ម្ចាស់ខ្សែក្រវាត់ខ្មៅ៤ដាន់ ប៉ាល់ ជីវ័ន្ត ប្តេជ្ញាបង្កើនការហ្វឹកហាត់ដើម្បីប្រជែងជើងឯកពិភពលោក

កីឡាជាតិ

ម្ចាស់ខ្សែក្រវាត់ខ្មៅ៤ដាន់ ប៉ាល់ ជីវ័ន្ត ប្តេជ្ញាបង្កើនការហ្វឹកហាត់ដើម្បីប្រជែងជើងឯកពិភពលោក

30, Dec 2016 , 7:59 pm

រូបភាព

ដោយ:

ម្ចាស់ខ្សែក្រវាត់ខ្មៅ៤ដាន់កីឡាតេក្វាន់ដូ ITF កម្ពុជា ប៉ាល់ ជីវ័ន្ត ដែលបច្ចុប្បន្នជាគ្រូបង្វឹកកីឡាតេក្វាន់អាយធីអែហ្វ(ITF)ក្លិបយុវជនបានប្តេជ្ញាថា នឹងបង្កើនការហ្វឹកហាត់របស់ខ្លួនទ្វេដង ដើម្បីត្រៀមការប្រកួតកីឡាតេក្វាន់ដូ ITF ជ្រើសរើសជើងឯកពិភពលោកនៅទីក្រុងព្យុងយ៉ាងប្រទេសកូរ៉េ នាឆ្នាំ២០១៧ខាងមុខ។ ជាមួយគ្នានេះកីឡាការិនី ប៉ាល់ ឆរស្មី ដែលជាប្អូនបង្កើតក៏បានប្តេជ្ញាអភិវឌ្ឍន៍សមត្ថភាពសម្រាប់ត្រៀមព្រឹត្តិការណ៍នេះផងដែរ។

ក្រោយទទួលបានជោគជ័យយ៉ាងធំធេងក្នុងព្រឹត្តិការណ៍ប្រកួតកីឡាតេក្វាន់ដូ ITF ជ្រើសរើសជើងឯកអាស៊ីអាគ្នេយ៍លើកទី១ បានធ្វើឲ្យម្ចាស់ខ្សែក្រវាត់ខ្មៅ៤ដាន់កីឡាតេក្វាន់ដូ ITF ប៉ាល់ ជីវ័ន្ត ព្រមទាំងកីឡាការិនី ប៉ាល់ ឆរស្មី ដែលជាប្អូនបង្កើតមានការប្តេជា្ញរៀងៗខ្លួនសម្រាប់ផែនការក្នុងឆ្នាំ២០១៧។ លើសពីនេះ បងប្អូនបង្កើតទាំងពីរផ្តោតសំខាន់លើការស្វែងរកមេដាយជូនជាតិពីព្រឹត្តិការណ៍ប្រកួតជើងឯកពិភពលោកនៅកូរ៉េខាងជើង នាខែកញ្ញា។

ជាមួយគ្នានេះ កីឡាករ ប៉ាល់ ជីវ័ន្ត ដែលដណ្តើមបានមេដាយមាស៤ម្នាក់ឯងពីការធ្វើម្ចាស់ផ្ទះជើងឯកអាស៊ីអាគ្នេយ៍បានដាក់ទិសដៅសម្រាប់ឆ្នាំ២០១៧ថា ខ្លួននឹងបង្កើនការហ្វឹកហាត់ក្នុងការពង្រឹងសមត្ថភាព និងបច្ចេកទេសនៅដើមឆ្នាំតែម្តង ដោយសម្រួចទៅលើការប្រកួតជើងឯកពិភពលោកនៅទីក្រុងព្យុងយ៉ាងប្រទេសកូរ៉េខាងជើង។

ម្ចាស់ខ្សែក្រវាត់ខ្មៅ៤ដាន់កីឡាតេក្វាន់ដូ ITF រូបនេះបានបញ្ជាក់យ៉ាងដូច្នេះថា៖«សម្រាប់ការប្តេជ្ញារបស់ខ្ញុំ គឺឆ្នាំ២០១៧ដើមឆ្នាំ គឺយើងនឹងប្រឹងប្រែងហ្វឹកហាត់ ដោយទិសដៅរបស់ខ្ញុំផ្តោតទៅលើការប្រកួតជើងឯកពិភពលោកនាខែកញ្ញា នៅទីក្រុងព្យុងយ៉ាង។ ហើយយើងនឹងបន្តការហ្វឹកហាត់ឲ្យកាន់តែខ្លាំង ដើម្បីប្រកួតប្រជែងដណ្តើមមេដាយពីព្រឹត្តិការណ៍នេះជូនជាតិកម្ពុជា»។

ព្រឹត្តិការណ៍ប្រកួតជើងឯកលំដាប់ពិភពលោកនេះ មិនមែនជាលើកទី១សម្រាប់ម្ចាស់មេដាយមាស៤កម្រិតអាស៊ានប្រចាំឆ្នាំ២០១៦ នោះទេ ពោលគឺរូបគេធ្លាប់ចូលរួមប្រកួតជាច្រើនលើករួចមកហើយ ប៉ុន្តែមិនធ្លាប់ទទួលបានមេដាយមាសនោះឡើយ គឺបានត្រឹមប្រាក់ និងសំរឹទ្ធប៉ុណ្ណោះ។ ទោះបីជាយ៉ាងនេះក្តី គ្រូបង្វឹកក្លិបយុវជនរូបនេះរំពឹងថា ប្រសិនបើបានចូលរួមប្រកួតលើកនេះ រូបគេនឹងដណ្តើមមេដាយជូនជាតិកម្ពុជាឲ្យបាន ជាពិសេសរំពឹងលើវិញ្ញាសាសម្តែងមេគុន។

ទន្ទឹមនឹងនេះ កីឡាការិនី ប៉ាល់ ឆរស្មី ដែលដណ្តើមបានមេមាស៣ពីការប្រកួតកីឡាតេក្វាន់ដូ ITF ជើងឯកអាស៊ីអាគ្នេយ៍បានប្តេជ្ញា នាងនឹងខិតខំប្រឹងប្រែអហ្វឹកហាត់ឲ្យអស់ពីសមត្ថភាព ដើម្បីត្រៀមប្រកួតក្នុងព្រឹត្តិការណ៍នានា ជាពិសេសការប្រកួតជើងឯកពិភពលោកតែម្តង។

«សម្រាប់ខ្ញុំផ្ទាល់ ទោះបីការប្រកួតមានលក្ខណតូចឬធំយ៉ាងណាក៏ដោយ ខ្ញុំតែងតែមានការតាំងចិត្ត និងត្រៀមខ្លួនជានិច្ច ដោយខិតខំប្រឹងប្រែងហ្វឹកហាត់ឲ្យអស់ពីសមត្ថភាព ព្រោះមិនចង់ឲ្យមានការធ្វេសប្រហែស ព្រោះយើងមិនអាចមើលឃើញពីសមត្ថភាពដៃគូយ៉ាងណានោះទេ សំខាន់ប្រឹងប្រែងឲ្យអស់នូវអ្វីដែលយើងមាន»។ នេះជាការបញ្ជាក់របស់កីឡាការិនី ប៉ាល់ ឆរស្មី។

គួរបញ្ជាក់ថា កីឡាការិនី ប៉ាល់ ឆរស្មី បានចូលប្រឡូកក្នុងវិស័យកីឡាតេក្វាន់ដូ ITF តាំងពីឆ្នាំ១៩៩៧ ប៉ុន្តែដោយសារបញ្ហាសុខភាព ឆរស្មី បានសម្រេចឈប់នៅឆ្នាំ២០០៨។ ទោះបី នាងបានឈប់ពីកីឡាតេក្វាន់ដូ ITF ក៏ដោយ ប៉ុន្តែនាងនៅតែបន្តហ្វឹកហាត់។ មិនត្រឹមតែជាកីឡាការិនីតេក្វាន់ដូប៉ុណ្ណោះទេ រស្មី ថែមទាំងជាកីឡាការិនីវ៉ូវីណាមជម្រើសជាតិដ៏ឆ្នើមមួយរូបទៀតផង ដោយនាងបានចូលប្រឡូកក្នុងវិស័យកីឡានេះតាំងពី២០១១ រហូតដល់បច្ចុប្បន្ន។

តាមរយៈបទពិសោធន៍នៃការប្រឡូក្នុងវិស័យកីឡាអស់រយៈពេលជាច្រើនឆ្នាំកន្លងមកនេះ ប៉ាល់ ឆរស្មី ធ្លាប់ទទួលបានមេដាយប្រាក់២ មាស៣ ផ្នែកកីឡាតេក្វាន់ដូ ITF។ ហើយកាលពីពេលថ្មីកន្លងទៅនេះ នាងដណ្តើមបានមេដាយមាស១ ពីការប្រកួតកីឡាឆ្នេរខ្សាច់អាស៊ីនៅទីក្រុងដាណាងប្រទេសវៀតណាមផ្នែកវ៉ូវីណាម។

ទោះបីបច្ចុប្បន្នម្ចាស់មេដាយមាសអាស៊ីផ្នែកវ៉ូវីណាម កំពុងមមាញឺកជាមួយការហ្វឹកហាត់ត្រៀមការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍លើកទី៤ និងការប្រកួតលំដាប់ពិភពលោកនៅឆ្នាំ២០១៧ ក៏ដោយ ប៉ុន្តែនាងបានបញ្ជាក់ថា មិនបោះបង់កីឡាតេក្វាន់ដូ ITF នោះឡើយព្រោះវាជាកីឡាកំណើត៕