អន្តរជាតិ
លោក ត្រាំ នៅតែចិញ្ចឹមចិត្តហាមឃាត់ប្រជាជនម៉ូស្លីមមិនឲ្យចូលអាមេរិក
× លោក ដូណាល់ ត្រាំ លើកឡើងជាថ្មីពាក់ព័ន្ធគោលនយោបាយហាមឃាត់ប្រជាជនឥស្លាមមិនឲ្យចូលក្នុងទឹកដីអាមេរិកដើម្បីរក្សាសន្តិសុខនោះ។ប៉ុន្តែក្រុមការងារលោកបកស្រាយថា វាមិនមែនជាការហាមប្រាមពេញលេញទេ ព្រោះវិធានការនេះអនុវត្តចំពោះជនអន្តោប្រវេសន៍មកពីតំបន់ដែលមានចលនាភេរវកម្មប៉ុណ្ណោះ។
ក្រោយផ្អាកនិយាយពីគោលនយោបាយហាមប្រាមប្រជាជនម៉ូស្លីមមិនឲ្យចូលក្នុងទឹកដីអាមេរិកចាប់តាំងពីថ្ងៃបោះឆ្នោត ៨វិច្ឆិកា ប្រធានាធិបតីទើបជាប់ឆ្នោតលោក ដូណាល់ ត្រាំ បញ្ជាក់ជាថ្មីថា រដ្ឋបាលលោកនឹងបន្តគោលនយោបាយនេះ។ ការបញ្ជាក់ជាថ្មីនេះធ្វើឲ្យមានការបារម្ភ និងការរិះគន់ផងដែរក្នុងចំណោមសាធារណជនទូទៅ។
យោងតាមសារព័ត៌មាន Politico គោលនយោបាយចម្រូងចម្រាសនេះត្រូវបានលោក ដូណាល់ ត្រាំលើកឡើងជាថ្មីនៅ Mar-a-Lago នៅរដ្ឋ Florida។ ពេលអ្នកសារព័ត៌មានសួរថា លោកនឹងអនុវត្តគោលនយោបាយតឹងរ៉ឹងចំពោះចំពោះប្រជាជនម៉ូស្លីមឬអត់ក្រោយការវាយប្រហារនៅក្រុងប៊ែកឡាំង លោក ដូណាល់ ត្រាំ បានតបវិញទាំងស្រពិចស្រពិលថា៖ «អ្នកបានដឹងពីគោលនយោបាយខ្ញុំហើយ។ តាំងពីដើមមក អ្វីដែលខ្ញុំលើកឡើងត្រឹមត្រូវ។ ១០០ភាគរយគឺត្រឹមត្រូវ»។
យ៉ាងណាក៏ដោយ ចម្លើយរបស់លោក ដូណាល់ ត្រាំនៅតែស្រពិចស្រពិល ហើយវាត្រូវបានគេបកស្រាយផ្សេងៗគ្នាផងដែរ។ ប៉ុន្តែគេវាយតម្លៃថា លោកចង់ប្រាប់ប្រជាជនអាមេរិកថាលោកព្យាយាមធ្វើតាមអ្វីដែលលោកបានសន្យាកន្លងមក។
ពាក់ព័ន្ធសម្តីលោក ដូណាល់ ត្រាំ លោកស្រី Kellyanne Conway អតីតប្រធានក្រុមឃោសនានយោបាយ និងទីប្រឹក្សាប្រធានាធិបតីបានពន្យល់ថា វានឹងមានការហាមឃាត់ដូច្នេះមែន ប៉ុន្តែវាមិនមែនជាការហាមឃាត់រាល់ប្រជាជនម៉ូស្លីមឡើយ។ វិធានការនេះនឹងត្រូវអនុវត្តចំពោះបណ្តាជនអន្តោប្រវេសន៍ទាំងឡាយណាដែលមកពីតំបន់ឬប្រទេសទាំងឡាយណាដែលមានចលនាភេរវកម្មកើតឡើងជាដើមប៉ុណ្ណោះ។
តាំងពីពេលឃោសនា លោក ដូណាល់ ត្រាំ បានយកបញ្ហាសាសនាឥស្លាមមកធ្វើជាប្រធានបទក្នុងការជជែកដេញដោលក្នុងបក្សនិងផ្តល់បទសម្ភាសន៍ដល់ក្រុមអ្នកសារព័ត៌មានជាច្រើនដងផងដែរ។ ដូចបានលើកឡើងខាងលើ លោកប្រកាសហាមឃាត់ប្រជាជនម៉ូស្លីមមិនឲ្យចូលទឹកដីអាមេរិក រហូតដល់មានប្រតិកម្មខ្លាំងពីសំណាក់សកម្មជនសិទ្ធិមនុស្ស និងបណ្តាអ្នកនយោបាយសូម្បីតែបណ្តាក្រុមអ្នកសាធារណរដ្ឋ។
ជារួម សាសនាជា រឿងរសើបបំផុតមួយ ហើយអ្វីដែលសំខាន់ការលើកឡើងបែបនេះ ផ្ទុយនឹងការកំណត់ក្នុងរដ្ឋធម្មនុញ្ញអាមេរិកផង ព្រោះសេរីភាពសាសនា ត្រូវបានការពារដោយច្បាប់កំពូលរបស់រដ្ឋ ហើយគេហាមឃាត់ការយករឿងសាសនាមកធ្វើជាឈ្នាន់សម្រាប់ការឈានទៅកាន់តំណែងក្នុងស្ថាប័នរដ្ឋ។៕
Tag:
ម៉ូស្លីម
ដូណាល់ ត្រាំ
© រក្សាសិទ្ធិដោយ thmeythmey.com