ជាតិ
សង្គមជាតិ
ឥណ្ឌារៀបចំមហោស្រពវប្បធម៌តាមរាជធានីខេត្តចំនួន ៣ នៅកម្ពុជា
×
ភ្នំពេញ៖ ក្រសួងវប្បធម៌នៃរដ្ឋាភិបាលឥណ្ឌា តាមរយៈស្ថានទូតឥណ្ឌាប្រចាំកម្ពុជានឹងរៀបចំមហោស្រពវប្បធម៌ឥណ្ឌា ចាប់ពីថ្ងៃទី១០ ខែមករា រហូតដល់ខែកុម្ភៈ ឆ្នាំ២០១៧ ខាងមុខ។ ព្រឹត្តិការណ៍នឹងប្រព្រឹត្តឡើងក្នុងរាជធានីភ្នំពេញ ខេត្តសៀមរាប និងបាត់ដំបង។
មហោស្រពនេះ មានការសម្តែងរបាំបុរាណរាមាយណៈ របាំបុរាណកាតាក់ឥណ្ឌា របាំប្រពៃណីម៉ានងារ ពិធីបុណ្យព្រះពុទ្ធសាសនា និងបុណ្យអាហារ ជាដើម។ ឥណ្ឌារៀបចំមហោស្រពឡើង ក្នុងគោលបំណងរឹតចំណងមិត្តភាពជាមួយកម្ពុជា និងសាទរខួប ២៥ឆ្នាំ នៃទំនាក់ទំនង ការទូតឥណ្ឌា និងអាស៊ានផង។
ពិធីបើកព្រឹត្តិការណ៍មហោស្រពឥណ្ឌានឹងធ្វើឡើង នៅល្ងាចថ្ងៃទី១០ ខែមករា ឆ្នាំ២០១៧ នាមហោស្រពចតុមុខ រាជធានីភ្នំពេញ ដោយមានការសម្តែង រាមាយណៈ (រាមកេរ្តិ៍) សម្តែងដោយក្រុមសិប្បៈល្បីល្បាញ Kalakshetra ផង។ ពួកគេនឹងសម្តែងភាគផ្សេងៗគ្នានៃរឿងរាមកេរ្តិ៍ នៅថ្ងៃទី១១ និង១២ ខែមករា ផងដែរ។
សាធារណជនអាចចូលទស្សនាមហោស្រពវប្បធម៌ឥណ្ឌាដោយសេរី៕
© រក្សាសិទ្ធិដោយ thmeythmey.com