កីឡាជាតិ
ជាតិ
គ្រូក្លិប Lanexang ថា ជ័យជម្នះលើបឹងកេតជាកាដូពិសេសសម្រាប់ប្រជាជនឡាវ លោក Leonardo Vitorino គ្រូបង្វឹក្រុម Lanexang United
× ក្រុមជើងឯកលីកកំពូល Lanexang United FC របស់ឡាវបានយកឈ្នះក្រុមបឹងកេតអង្គរក្នុងលទ្ធផល ៣-០ នាការប្រកួតវគ្គពាក់កណ្តាលផ្តាច់ព្រ័ត្រពានរង្វាន់ Toyota Mekong Club Championship 2016 កាលពីយប់ថ្ងៃទី៣១ ខែធ្នូ ឆ្នាំ២០១៦។ គ្រូបង្វឹកក្រុមឡាវបានចាត់ទុកជ័យជម្នះនេះជាកាដូពិសេសម្រាប់ប្រជាជនឡាវក្នុងថ្ងៃឆ្លងឆ្នាំ។
ជ័យជម្នះ ៣-០ របស់ក្រុម Lanexang United FC លើក្រុមបឹងកេតអង្គរនាការប្រកួតវគ្គពាក់កណ្តាលផ្តាច់ព្រ័ត្រពានរង្វាន់ Toyota Mekong Club Championship 2016 កាលពីយប់ថ្ងៃទី៣១ ខែធ្នូ ត្រូវបាន លោក Leonardo Vitorino គ្រូបង្វឹក្រុម Lanexang United ចាត់ទុកជាកាពិដូពិសេសសម្រាប់ប្រជាជនឡាវក្នុងថ្ងៃឆ្លងឆ្នាំ។ ការចាត់ទុកបែបនេះដោយសារលោកយល់ឃើញថា ថ្ងៃទី៣១ ខែធ្នូ ជាថ្ងៃដែលប្រជាពលរដ្ឋទូទាំងពិភពលោកប្រារព្ធពិធីបុណ្យឆ្លងឆ្នាំ។
ក្រោយទម្លាក់ក្រុមបឹងកេតអង្គរនៅវគ្គ ១/២ ក្រុមជើងលីកកំពូលឡាវឆ្នាំ២០១៦ Lanexang United FC នឹងឡើងទៅជួបក្រុម Buriram United របស់ថៃ ដែលក្រុមគ្រងជើងឯកពានរង្វាន់ Toyota Mekong Club ឆ្នាំ២០១៥ នៅវគ្គផ្តាច់ព្រ័ត្រនាខែមករា ឆ្នាំ២០១៧ នេះ។
ចំណែកក្រុមបឹងកេតអង្គរដែលដឹកនាំដោយ លោក ប្រាក់ សុវណ្ណារ៉ា ក្រោយចាញ់ក្រុម Lanexang United FC ធ្វើឲ្យក្រុមជើងឯករងពានរង្វាន់ Toyota Mekong Club Championship មួយនេះ ទទួលបានចំណាត់ថ្នាក់លេខ៣ ជាមួយប្រាក់រង្វាន់លើកទឹកចិត្តចំនួន៣ម៉ឺនដុល្លារ។
គួរបញ្ជាក់ថា ជ័យជម្នះ ៣-០ របស់ក្រុម Lanexang United FC សម្រេចដោយខ្សែប្រយុទ្ធជាប្រធានក្រុម Soukaphone Vongchiengkham មួយគ្រាប់នៅនាទី៤០ មុនកីឡាករ Phouthaxang Khochalern សម្រេចគ្រាប់ទី២នៅនាទី៤៥ បន្ទាប់មកកីឡាករ Keoviengpphet Lithideth សម្រេចគ្រាប់បាល់ចុងក្រោយនៅនាទី៨១។ ប្រធានក្រុមរបស់ Lanexang United FC បានក្លាយជាកីឡាករលេងល្អជាងគេក្នុងការប្រកួតវគ្គ ១/២ ផ្តាច់ព្រ័ត្រនេះ៕
Tag:
បាល់ទាត់
Lanexang United
© រក្សាសិទ្ធិដោយ thmeythmey.com