង្កើនការចំណាយលើវិស័យការពារជាតិរៀងរាល់ឆ្នាំ។ លោកហាក់ផ្ដោតខ្លាំងលើវិស័យនេះ ខណៈការគំរាមកំហែងពីខាងក្រៅក៏កើនឡើងផងដែរ។ មិនត្រឹមតែបង្កើនលុយចំណាយឡើយ លោកថែមទាំងចង់កែរដ្ឋធម្មនុញ្ញសន្តិភាពដែលបើកផ្លូវឲ្យកងស្វ័យការពារជប៉ុន ចេញក្រៅប្រទេសក្នុងប្រតិបត្តិការប្រយុទ្ធទៀតផង៕
Tag:
ជប៉ុន
ចិន
កូរ៉េខាងជើង
© រក្សាសិទ្ធិដោយ thmeythmey.com