អន្តរជាតិ
បក្សលោកស្រី ប៉ាក ហ្គឺនហេ ប្រេះឆា ដ្បិតសមាជិកសភាបក្សនេះ រត់ទៅបើកបក្សថ្មី
× គណបក្សកាន់អំណាចកូរ៉េខាងត្បូង Saenuri របស់លោកស្រី ប៉ាក ហ្គឺនហេ កំពុងប្រេះឆាយ៉ាងខ្លាំង ក្រោយពេលលោកស្រី ប៉ាក ត្រូវបានសភាបោះឆ្នោតព្យួរតំណែងជាប្រធានាធិបតីរួចមក។ ចុងក្រោយនេះ សមាជិកសភាមកពីគណបក្ស Saenuri នេះ ក៏បានចាកចេញពីបក្ស និងប្រកាសបង្កើតគណបក្សថ្មី ដើម្បីប្រជែងក្នុងការបោះឆ្នោតប្រធានាធិបតីនៅឆ្នាំ២០១៧ ខាងមុខ។
នៅថ្ងៃទី២៧ ខែធ្នូ សមាជិកសភាបក្សកាន់អំណាចកូរ៉េខាងត្បូង Saenuri ចំនួន២៩នាក់ បានសម្រេចចិត្តចាកចេញពីបក្ស ខណៈដែលសំណុំរឿងពុករលួយរបស់លោកស្រី ប៉ាក ហ្គឺនហេ បានធ្លាក់ដល់ដៃតុលាការធម្មនុញ្ញហើយ។ សមាជិកសភាទាំង២៩រូបនេះ ទំនងជាសមាជិកសភាដែលបានបោះឆ្នោតទម្លាក់លោកស្រី ប៉ាក ហ្គឺនហេ នៅក្នុងសភាកាលពីដើមខែធ្នូនេះ។
បើតាមសារព័ត៌មាន Yonhap សមាជិកសភាមួយក្រុមនេះ នឹងបង្កើតក្រុមចរចានៅសភាខ្លួនឯង ហើយបង្កើតគណបក្សថ្មី ដែលមាននិន្នាការអភិរក្សនៅថ្ងៃទី២៤ ខែមករា ឆ្នាំ២០១៧។ ការចាកចេញនេះ ធ្វើឲ្យបក្សកាន់អំណាច Saenuri បាត់បង់សំឡេងភាគច្រើននៅក្នុងសភាដែលមានកៅអីសរុប៣០០ ។ បក្សនេះ នៅសល់អាសនៈតែ៩៩ប៉ុណ្ណោះ និងស្ថិតនៅលំដាប់ទីពីរបន្ទាប់ពីបក្សប្រឆាំងប្រជាធិបតេយ្យដែលមានកៅអី១២១ ។
ក្រុមសមាជិកសភាផ្ដាច់ខ្លួននេះ បាននិយាយថា ក្រុមអ្នកស្មោះត្រង់លោកស្រី ប៉ាក ហ្គឺនហេ បានបំភេ្លចគុណតម្លៃនៃគំនិតអភិរក្សនិយម ដែលធ្វើឲ្យបាត់បង់ទំនុកចិត្តពីប្រជាជន។ ក្រុមនេះក៏រិះគន់សម្ព័ន្ធមិត្តលោកស្រី ប៉ាក ដែលមិនខ្វល់ពីគំនិតប្រជាជន ហើយបែរជាការពារលោកស្រី ប៉ាក ហ្គឺនហេ លើសំណុំរឿងពុករលួយទៅវិញ។ ក្រុមផ្ដាច់ខ្លួនដដែលនេះរំពឹងទទួលការគាំទ្រច្រើនពីសំណាក់អ្នកគាំទ្រ ដែលមិនពេញចិត្តលោកស្រី ប៉ាក ។
ដោយឡែក ថ្នាក់ដឹកនាំបក្ស Saenuri វិញ មិនសប្បាយចិត្តឡើយនឹងការចាកចេញរបស់សមាជិកសភាបក្សខ្លួន។ លោក In Myung-jin បេក្ខជនប្រធានបក្ស Saenuri និយាយថា លោកពិតជាខកចិត្តណាស់។ ដោយសារពួកគេបានចាកចេញហើយ លោកសង្ឃឹមថា បក្សថ្មីនេះនឹងទទួលការគាំទ្រពីប្រជាជន។ យ៉ាងក៏ដោយ លោកក៏មិនភ្លេចប្រាប់ឲ្យថ្នាក់ដឹកនាំដទៃទៀត បញ្ចុះបញ្ចូលសមាជិកនៅសល់កុំចាកចេញទៀត។
បក្សអភិរក្ស Saenuri ប្រឈមមុខបញ្ហាខ្លាំង ចាប់តាំងពីបែកធ្លាយរឿងអាស្រូវពុករលួយរបស់ប្រធានាធិបតី ប៉ាក ហ្គឺនហេ ។ រឿងរ៉ាវក៏ចេះតែបន្ត រហូតដល់ការបោះឆ្នោតទម្លាក់តំណែងរបស់លោកស្រី ប៉ាក ។ ពេលនេះ ជោគវាសនារបស់លោកស្រី ស្ថិតក្នុងដៃតុលាការធម្មនុញ្ញ ដែលនឹងកំណត់ថា ការបោះឆ្នោតទម្លាក់របស់សភា អាចយកជាការបានឬអត់៕
Tag:
កូរ៉េខាងត្បូង
ប៉ាក ហ្គឺនហេ
Saenuri
© រក្សាសិទ្ធិដោយ thmeythmey.com