អន្តរជាតិ
រុស្ស៊ីបញ្ជូននាវាពីរគ្រឿងទៅហ្វីលីពីន ចំពេលទំនាក់ទំនងអាមេរិក-ហ្វីលីពីន រង្គោះរង្គើខ្លាំង នាវាចម្បាំងរុស្សីចតនៅកំពង់ផែក្នុងរដ្ឋធានីម៉ានីល (រូបភាព Xinhua)
× នាវាពីរគ្រឿងរបស់ទ័ពជើងទឹករុស្ស៊ី បានចូលចតនៅទឹកដីហ្វីលីពីនជាលើកដំបូង ចាប់តាំងពីប្រធានាធិបតី Rodrigo Duterte ចាប់ផ្ដើមដកខ្លួនឆ្ងាយពីសម្ព័ន្ធមិត្តអាមេរិក។ រុស្ស៊ីដែលជាសត្រូវចាស់របស់អាមេរិក ចង់ធ្វើសមយុទ្ធយោធាជាមួយទ័ពជើងទឹកហ្វីលីពីនលើការប្រយុទ្ធប្រឆាំងភេរវកម្ម និងចោរសមុទ្រ និងដើម្បីភ្ជាប់ទំនាក់ទំនងទ័ពជើងទឹកនៃមិត្តភក្តិថ្មីផងដែរ។
កប៉ាល់ចម្បាំងប្រឆាំងនាវាមុជទឹក Admiral Tributs និងកប៉ាល់ Boris Butoma នៃកងទ័ពជើងទឹករុស្ស៊ី បានទៅដល់ទឹកដីហ្វីលីពីននៅថ្ងៃទី៣ ខែធ្នូ ក្នុងគោលដៅទស្សនកិច្ច៤ថ្ងៃនៅទីនោះ។ បើតាមទីភ្នាក់ងារព័ត៌មាន Xinhua លោក Eduard Mikhailov ដែលជាអ្នកដឹកនាំកប៉ាល់ចម្បាំងទាំងពីរ និយាយថា រុស្ស៊ី ចង់ធ្វើសមយុទ្ធជាមួយហ្វីលីពីន ដើម្បីជួយពង្រឹងសមត្ថភាពក្នុងការប្រយុទ្ធប្រឆាំងភេរវកម្ម និងបង្ក្រាបចោរសមុទ្រ។
ថ្លែងទៅកាន់អ្នកកាសែតពេលទៅដល់ហ្វីលីពីន នាយទាហានជើងទឹករុស្ស៊ីរូបនេះបន្តថា រដ្ឋាភិបាលក្រុងមូស្គូ នឹងពិភាក្សាជាមួយក្រុងម៉ានីល ក្នុងពេលសមគួរណាមួយដើម្បីចាប់ផ្ដើមសមយុទ្ធរួមគ្នានេះ។ លោកបន្តទៀតថា បញ្ហាធំសម្រាប់ពិភពលោកនៅពេលនេះ គឺភេរវកម្ម និងចោរសមុទ្រ ហើយសមយុទ្ធកន្លងមក មានគោលដៅប្រយុទ្ធប្រឆាំងនឹងបញ្ហាទាំងនេះ។ ដូច្នេះ ទ័ពរុស្ស៊ី នឹងបង្ហាញសមត្ថភាពរបស់ខ្លួនក្នុងការដោះស្រាយបញ្ហានេះ ហើយក៏ពិនិត្យមើលសមត្ថភាពរបស់ទ័ពហ្វីលីពីនវិញដែរ។
ដោយឡែកខាងទ័ពជើងទឹកហ្វីលីពីនអះអាងថា នេះជាលើកទីមួយដែលកងទ័ពជើងទឹករុស្ស៊ី មានទំនាក់ទំនងផ្លូវការជាមួយទ័ពជើងទឹកហ្វីលីពីន។ នេះក៏ព្រោះតែកន្លងមក ហ្វីលីពីន មានទំនាក់ទំនងជិតស្និទ្ធ និងតែងធ្វើសមយុទ្ធតែជាមួយអាមេរិកប៉ុណ្ណោះ ជាពិសេសការប្រយុទ្ធប្រឆាំងភេរវកម្មតែម្ដង។ ទាក់ទងរឿងនេះ លោក Mikhailov បញ្ជាក់ដែរថា រុស្ស៊ីពេញចិត្តជួយហ្វីលីពីនលើរឿងនេះ ហើយក៏ដើម្បីពង្រឹងសន្តិសុខនៅក្នុងតំបន់ផងដែរ។
អស់ពេលជាយូរមកហើយ ហ្វីលីពីន បាននិងកំពុងប្រយុទ្ធប្រឆាំងក្រុមឧទ្ទាម Abu Sayyaf ដែលជាក្រុមមានទំនាក់ទំនងជាមួយក្រុមរដ្ឋឥស្លាម និងតែងតែធ្វើសកម្មភាពចាប់ជំរិតមនុស្សម្នាក្នុងដែនសមុទ្ររបស់ខ្លួន។ មុនការចូលកាន់តំណែងរបស់លោក Duterte ទ័ពអាមេរិក បានជួយយោធាហ្វីលីពីនក្នុងការបោសសម្អាតក្រុមជ្រុលនិយមនេះ តាមរយៈបណ្ដុះបណ្ដាលសមត្ថភាព និងការធ្វើសមយុទ្ធរួមគ្នាជាដើម។
យ៉ាងណាមិញ អ្វីបានប្រែប្រួលពេលលោក Duterte ចូលកាន់តំណែងកាលពីពាក់កណ្ដាលឆ្នាំ២០១៦ ។ ប្រធានាធិបតីរូបនេះ បានងាកចេញឆ្ងាយពីអាមេរិក ដែលជាសម្ព័ន្ធមិត្តចាស់វស្សា និងជាអតីតម្ចាស់អាណានិគមរបស់ខ្លួន ហើយងាកខិតជិតគូប្រជែងរបស់អាមេរិក គឺរុស្ស៊ី និងចិន។ លោកថែមទាំងបញ្ជាឲ្យព្យួរសមយុទ្ធរួមគ្នារវាងហ្វីលីពីន និងអាមេរិក ព្រមទាំងចង់បណ្ដេញចេញទ័ពអាមេរិកទៀតផង។ ដោយសារហេតុនេះ ទើបបានជាលោកផ្ដល់ភ្លើងខៀវឲ្យនាវារុស្ស៊ីចូលទឹកដីហ្វីលីពីន ហើយលោកទំនងជាចង់យករុស្ស៊ីជំនួសអាមេរិកទៀតផង៕
Tag:
រុស្ស៊ី
ហ្វីលីពីន
សមយុទ្ធ
ភេវកម្ម
© រក្សាសិទ្ធិដោយ thmeythmey.com