Honda ជាមួយសមាគមបាល់ទាត់សៀមរាបនឹងបង្កើតក្លិបថ្មីមួយនៅសៀមរាបឆ្នាំក្រោយ

កីឡាជាតិ

Honda ជាមួយសមាគមបាល់ទាត់សៀមរាបនឹងបង្កើតក្លិបថ្មីមួយនៅសៀមរាបឆ្នាំក្រោយ

30, Dec 2016 , 7:19 pm

រូបភាព

ដោយ:

ដើម្បីសម្រេចក្តីស្រមៃរបស់កីឡាករកម្ពុជាដែលចង់ក្លាយជាកីឡាករបាល់ទាត់ដ៏ឆ្នើម ខ្សែប្រយុទ្ធដ៏ឆ្នើមរបស់ជប៉ុន Keisuke Honda ដែលកំពុងប្រកបអាជីបនៅក្នុងក្លិប AC Milan នៃប្រទេសអ៊ីតាលី នឹងសហការជាមួយសមាគមបាល់ទាត់ខេត្តសៀមរាប ដើម្បីបង្កើតក្លិបបាល់ទាត់ថ្មីមួយក្នុងខេត្តសៀមរាប។ គម្រោងនេះនឹងលេចចេញជារូបរាងនៅឆ្នាំ២០១៧ នេះ។

ក្រៅពីបង្កើតសាលាបង្វឹកបាល់ទាត់នៅក្នុងរាជធានីភ្នំពេញខ្សែប្រយុទ្ធដ៏ឆ្នើមរបស់ជប៉ុន Keisuke Honda ដែលកំពុងលេងឲ្យក្លិបលំដាប់កំពូល AC Milan នៃប្រទេសអ៊ីតាលី បានចាប់ដៃសហការគ្នាជាមួយសមាគមបាល់ទាត់ខេត្តសៀមរាប បង្កើតក្លិបបាល់ទាត់ថ្មីមួយដែលមានឈ្មោះថា SOTILLO Angkor FC នៅលើកទឹកដីខេត្តសៀម។ គម្រោងនេះត្រូវបានប្រធានសមាគមបាល់ទាត់ខេត្តសៀមរាបអះអាងថា នឹងលេចចេញជារូបរាងនៅឆ្នាំ២០១៧ ខាងមុខនេះ ប៉ុន្តេកីឡាកររូបនេះមិនបានបញ្ជាក់ពីពេលវេលាច្បាស់លាស់នោះឡើយ។

ក្នុងសន្និសីទសារព័ត៌មាននៅសណ្ឋាគារអ៊ិនធ័រខន កាលពីល្ងាចថ្ងៃទី២៦ ខែធ្នូ កីឡាករ Keisuke Honda បានបញ្ជាក់ថា សម្រាប់គម្រោងបង្កើតក្លិបបាល់ទាត់នេះលោកនឹងជួយផ្តល់ផ្នែកបច្ចេកទេសតាមរយៈការរកគ្រូបង្វឹក និងកីឡាករល្អៗពីជប៉ុនមកជួយបណ្តុះបណ្តាលកីឡាករនៅកម្ពុជា។ លើសពីនេះ លោក នឹងជួយស្វែងរកដៃគូឧបត្ថម្ភនៅក្នុងប្រទេសជប៉ុន និងប្រទេសផ្សេងៗទៀត ដើម្បីផ្នែកហិរញ្ញវត្ថុផងដែរ។

ពាក់ព័ន្ធទៅនឹងគោលបំណងនៃការបង្កើតនេះ ខ្សែប្រយុទ្ធដ៏លេចធ្លោរប្រចាំក្លិប AC Milan របស់អ៊ីតាលីរូបនេះបានបញ្ជាក់ថា ការសហការនេះធ្វើឡើងក្នុងគោលបំណង ដើម្បីជួយសម្រេចបណ្តុះបណ្តាលសមត្ថភាព និងបច្ចេកទេសរបស់កីឡាករកម្ពុជាឲ្យកាន់តែរីកចម្រើនថែមទៀត។ លើសពីនេះ ដើម្បីជួយផ្តល់ឱកាសដល់កីឡាករវ័យក្មេងដែលមានក្តីស្រមៃចង់ក្លាយជាកីឡាការបាល់ទាត់ដ៏ឆ្នើមប្រចាំកម្ពុជា។

ក្រៅពីគម្រោងបង្កើតក្លិបបាល់ទាត់នៅខេត្តសៀមរាប និងការបង្កើតសាលាបង្វឹកបាល់ទាត់នៅរាជធានីភ្នំពេញ ខ្សែប្រយុទ្ធដ៏ឆ្នើមរបស់ជប៉ុន Keisuke Honda គ្រោងនឹងបង្កើតទីលានបាល់ទាត់នៅខេត្តសៀមរាបផងដែរ ប៉ុន្តែគម្រោងនេះស្ថិតនៅក្នុងការពិចារណានៅឡើយ ដោយលោកកំពុងពិភាក្សាជាមួយក្រុមការងាររបស់លោក។

ជាមួយគ្នានេះ លោក ប៉ោ វណ្ណិត ប្រធានសមាគមបាល់ទាត់ខេត្តសៀមរាបបានសម្តែងអារម្មណ៍រំភើបសប្បាយរីករាយយ៉ាងក្រៃលែង ដែលបានសហការជាមួយកីឡាករលំដាប់ពិភពលោក ក្នុងការពង្រឹងវិស័យកីឡាបាល់ទាត់នៅខេត្តសៀមរាប។ ហើយលោករំពឹងថា វត្តមានរបស់កីឡាករ Honda នៅកម្ពុជានឹងជួយជំរុញវិស័យកីឡាបាល់ទាត់កម្ពុជាមានការអភិវឌ្ឍន៍កាន់តែរីកចម្រើនថែមទៀត។

ទន្ទឹមនឹងនេះ ដើម្បីតបស្នងនូវគុណបំណាច់របស់កីឡាករ Honda ដែលបានបង្កើតសាលាបាល់ទាត់ «SOLTILO FAMILIA SOCCER SCHOOL» និងគម្រោងអភិវឌ្ឍន៍បាល់ទាត់នានានៅកម្ពុជា។ លោក ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា បានប្រកាសគាំទ្រទាំងស្រុងនូវរាល់សកម្មភាពនានាដែលពាក់ព័ន្ធនឹងវិស័យកីឡាបាល់ទាត់របស់កីឡាករ Honda នៅកម្ពុជា ហើយលោកប្តេជ្ញាថា នឹងជួយជ្រោមជ្រែងឲ្យអស់ពីសមត្ថភាពតាមដែលអាចធ្វើទៅបាន៕