២០១៦៖ បារ៉ាក់ អូបាម៉ា ជាប្រធានាធិបតីដំបូងទៅគោរពវិញ្ញាណក្ខន្ធជនរងគ្រោះហ៊ីរ៉ូស៊ីម៉ា

អន្តរជាតិ

២០១៦៖ បារ៉ាក់ អូបាម៉ា ជាប្រធានាធិបតីដំបូងទៅគោរពវិញ្ញាណក្ខន្ធជនរងគ្រោះហ៊ីរ៉ូស៊ីម៉ា

01, Jan 2017 , 2:30 pm

រូបភាព

ដោយ: ថ្មីៗ

លោក បារ៉ាក់ អូបាម៉ាបានក្លាយជាប្រធានាធិបតីអាមេរិកដំបូងបំផុតដែលអញ្ជើញទៅគោរពវិញ្ញណក្ខន្ធជនជាតិជប៉ុនដែលបានស្លាប់ដោយសារការទម្លាក់គ្រាប់បែកបរមាណូរបស់អាមេរិកនៅ ហ៊ីរ៉ូស៊ីម៉ា។ វាជាព្រឹត្តិការណ៍ប្រវត្តិមួយសម្រាប់ឆ្នាំ ២០១៦នេះ។

លោក បារ៉ាក់ អូបាម៉ា គឺជាប្រធានាធិបតីអាមេរិកដំបូងបំផុតដែលអញ្ជើញទៅគោរពវិញ្ញាណក្ខ័ន្ធប្រជាជនជប៉ុនដែលបានស្លាប់បាត់បង់ជីវិតនៅហ៊ីរ៉ូស៊ីម៉ាកាលពីខែឧសភាឆ្នាំ ២០១៦ កន្លងទៅ។

ក្នុងពេលគោរពវិញ្ញាណក្ខន្ធជនរងគ្រោះ លោកបានឆ្លៀតផ្ញើសារទៅកាន់មេដឹកនាំឯទៀតជាពិសេសប្រទេសដែលមានអាវុធនុយក្លេអ៊ែរទប់ស្កាត់កុំឲ្យមានការសាយភាយ ឬឈានដល់ការប្រើប្រាស់អាវុធប្រល័យលោកនេះជាថ្មីទៀត។ ប៉ុន្តែអ្វីដែលគួរឲ្យកត់សម្គាល់ប្រធានាធិបតីអាមេរិករូបនេះ មិនបានប្រកាសសុំអភ័យទោសចំពោះការប្រើប្រាស់អាវុធនុយក្លេអ៊ែរប្រឆាំងជប៉ុនកាលពីសម័យសង្គ្រាមលោកលើកទីពីរនោះឡើយ។

ថ្វីបើគ្មានការសុំអភ័យទោសពីសំណាក់មេដឹកនាំអាមេរិកក៏ដោយ ប្រជាជនជប៉ុនសង្ឃឹមថា បណ្តាមេដឹកនាំពិភពលោកផ្សេងទៀតនឹងធ្វើតាមលោក បារ៉ាក់ អូបាម៉ា ហើយជប៉ុនក៏ប្តេជ្ញាបន្តតួនាទីជាតស៊ូមតិជំរុញឲ្យមានការធ្វើឲ្យពិភពលោកក្លាយជាពិភពដែលគ្មានអាវុធនុយក្លេអ៊ែរថែមទៀតផង។ ជប៉ុនបញ្ជាក់ថា ខ្លួនឆ្អែតឆ្អន់នឹងសង្គ្រាម ហើយប្រទេសមហាអំណាចសេដ្ឋកិច្ចមួយនេះក៏ចង់ឲ្យពិភពលោកទប់ស្កាត់ឲ្យបាននូវសង្គ្រាមបង្ហូរឈាមគ្នាផងដែរ។

សូមរម្លឹកផងដែរថា ថ្ងៃ ៦ សីហា ឆ្នាំ១៩៤៥ នៅម៉ោងប្រហែល ២ ៖ ៤៥នាទីព្រឹក (ម៉ោងប្រទេសជប៉ុន) យន្តហោះទម្លាក់គ្រាប់បែក B-29 អាមេរិកមួយគ្រឿងឈ្មោះ Enola Gay បានហោះចេញពីកោះ Tinian ដើម្បីកម្ទេចទីក្រុងជប៉ុន ហ៊ីរ៉ូស៊ីម៉ា។ យន្តហោះនេះបានធ្វើដំណើរមកដល់ទីក្រុងហ៊ីរ៉ូស៊ីម៉ា (Hiroshima) និងដាច់ចិត្តទម្លាក់គ្រាប់នៅម៉ោង៨៖១៦នាទីព្រឹក។ រឿងដែលរន្ធត់បំផុតនោះគ្រាន់តែគ្រាប់បែកបរមាណូធ្លាក់ដល់ដីភ្លាម ទីក្រុងទាំងមូលខ្ទេចស្ទើរគ្មានសល់ ហើយមនុស្សប្រហែល ៨ម៉ឺននាក់ស្លាប់ភ្លាមៗ និងមនុស្សប្រហែល៣៥០០០នាក់ទៀតរងរបួសផងដែរ ។

អ្វីគួរកត់សម្គាល់នោះ គ្រាប់បែកបរមាណូដែលសម្លាប់មនុស្សរាប់សែននាក់នៅទីក្រុង ហ៊ីរ៉ូស៊ីម៉ាត្រឹមជាគ្រាប់បែកទីមួយ ហើយត្រូវបានគេស្គាល់ឈ្មោះថា Little Boy ។ បីថ្ងៃក្រោយការទម្លាក់គ្រាប់នេះ គ្រាប់បែកបរមាណូមួយគ្រាប់ទៀតត្រូវបានទាហានជើងអាកាសអាមេរិកទម្លាក់កម្ទេចទីក្រុងជប៉ុនមួយទៀត គឺ ណាកាសាគី (Nagasaki) ដែលបណ្តាលឲ្យប្រជាជនរាប់ម៉ឺននាក់ផ្សេងទៀតស្លាប់យ៉ាងអាណោចអាធម៕