កីឡាជាតិ
ចាន់ វឌ្ឍនាកា អាចនឹងអវត្តមានរីឯ ស៊ូ យ៉ាទី នឹងជួយបឹងកេតក្នុងជំនួបជាមួយឡាវ
×
ខ្សែប្រយុទ្ធដ៏ឆ្នើមរបស់បឹងកេងអង្គរ ចាន់ វឌ្ឍនាកា ដែលកំពុងញាំញីដោយរបួសអាចនឹងអវត្តមានក្នុងការជួយក្រុមបឹងកេតអង្គរពេលប៉ះជាមួយក្រុម Lanexang United FC របស់ឡាវក្នុងវគ្គពាក់កណ្តាលផ្តាច់ព្រ័ត្រនៃពានរង្វាន់ Toyota Mekong Club Championship នៅពហុកីឡដ្ឋានជាតិនាវេលាម៉ោង៦:៣០នាទីល្ងាចថ្ងៃទី៣១ ខែធ្នូ។ ចំណែកអ្នកចាំទីដៃទី១ ស៊ូ យ៉ាទី ដែលរងរបួសដែរនោះនឹងចូលជួយបឹងកេតក្នុងជំនួបមួយនេះ។
លោក ប្រាក់ សុវណ្ណារ៉ា គ្រូបង្វឹកក្រុមបឹងកេតអង្គរ បានឲ្យដឹងថា ខ្សែប្រយុទ្ធ ចាន់ វឌ្ឍនាកា ដែលជាកីឡាករឆ្នើមរបស់បឹងកេតនេះ អាចនឹងអវត្តមានក្នុងជំនួបដ៏សំខាន់ជាមួយក្រុម Lanexang United FC របស់ឡាវ នាល្ងាចថ្ងៃទី៣១ ខែធ្នូ ។ បើតាមលោក ប្រាក់ សុវណ្ណារ៉ា មូលហេតុដែលលោកមិនទាន់អាចប្រាកដចិត្តដាក់ ចាន់ វឌ្ឍនាកា ចូលប្រកួតនោះដោយសារតែស្ថានភាពរបួសរបស់ខ្សែប្រយុទ្ធបឹងកេតរូបនេះ នៅមិនទាន់ធូរស្បើយនៅឡើយទេ។
ឆ្លើយប្រាប់សារព័ត៌មានថ្មីៗ គ្រូបង្វឹកក្រុមបឹងកេតអង្គររូបនេះ បានបញ្ជាក់ដូច្នេះថា៖«វឌ្ឍនាកា ប្រហែលជាមិនអាចចូលជួយក្រុមបឹងកេតនោះទេ ដោយសារគាត់នៅមានរបួស។ ប៉ុន្តែបើសិនជាគ្រាប់បាល់របស់បឹងកេតចាញ់ ឬស្មើ លោក ប្រហែលជាសម្រេចដាក់កីឡាករ ចាន់ វឌ្ឍនាកា នៅចុងម៉ោងតែម្តង»។
ងាកមកអ្នកចាំទីដៃទី១របស់ក្លិបបឹងកេតអង្គរកីឡាករ ស៊ូ យ៉ាទី ដែលកំពុងមានរបួសជាប់ខ្លួនវិញ ត្រូវបានលោក ប្រាក់ សុវណ្ណរ៉ា អះអាងថា៖ «ស៊ូ យ៉ាទី ទោះបីជាមានរបួសក៏ដោយ ប៉ុន្តែខ្ញុំនឹងដាក់គាត់ឲ្យចូលលេង បើលេងមិនកើតក៏បង្ខំឲ្យលេងដែរ»។
អ្នកចាំទី ស៊ូ យ៉ាទី ដែលគ្រូបង្វឹកក្រុបបឹងកេតអង្គរសម្រេចដាក់ឲ្យចូលរួមលេងក្នុងជំនួបដ៏សំខាន់នេះ បានបញ្ជាក់ថា៖«សម្រាប់ខ្ញុំការប្រកួតនៅថ្ងៃស្អែកគឺជាការប្រកួតមួយដ៏សំខាន់ទោះយើងធ្លាប់ជួបគ្នាពេលលេងជាក្រុមជម្រើសជាតិក៏ដោយ ប៉ុន្តែខ្ញុំនឹងមិនប្រហែសនោះទេ។ ខ្ញុំនឹងកីឡាករបឹងកេតទាំងអស់នឹងខិតខំប្រឹងប្រែងលេងឲ្យអស់ពីសមត្ថភាព មិនឲ្យទស្សនិកជនកម្ពុជាអស់សង្ឃឹមនោះទេ»។
ទោះបីជាកីឡាករមួយចំនួនរបស់បឹងកេតកំពុងញាំញីដោយរបួសយ៉ាងណាក៏ដោយ ប៉ុន្តែ លោក ប្រាក់ សុវណ្ណារ៉ា ហាក់ដូចជាមិនខ្វល់ខ្វាយពីបញ្ហានេះទេ ។ «យើងទុកបញ្ហាកីឡាករមួយឡែកសិន ដូចយើងបានដឹងហើយថាទាំងក្រុមបឹងកេត និង Lanexang គោលបំណងនៃការប្រកួតនៅថ្ងៃស្អែកគឺឈានទៅកាន់វគ្គផ្តាច់ព្រ័ត្រ ដូច្នេះការប្រកួតនេះនឹងក្លាយជាការប្រកួតមួយដ៏ជក់ចិត្តរបស់ទស្សនិកជន»។ នេះជាការបញ្ជាក់របស់គ្រូបង្វឹកបឹងកេត ដែលអះអាងថា កីឡាករខ្សែប្រយុទ្ធ Gbenga និង Muramatsu Tomoki ដែលទើបជាពីរបួសនោះ អាចចូលរួមជួយក្រុមវិញហើយ៕
Tag:
បាល់ទាត់
ចាន់ វឌ្ឍនាកា
ប្រាក់ សុវណ្ណរ៉ា
© រក្សាសិទ្ធិដោយ thmeythmey.com