អន្តរជាតិ
២០១៦៖ អាបេ ជាមេដឹកនាំជប៉ុនដំបូងដែលគោរពវិញ្ញាណក្ខន្ធអ្នកស្លាប់នៅ Pearl Harbor
× ក្រៅពីលោក បារ៉ាក់ អូបាម៉ា ដែលអញ្ជើញទៅគោរពវិញ្ញាណក្ខន្ធជនជាតិជប៉ុននៅហ៊ីរ៉ូស៊ីម៉ា ព្រឹត្តិការណ៍ប្រវត្តិសាស្ត្រមួយទៀតសម្រាប់ឆ្នាំ ២០១៦នេះគឺ លោក ស៊ីនហ្សូ អាបេបានអញ្ជើញទៅគោរពវិញ្ញាណក្ខន្ធជនរងគ្រោះនៅ Pearl Harbor។ លោកជាមេដឹកនាំជប៉ុនដំបូងបំផុតដែលធ្វើបែបនេះ ហើយលោកចង់ឲ្យពិភពលោកបញ្ចៀសឲ្យបាននូវសង្គ្រាមបង្ហូរឈាមគ្នា។
នាយករដ្ឋមន្ត្រីជប៉ុនលោក ស៊ីនហ្សូ អាបេ បានអញ្ជើញទៅទស្សនកិច្ចរដ្ឋហាវ៉ៃ សហរដ្ឋអាមេរិកនៅចុងខែធ្នូកន្លងទៅ ។ អ្វីដែលក្លាយជាព្រឹត្តិការណ៍ប្រវត្តិសាស្ត្រ នាយករដ្ឋមន្ត្រីជប៉ុនរូបនេះរួមជាមួយប្រធានាធិបតីអាមេរិកលោក បារ៉ាក់ អូបាម៉ា បានអញ្ជើញទៅគោរពវិញ្ញាណក្ខន្ធជនរងគ្រោះជាជនជាតិអាមេរិកដែលបានស្លាប់ក្នុងព្រឹត្តិការណ៍វាយប្រហារដោយកងទ័ពជប៉ុននាថ្ងៃ ៧ ខែធ្នូ ឆ្នាំ ១៩៤១ មុនសង្គ្រាមលោកលើកទី២ចាប់ផ្តើម។
ទស្សនកិច្ចរបស់លោកកើតឡើងក្នុងរយៈពេល ៧៥ ឆ្នាំ ក្រោយការវាយប្រហារដ៏គួរឲ្យភ្ងាក់ផ្អើលនេះ ហើយលោកក៏ក្លាយជាមេដឹកនាំជប៉ុនទី ១ ដែលទៅគោរពវិញ្ញាណក្ខន្ធអ្នកស្លាប់ទាំងនោះដែរ។ យោងតាមការប្រកាសរបស់សេតវិមានអាមេរិក លោក បារ៉ាក់ អូបាម៉ា និងជួបជាមួយលោក ស៊ីនហ្សូ អាបេ នៅថ្ងៃ ២៧ ខែធ្នូ ហើយអ្នកទាំងពីរក៏បានបន្តដំណើរទៅកន្លែងរម្លឹកវិញ្ញណក្ខន្ធអ្នកស្លាប់ USS Arizona។
គេដឹងច្បាស់ថា ការអញ្ជើញទៅគោរពវិញ្ញាណក្ខន្ធនៅ Pearl Harbor របស់លោក ស៊ីហ្សូ អាបេ ជាការឆ្លើយតបនឹងសកម្មភាពរបស់លោក បារ៉ាក់ អូបាម៉ា ដែលបានអញ្ជើញទៅគោរពវិញ្ញណក្ខន្ធប្រជាជនជប៉ុនដែលស្លាប់នៅទីក្រុងហ៊ីរ៉ូស៊ីម៉ាដោយសារការទម្លាក់គ្រាប់បែកបរមាណូរបស់ អាមេរិកដែរ។
ដោយសារលោក បារ៉ាក់ អូបាម៉ា មិនសុំអភ័យទោសចំពោះការទម្លាក់គ្រាប់បែកបរមាណូនៅទីក្រុងជប៉ុន លោក ស៊ីនហ្សូ អាបេ ក៏មិនសុំអភ័យទោសចំពោះការវាយប្រហាររបស់កងទ័ពជប៉ុននៅមូលដ្ឋានទ័ពអាមេរិកនេះឡើយ ថ្វីបើលោកទៅគោរពវិញ្ញណក្ខន្ធអ្នកស្លាប់ក្តី៕
Tag:
ស៊ីនហ្សូ អាបេ
Pearl Harbor
© រក្សាសិទ្ធិដោយ thmeythmey.com