ក្រសួងការពារជាតិស្វាគមន៍ក្រុមលីកលំដាប់ទី២របស់ម៉ាឡេស៊ីនៅស្តាតចាស់ថ្ងៃនេះ

កីឡាជាតិ

ជាតិ

ក្រសួងការពារជាតិស្វាគមន៍ក្រុមលីកលំដាប់ទី២របស់ម៉ាឡេស៊ីនៅស្តាតចាស់ថ្ងៃនេះ

29, Dec 2016 , 2:42 pm

រូបភាព

ដោយ:

ក្រុមបាល់ទាត់របស់ក្រសួងការពារជាតិ បើកទ្វារកីឡដ្ឋានកងយោធពលខេមរភូមិន្ទ(ស្តាតចាស់)ស្វាគមន៍ក្រុមលីកលំដាប់ទី២ម៉ាឡេស៊ី University Technology Mara នាវេលាម៉ោង៤រសៀលថ្ងៃទី២៩ ខែធ្នូ នេះ។ ជំនួបមិត្តភាពអន្តរជាតិរបស់ក្រសួងការពារជាតិនារសៀលនេះដែរ គឺដើម្បីសងសឹកឲ្យក្រុមរួមអាជីពដែលបានចាញ់នាពេលកន្លងទៅថ្មីៗ។

ក្រុមជើងឯករងលីកកំពូលកម្ពុជាឆ្នាំ២០១៥ ក្រសួងការពារជាតិបានត្រៀមខ្លួនរួចជាស្រេច ដើម្បីទទួលស្វាគមន៍ក្រុមលីកលំដាប់ទី២របស់ម៉ាឡេស៊ី University Technology Mara នារសៀលថ្ងៃទី២៩ ខែធ្នូ ឆ្នាំ២០១៦ នៅកីឡដ្ឋានកងយោធពលខេមរភូមិន្ទ(ស្តាតចាស់)។

ជំនួបមិត្តភាពអន្តរជាតិរបស់ក្រសួងការពារជាតិនារសៀលនេះដែរ ធ្វើឡើងដើម្បីវាស់ស្ទង់កម្រិតសមត្ថភាពរបស់កីឡាករ ក៏ដូចជាដកស្រង់បទពិសោធន៍សម្រាប់ពង្រឹងបច្ចេកទេស និងសមត្ថភាបសម្រាប់ត្រៀមប្រកួតប្រជែងដណ្តើមជើងលីកកំពូលរដូវកាលថ្មី ២០១៧។ ម្យ៉ាងវិញទៀត ដើម្បីសងសឹកឲ្យក្រុមលីកកំពូលកម្ពុជាចំនួនពីរដែលបានចាញ់ក្រុមនេះកាលពីពេលថ្មីៗផងដែរ។

គួរបញ្ជាក់ថា នេះជាការប្រកួតមិត្តភាពលើកទី៤សម្រាប់ក្រុមលីកលំដាប់ទី២របស់ម៉ាឡេស៊ីមួយនេះ ព្រោះក្រុមនេះបានជួបប្រកួតជាមួយក្រុមលីកកំពូលកម្ពុជា៣លើករួចមកហើយក្នុងឆ្នាំនេះ ក្នុងនោះក្រុម University Technology Mara បានយកឈ្នះក្រុម Cambodian Tiger ២-០ និងបន្តយកឈ្នះភ្នំពេញ ២-១ ប៉ុន្តែក្រុមនេះបានចាញ់ក្រុមវេស្ទើនភ្នំពេញ ២-១ កាលពីម្សិលមិញ៕