កីឡាជាតិ
ប្រាក់ មុន្នីឧត្តម ប្តេជ្ញាជួយព្រះខ័នរាជស្វាយរៀងឲ្យស្គាល់រដូវកាលជោគជ័យនៅឆ្នាំ២០១៧
× រដូវកាលឆ្នាំ២០១៦ ក្លិបព្រះខ័នរាជស្វាយរៀង បានចំណាត់ថ្នាក់លេខ៤នៅក្របខណ្ឌកំពូល និងលេខ២ក្នុងពានរង្វាន់សម្តេច ហ៊ុន សែន។ សម្រាប់រដូវកាលថ្មី ខ្សែប្រយុទ្ធឆ្នើម ប្រាក់ មុន្នីឧត្តម បានតាំងចិត្តជួយក្រុមឲ្យបានលទ្ធផលល្អប្រសើរជាងនេះ ហើយរូបគេក៏ព្យាយាមពង្រឹងសមត្ថភាពរបស់ខ្លួនសម្រាប់ក្រុមកីឡាបាល់ទាត់ជម្រើសជាតិកម្ពុជា ផងដែរ។
ប្រាក់ មុន្នីឧត្តម ខ្សែប្រយុទ្ធឆ្នើមរបស់ក្លិបព្រះខ័នរាជស្វាយរៀងបានប្តេជ្ញាថា នឹងអភិវឌ្ឍន៍សមត្ថភាពខ្លួនឲ្យរីកចម្រើនថែមទៀត តាមរយៈការខិតខំប្រឹងប្រែងហ្វឹកហាត់ដោយខ្លួនឯង ក៏ដូចជាជាមួយក្លិប និងក្រុមជម្រើសជាតិកម្ពុជា។ ការប្តេជា្ញនេះធ្វើឡើងក្នុងគោលបំណង ដើម្បីឆ្លើយតបទៅនឹងការកើនឡើងនៃការប្រកួតប្រជែងនៅក្នុងស្រុក និងក្រុមជម្រើសជាតិ ជាពិសេសដើម្បីជួយក្លិបក្នុងរដូវកាលថ្មីឆ្នាំ២០១៧។
ក្នុងបទសម្ភាសជាមួយសារព័ត៌មានថ្មីៗ ប្រាក់ មុន្នីឧត្តម បានបញ្ជាក់យ៉ាងដូច្នេះថា៖«ឆ្នាំ២០១៧ សំខាន់គឺខ្លួនខ្ញុំផ្ទាល់ អ៊ីចឹងខ្ញុំគិតថា ខ្ញុំនឹងប្រឹងប្រែងដោយខ្លួនឯងជាដំបូង បន្ទាប់មកការហ្វឹកហាត់នៅក្នុងក្លិបដើម្បីកែតម្រូវចំណុចខ្វះខាត បន្ទាប់មកយើងត្រូវខិតខំហ្វឹកហាត់ឲ្យខ្លាំងជាងមុន ព្រោះអីការប្រកួតជម្រើសជាតិ និងក្លិបចេះតែកើនឡើងៗទៅមុខ តែបើយើងនៅតែដដែលៗ អ៊ីចឹងយើងមិនអាចអភិវឌ្ឍន៍ខ្លួនឯងបាននោះទេ ដូច្នេះយើងត្រូវអភិវឌ្ឍន៍ខ្លួនឯងឲ្យបានច្រើនជាងមុន»។
កាលពីរដូវកាលឆ្នាំ២០១៦ ព្រះខ័នរាជស្វាយរៀង បានបញ្ចប់ចំណាត់ថ្នាក់លេខ៤នៅក្នុងក្របខណ្ឌកំពូល ហើយឈានដល់វគ្គផ្តាច់ព្រ័ត្រនៃពានរង្វាន់សម្តេច ហ៊ុន សែន មុននឹងចាញ់ក្រសួងការពារជាតិដោយការសម្រេចគ្រាប់បាល់ប៉េណាល់ទី ក្រោយស្មើ ១-១ នៅម៉ោងធម្មតា។
«ខ្ញុំប្តេជ្ញាថា ឆ្នាំ២០១៧ នេះ ខ្ញុំនឹងខិតខំប្រឹងប្រែងឲ្យអស់ពីសមត្ថភាព ព្រោះអីឆ្នាំមុនយើងបានបរាជ័យក្នុងពានរង្វាន់សម្តេចផង និងពានរង្វាន់លីកផង។ អ៊ីចឹងឆ្នាំនេះ(២០១៧) មិនត្រឹមតែខ្ញុំនោះទេ គឺក្រុមទាំងមូលនឹងខិតខំប្រឹងប្រែងបន្ថែមជាងឆ្នាំមុនទៀត»។ នេះជាសំដីរបស់កីឡាករ ប្រាក់ មុន្នីឧត្តម។
នៅពេលសួរពាក់ព័ន្ធពីគម្រោងចេញទៅហ្វឹកហាត់ពង្រឹងសមត្ថភាពនៅក្រៅប្រទេស ខ្សែប្រយុទ្ធដ៏ឆ្នើមប្រចាំក្លិបព្រះខ័នរាជស្វាយរៀង និងក្រុមជម្រើសជាតិកម្ពុជារូបនេះបានបញ្ជាក់ថា៖«រឿងនឹងមិនទាន់ដឹងដែរបង មិនទាន់សម្រេចចិត្តច្បាស់»៕
Tag:
ប្រាក់ មុន្នីឧត្តម
ព្រះខ័នរាជស្វាយរៀង
© រក្សាសិទ្ធិដោយ thmeythmey.com