កីឡាជាតិ
ជាតិ
អវត្តមានកីឡាករសំខាន់ និងភាពខ្វះចន្លោះនៅតំបន់ការពារ ធ្វើឲ្យបឹងកេតចាញ់ Lanexang លោក ប្រាក់ សុវណ្ណារ៉ា គ្រូបង្វឹកក្រុមបឹងកេតអង្គរ
× ភាពខ្វះចន្លោះនៅតំបន់ការពារ និងការអវត្តមានកីឡាករសំខាន់មួយចំនួនដោយសាររបួសបានធ្វើឲ្យក្រុមបឹងកេតអង្គររងបរាជ័យយ៉ាងដំណំ ៣-០ ក្រោមថ្វីជើងក្រុម Lanexang United FC របស់ឡាវក្នុងជំនួបវគ្គពាក់កណ្តាលផ្តាច់ព្រ័ត្រនៃពានរង្វាន់ Toyota Mekong Club Championship 2016។ ការបរាជ័យនេះបានធ្វើឲ្យក្រុមតំណាងឲ្យកម្ពុជាមួយនេះបាត់បង់ឱកាសក្នុងការប្រឡើងទៅកាន់វគ្គបន្ត។
ក្រោយបឹងកេតអង្គររងបរាជ័យ ៣-០ ពីក្រុមមកពីឡាវ Lanexang United FC ក្នុងវគ្គពាក់កណ្តាលផ្តាច់ព្រ័ត្រនៃពានរង្វាន់ Toyota Mekong Club Championship 2016។ លោក ប្រាក់ សុវណ្ណារ៉ា គ្រូបង្វឹកក្រុមបឹងកេតអង្គរបានប្រាប់មូលហេតុនៃការបរាជ័យនេះថា ដោយសារក្រុមលោកមានភាពកម្សោយនៅតំបន់ការពារបន្ទាប់ពីអវត្តមាន ខ្សែការពារដ៏សំខាន់គឺកីឡាករ សុខ សុវណ្ណ។
ម្យ៉ាងវិញទៀត ដោយសារការរបួសរងរបស់កីឡាករសំខាន់ៗដូចជាខ្សែប្រយុទ្ធ Gbenga, Muramatsu Tomoki និងអ្នកចាំទី ស៊ូ យ៉ាទី ចំពេលជិតដល់ការប្រកួត ជាហេតុធ្វើឲ្យពួកគេហ្វឹកហាត់មិនបានគ្រប់គ្រាន់ ជាពិសេសការអវត្តមានកីឡាករ ចាន់ វឌ្ឍនាកា នៅតំបន់ប្រយុទ្ធក៏ជាការរួមចំណែកផងដែរ។ ជាមួយគ្នានេះ គ្រូបង្វឹករូបនេះទទួលស្គាល់ថា ក្រុម Lanexang United FC ជាក្រុមដែលមានសមត្ថភាពខ្ពស់ជាងក្រុមរបស់ខ្លួន។
ក្នុងសន្និសីទសារព័ត៌មានក្រោយចប់ការប្រកួតកាលពីយប់ថ្ងៃទី៣១ ខែធ្នូ នៅពហុកីឡដ្ឋានជាតិ លោក ប្រាក់ សុវណ្ណារ៉ា បានបញ្ជាក់យ៉ាងដូច្នេះថា៖«ខ្ញុំទទួលស្គាល់ថា កម្រិតនៃការលេងរបស់យើងគឺក្រោមគេបន្តិច ហើយយើងមើលជារួមឃើញថាក្រុមឡាវលេងបានល្អមែនទែន។ ខ្ញុំមានអារម្មណ៍សោកស្តាយដោយសារការចូលរួមប្រកួតនៅប្រទេសវៀតណាមកីឡាករយើងដែលរងរបួសសុទ្ធតែជាកីឡាករល្អៗ ហើយទម្រាំតែគាត់ជាសះស្បើយវាកៀកទៅដល់ថ្ងៃលេងទៅហើយ យើងឃើញជាក់ស្តែងដូចជា ចាន់ វឌ្ឍនាកា គាត់លេងអត់កើត ស៊ូ យ៉ាទី គាត់មិនអាចហាត់បាន»។
លោកបានបន្តទៀតថា៖«ជាចុងក្រោយយើងបានជួយប្រទះរឿងអាក្រក់មួយទៀតដែលទាក់ទងទៅនឹងកីឡាករ សុខ សុវណ្ណ ដែលគាត់រងរបួសក្នុងការប្រកួតមិត្តភាពជាមួយក្រុមស្វាយរៀងដែលមិនអាចចូលរួមបាន ជាបន្តទៅទៀតខ្ញុំសង្ឃឹមថា អ្នកទាំងអស់គ្នាយល់ពីបញ្ហានេះ ហើយសូមជូនពរ Lanexang ទទួលបានជោគជ័យបន្តទៀត»។
ទោះបីក្រុមបឹងកេអង្គរមិនអាចរកគ្រាប់បាល់នៅក្នុងជំនួបមួយនេះក៏ដោយ ប៉ុន្តែលោក ប្រាក់ សុវណ្ណារ៉ា បញ្ជាក់ថា ទម្រង់នៃការលេងនៅតំបន់ប្រយុទ្ធអាចទទួលយកបាន តែអ្វីដែលគួរឲ្យសោកស្តាយនោះគឺក្រុមរបស់លោកមានការខ្វះចន្លោះច្រើនតំបន់ការពារ ពោលគឺអ្នកការពារម្នាក់មិនអាចបិទគូប្រជែងម្នាក់បាន។ ពាក់ព័ន្ធនឹងបញ្ហានេះ លោក សង្កត់ធ្ងន់ថា ដោយសារកត្តាសមត្ថភាពរបស់កីឡាករ។
គួររំលឹកថា ការប្រកួតវគ្គពាក់កណ្តាលផ្តាច់ព្រ័ត្រនៃពានរង្វាន់ Toyota Mekong Club Championship 2016 ដែលធ្វើឡើងនៅពហុកីឡដ្ឋានជាតិកាលពីយប់ថ្ងៃទី៣១ ខែធ្នូ ក្រុមបឹងកេតអង្គរបានចាញ់ក្រុម Lanexang United Fc ៣-០។ ការបរាជ័យនេះបានធ្វើឲ្យក្រុមបឹងកេតអង្គរបានបាត់បង់ឱកាសឡើងទៅកាន់វគ្គផ្តាច់ព្រ័ត្រនៃពានរង្វាន់នេះ៕
Tag:
បាល់ទាត់
ប្រាក់ សុវណ្ណារ៉ា
Toyota Mekong Clu
© រក្សាសិទ្ធិដោយ thmeythmey.com