អន្តរជាតិ
លោក Duterte ប្រកាសបិទក្រុមហ៊ុនល្បែងអនឡាញទូទាំងប្រទេស
× ប្រធានាធិបតីហ្វីលីពីន Rodrigo Duterte បានប្រកាសបិទចោលល្បែងអនឡាញទាំងអស់ ដែលកំពុងដំណើរការនៅលើទឹកដីហ្វីលីពីន ដោយលោកអះអាងថា អាជ្ញាធរមិនអាចគ្រប់គ្រងឧស្សាហកម្មស៊ីសងនេះបានឡើយ។ នៅមុនការប្រកាសនេះ លោក Duterte ធ្លាប់បង្ហាញជំហរទុកឱកាសឲ្យក្រុមហ៊ុនល្បែងស៊ីសង បន្តការរកស៊ីរបស់ខ្លួន តែចុងក្រោយលោកបែរជាប្រកាសបិទទៅវិញ។
«ខ្ញុំបញ្ជាឲ្យបិទល្បែងអនឡាញទាំងអស់។ បិទទាំងអស់។ វាគ្មានបានការអ្វីឡើយ»។ នេះជាការប្រកាសរបស់ប្រធានាធិបតី Rodrigo Duterte ទាក់ទងនឹងឧស្សាហកម្មល្បែងអនឡាញលើទឹកដីហ្វីលីពីន អំឡុងពេលចុះហត្ថលេខាលើផែនការចំណាយប្រចាំឆ្នាំ២០១៧ នៅថ្ងៃទី២២ ខែធ្នូ។ បើទោះជាលោកមិនផ្ដល់ព័ត៌មានលម្អិត គេអាចយល់ថា លោកចង់សំដៅលើការបិទក្រុមហ៊ុនអនឡាញតែម្ដង។
គេអាចចាំបានថា អំឡុងពេលស្បថចូលកាន់តំណែងក្នុងខែឧសភា ប្រធានាធិបតី Duterte ធ្លាប់ប្រកាសថា លោកនឹងបញ្ចប់ការរកស៊ីល្បែងអនឡាញលើទឹកដីហ្វីលីពីន។ ការប្រកាសគ្រានោះ ធ្វើឲ្យក្រុមហ៊ុនរកស៊ីរបរនេះ ព្រួយបារម្ភយ៉ាងខ្លាំង ហើយចំណូលក៏ធ្លាក់ចុះផងដែរ។ មិនយូរប៉ុន្មានក្រោយការប្រកាសក្ដែងៗនេះ លោកបែរជាចង់រក្សាឧស្សាហកម្មនេះទៅវិញ ប្រសិនពួកគេបង់ពន្ធត្រឹមត្រូវ និងមិនបើកការរកស៊ីនៅក្បែរសាលារៀន ឬវិហារនោះ។
យ៉ាងណាក្ដី លោក Duterte មិនបានចោលទម្លាប់ប្រែក្រឡាស់សម្ដីឡើយ។ ប្រធានាធិបតីរូបនេះ ក៏បានប្រកាសបិទអាជីវកម្មល្បែងអនឡាញ ដ្បិតអ្នកជំនួញវិស័យនេះរកស៊ីមិនស្មោះត្រង់។ លោកបានលើកយកករណីអ្នកជំនួញឈ្មោះ Jack Lam មានមូលដ្ឋាននៅម៉ាកាវ ដែលអាជ្ញាធរកំពុងតាមរកចាប់ខ្លួន ក្រោយត្រូវបានចោទថាព្យាយាមសូកប៉ាន់រដ្ឋមន្ត្រីយុត្តិធម៌ Vitaliano Aguirre II ។
យោងតាមសារព័ត៌មាន Rappler លោក Duterte បញ្ជាក់ថា រដ្ឋាភិបាលគ្មានយន្តការអ្វីត្រួតពិនិត្យលើឧស្សាហកម្មនេះឡើយ ដូច្នេះហើយបានជាលោកបញ្ជាឲ្យបិទតែម្ដង។ លោកក៏បានដាក់កំហុសលើកម្សោយរបស់អាជ្ញាធរហ្វីលីពីនទទួលបន្ទុកលើការងារនេះផងដែរ ព្រោះពួកគេមិនអាចដោះស្រាយបញ្ហាបាន។
សូមបញ្ជាក់ថា ឧស្សាហកម្មល្បែងអនឡាញរបស់ហ្វីលីពីន គឺជាវិស័យដែលទាក់ទាញអ្នកជំនួញបានយ៉ាងច្រើនក្នុងពេលទសវត្សរ៍ចុងក្រោយនេះ ដោយបានបណ្ដាក់ទុនរកស៊ីយ៉ាងសន្ធឹកសន្ធាប់។ ក្រុមហ៊ុនល្បែងអនឡាញបរទេសជាច្រើន បានសម្រុកមកបើករីសតកំសាន្តដែលរួមទាំងកន្លែងលេងល្បែងអនឡាញផងដែរ។ ដោយសាររឿងនេះ ការបិទអាជីវកម្មល្បែងអនឡាញ នឹងប៉ះពាល់ចំណូលប្រចាំឆ្នាំចំនួន១០លានពឺសូមិនខាន៕
Tag:
ហ្វីលីពីន
Rodrigo Duterte
© រក្សាសិទ្ធិដោយ thmeythmey.com