ការប្រកួតកីឡាក្នុងបុណ្យសមុទ្របានបញ្ចប់យ៉ាងល្អទោះបីមានបញ្ហារឿងទីតាំង

កីឡាជាតិ

ការប្រកួតកីឡាក្នុងបុណ្យសមុទ្របានបញ្ចប់យ៉ាងល្អទោះបីមានបញ្ហារឿងទីតាំង

28, Dec 2016 , 8:59 am

រូបភាព

ដោយ:

ក្រោយប្រារព្ធធ្វើឡើងអស់រយៈពេល៣ថ្ងៃនៅខេត្តព្រះសីហនុចាប់ពីថ្ងៃទី២៣-២៥ ខែធ្នូ ឆ្នាំ២០១៦ ព្រឹត្តិការណ៍បុណ្យសមុទ្រលើកទី៥ បានបញ្ចប់យ៉ាងជោគជ័យកាលពីថ្ងៃទី២៥ ខែធ្នូ។ លោក វ៉ា់ត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានវាយតម្លៃចំពោះសកម្មភាពកីឡាទាំង៣ថ្ងៃថា បានប្រព្រឹត្តទៅយ៉ាងរលូន និងទទួលបានការគាំទ្រយ៉ាងខ្លាំងពីភ្ញៀវទេសចរណ៍ជាតិ និងអន្តរជាតិ ទោះបីមានបញ្ហាទីតាំងប្រកួតក៏ដោយ។

កីឡា៣ប្រភេទក្នុងចំណោម១២ប្រភេទដែលដាក់ឲ្យចូលរួមប្រកួតនិងសម្តែងក្នុងព្រឹត្តិការណ៍បុណ្យសមុទ្រលើកទី៥នាខេត្តព្រះសីហនុ ត្រូវបានគណៈកម្មការសម្រេចលុបចោលការប្រកួត និងសម្តែងដោយសារក្រុមហ៊ុនឯកជនមួយចំនួនមិនអនុញ្ញាតឲ្យយកទីតាំងឆ្នេរដើម្បីរៀបចំការប្រកួត។ ប៉ុន្តែកីឡា៩ប្រភេទផ្សេងទៀតត្រូវបានថ្នាក់ដឹកនាំវាយតម្លៃថា បានប្រព្រឹត្តទៅយ៉ាងរលូន និងជោគជ័យក្រៃលែង ព្រមទាំងទទួលបានការគាំទ្រ និងចាប់អារម្មណ៍យ៉ាងខ្លាំងពីសំណាក់ភ្ញៀវទេសចរណ៍ជាតិ និងអន្តរជាតិ។

ពិធីបុណ្យសមុទ្រលើកទី៥នៅខេត្តព្រះសីហនុដែលធ្វើឡើងក្រោមប្រធានបទ«ទីក្រុងបៃតង ឆ្នេរស្អាត សមុទ្រខៀវស្រងាត់» ដោយទទួលបានការចូលរួមបើកក្រោមវត្តមានសម្តេចនាយករដ្ឋមន្ត្រី ហ៊ុន សែន សន្តិសុខ និងសណ្តាប់ធ្នាប់ត្រូវបានអាជ្ញាធរខេត្តរឹតបន្តឹងយ៉ាងតឹងរឹងបំផុត។ ការរឹតបណ្តឹងផ្នែកសន្តិសុខនៅឆ្នេរឯករាជ្យ និងតាមរយៈការរំលោភយកតំបន់ឆ្នេររបស់វិស័យឯកជនដែលមិនអនុញ្ញាតឲ្យយកទីតាំងឆ្នេរដើម្បីរៀបចំការប្រកួតកីឡា បានធ្វើឲ្យកីឡា៣ប្រភេទត្រូវបានលុបចោលការប្រកួត ក្នុងនោះរួមមានល្បុក្កតោ ចំបាប់ និងតេក្វាន់ដូ WTF។

ទោះបីជាយ៉ាងនេះក្តី លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានវាយតម្លៃសកម្មភាពកីឡាទាំង៣ថ្ងៃយ៉ាងដូច្នេះថា៖«មកដល់ពេលនេះយើងបានបញ្ចប់សកម្មភាពកីឡាទាំងស្រុង ចាប់ពីថ្ងៃទី២៣ ខែធ្នូ ទាំងប្រភេទកីឡាសម្តែង និងប្រកួតបានបញ្ចប់ដោយរលូន ដោយមានការចូលរួមពីកីឡាករកីឡាការិនីថ្នាក់ជាតិ និងកីឡាករកីឡាការិនី ព្រមទាំងមហាជនក្នុងខេត្តព្រះសីហនុ»។

ក្រោយឆ្លងការការប្រកួត និងសម្តែងអស់រយៈពេល៣ថ្ងៃក្នុងចំណោមប្រភេទកីឡាទាំង៩ដែលបានដំណើរការ គេសង្កេតឃើញថា រត់ប្រណាំង និងប្រណាំងកង់ជាកីឡាដែលទទួលបានការគាំទ្រយ៉ាងច្រើនជាងគេ បន្ទាប់មកគឺកីឡាប្រដាល់គុនខ្មែរ បាល់ទះឆ្នេរខ្សាច់ និងបាល់ទាត់ឆ្នេរខ្សាច់។ ប៉ុន្តែអ្វីដែលធ្វើឲ្យអ្នកទស្សនាពេញចិត្ត និងកោតសរសើរនោះ គឺកីឡាប្រណាំងម៉ូតូទឹក ទូកក្តោង និងកីឡាហោះហើរ។

ក្នុងចំណោមកីឡាករដែលចូលរួមប្រកួតកីឡារត់ប្រណាំង ប្រណាំងកង់ បាល់ទះឆ្នេរខ្សាច់ និងបាល់ទាត់ឆ្នេរខ្សាច់ត្រូវបានលោកអគ្គលេខាធិការនៃគណៈកម្មាធិការជាតិអូឡាំពិកកម្ពុជាបញ្ជាក់ថា ភាគច្រើនជាកីឡាករកីឡាការិនីនៅក្នុងខេត្តព្រះសីហនុដែលមកពីតាមគ្រឹះស្ថានសិក្សានានាផ្ទាល់តែម្តងដែលមានរហូតដល់ជិត១ពាន់នាក់។ ក្រៅពីនេះជាកីឡាករអាជីពដែលមកពីតាមបណ្តាខេត្ត និងរាជធានីភ្នំពេញ។

ជាមួយគ្នានេះ លោក វ៉ាត់ ចំរើន អនុរដ្ឋលេខាធិការក្រសួងទេសចរណ៍ក៏បានវាយតម្លៃផងដែរពាក់ព័ន្ធទៅនឹងចំនួនភ្ញៀវទេសចរណ៍ជាតិ និងអន្តរជាតិតំបន់ទេសចរណ៍នៅខេត្តព្រះសីហនុ ដោយ លោក បានប៉ាន់ប្រមាណថា ក្នុងរយៈពេល៣ថ្ងៃនៃពិធីបុណ្យសមុទ្រ ខេត្តព្រះសីហនុទទួលបានភ្ញៀវទេសចរណ៍ប្រមាណជា៥០ម៉ឺននាក់។

ក្នុងនោះ លោក វាយតម្លៃថា ថ្ងៃទី១មានប្រមាណជា១០ម៉ឺននាក់ រីឯថ្ងៃទី២ជាង២០នាក់ និងថ្ងៃទី៣ជាង១០នាក់។ ប៉ុន្តែចំនួននេះមិនបានឆ្លើយតបនៅនឹងការរំពឺងរបស់លោកនោះឡើយ ដោយលោកបានដាក់ក្តីរំពឹងរហូតដល់ជិត១នាក់។ គួរបញ្ជាក់ថា កីឡាទាំង៣ប្រភេទដែលមិនបានធ្វើការប្រកួតរួមមាន ល្បុក្កតោ ចំបាប់ និងតេក្វាន់ដូ WTF៕