កាយសម្ព័ន្ធកម្ពុជានឹងរៀបចំព្រឹត្តិការណ៍ជើងឯកដាច់ដោយឡែកដ៏ធំមួយនៅឆ្នាំនេះ

កីឡាជាតិ

កាយសម្ព័ន្ធកម្ពុជានឹងរៀបចំព្រឹត្តិការណ៍ជើងឯកដាច់ដោយឡែកដ៏ធំមួយនៅឆ្នាំនេះ

05, Jan 2017 , 8:39 am

រូបភាព

ដោយ:

សហព័ន្ធកីឡាកាយសម្ព័ន្ធកម្ពុជាគ្រោងនឹងរៀបចំព្រឹត្តិការណ៍ប្រកួតជ្រើសរើសឯកដាច់ដោយឡែកដ៏ធំមួយនៅពាក់កណ្តាលឆ្នាំ២០១៧ខាងមុខនេះ។ ព្រឹត្តិការណ៍នេះត្រូវបានថ្នាក់ដឹកនាំសហព័ន្ធអះអាងថា នឹងរៀបចំឲ្យមានលំនាំដូចនឹងការប្រកួតស៊ីហ្គេម ជាមួយក្តីរំពឹងថា នឹងអាចចូលរួមចំណែកយ៉ាងសំខាន់ក្នុងការពង្រឹងសមត្ថភាពកីឡាករ គ្រូបង្វឹក និងមន្ត្រីបច្ចេកទេសកាន់តែរីកចម្រើន ដើម្បីត្រៀមការប្រកួតស៊ីហ្គេមឆ្នាំ២០២៣។

ដើម្បីចូលរួមចំណែកអភិវឌ្ឍន៍កីឡាកាយសម្ព័ន្ធកម្ពុជាឲ្យកាន់តែមានការរីកចម្រើន លោក សុខ ហុង អនុប្រធានសហព័ន្ធកីឡាកាយសម្ព័ន្ធកម្ពុជានឹងចំណាយថវិកាផ្ទាល់ខ្លួន បង្កើតព្រឹត្តិការណ៍ប្រកួតជ្រើសរើសជើងឯកដ៏ធំមួយដាច់ដោយឡែកពីក្រសួងអប់រំ។ ព្រឹត្តិការណ៍នេះនឹងគ្រោងធ្វើឡើងក្នុងខែ មិថុនា ឆ្នាំ២០១៧ ខាងមុខនេះ។

ព្រឹត្តិការណ៍នេះធ្វើឡើងក្នុងគោលបំណង ដើម្បីជួយពង្រឹង និងអភិវឌ្ឍន៍សមត្ថភាពបច្ចេកទេសរបស់កីឡាករ គ្រូបង្វឹក និងមន្ត្រីបច្ចេកទេសឲ្យកាន់តែរីកចម្រើន។ ជាពិសេសដើម្បីត្រៀមការប្រកួតស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ ព្រោះការប្រកួតនេះថ្នាក់ដឹកនាំសហព័ន្ធអះអាងថា នឹងធើ្វលំនាំដូចការប្រកួតស៊ីហ្គេម។ ដើម្បីឲ្យការប្រកួតកាន់តែមានលក្ខណស្វិតស្វាញថ្នាក់ដឹកនាំសហព័ន្ធនឹងបើកចំហសម្រាប់ការចូលរួមរបស់ក្លិបនីមួយៗ។

ជាមួយគ្នានេះ លោក សុខ ហុង អនុប្រធានសហព័ន្ធកីឡាកាយសម្ព័ន្ធកម្ពុជា និងជាស្ថាបនិកបានចាត់ទុកថា គ្រូបង្វឹកជាខ្សែបន្ទាត់មួយដ៏សំខាន់ក្នុងការដឹកនាំ ក៏ដូចតម្រង់ទិសកីឡាករឲ្យស្របទៅតាមនិយាមបច្ចេកទេសអន្តរជាតិ ប្រសិនបើគ្រូបង្វឹកមិនច្បាស់លាស់ការបង្វឹកក៏មិនអាចមានគុណភាពដែរ។ ដូច្នេះដើម្បីឲ្យកាន់តែរីកចម្រើនខាងផ្នែកបច្ចេកទេសត្រូវមានការជួយពីវិស័យឯកជន ក្រៅពីក្រសួងអប់រំ យុវជន និងកីឡា។

លោកឧកញ៉ារូបនេះបញ្ជាក់យ៉ាងដូច្នេះថា៖«ដើម្បីឲ្យកីឡាកាយសម្ព័ន្ធកម្ពុជាកាន់តែមានការរីកចម្រើន គឺត្រូវមានការចូលរួមចំណែកពីវិស័យឯកជន ដូច្នេះកីឡាករក៏ដូចគ្នា គឺត្រូវមានការប្រកួតជើងឯកប្រចាំវិស័យឯកណាមួយ ដើម្បីអមព្រឹត្តិការណ៍ដែលរៀបចំដោយក្រសួងអប់រំទើបមានការរីកចម្រើន»។

ដើម្បីជួយអភិវឌ្ឍន៍វិស័យកីឡាកាយសម្ព័ន្ធកម្ពុជាឲ្យកាន់តែរីកចម្រើនថែមទៀត ក្រៅពីបង្កើតព្រឹត្តិការណ៍ប្រកួតជើងឯកដ៏ធំមួយ អនុប្រធានសហព័ន្ធកីឡាកាយសម្ព័ន្ធកម្ពុជារូបនេះបានប្តេជ្ញាថា នឹងខិតខំប្រឹងប្រែងឲ្យអស់ពីសមត្ថភាពដើម្បីបង្កើតព្រឹត្តិការណ៍ប្រកួតឲ្យច្រើនជាងនេះ ដើម្បីធ្វើយ៉ាងណាដណ្តើមមេដាយពីព្រឹត្តិការណ៍ស៊ីហ្គេមឆ្នាំ២០២៣ ជូនជាតិកម្ពុជាឲ្យបាន។

វាជាលើកទីមួយហើយដែលសហព័ន្ធកីឡាកាយសម្ព័ន្ធកម្ពុជាគ្រោងរៀបចំព្រឹត្តិការណ៍ប្រកួតជើងឯកលក្ខណឯកជនបែបនេះ។ ហើយព្រឹត្តិការណ៍នេះនឹងក្លាយជាកត្តាមួយដ៏សំខាន់សម្រាប់ការផ្លាស់ប្តូរបច្ចេកទេសរបស់កីឡាករកីឡាការិនី និងគ្រូបង្វឹកកីឡាកាយសម្ព័ន្ធកម្ពុជាព្រមទាំងមន្ត្រីបច្ចេកទេស។

លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជាបានបញ្ជាក់យ៉ាងដូច្នេះថា៖«ជាពិតណាស់សហព័ន្ធយើងមិនដែលរៀបចំជើងឯក ឬជា Cup ពីក្រុមហ៊ុនឯកជននោះឡើយ នេះជាលើកទីមួយហើយដែលលោកឧកញ៉ា សុខ ហុង យល់ឃើញពីការជំរុញផ្នែកបច្ចេកទេស ដាច់ខាតត្រូវតែជួយធ្វើជើងឯកនេះឯង»។

លោកបានបន្តទៀតថា៖«ខ្ញុំគិតថា ព្រឹត្តិការណ៍នេះមានសារៈសំខាន់មែនទែនក្នុងការជំរុញផ្នែកបច្ចេកទេស ជាពិសេសឲ្យកីឡាករមានការផ្លាស់ប្តូរបច្ចេកទេសគ្នាទៅវិញទៅមកក្នុង១ឆ្នាំយ៉ាងតិច២ដង។ ហើយវាជួយឲ្យមើលឃើញពីលក្ខណខុសគ្នាពីក្លិបមួយទៅក្លិបមួយថាតើមានការរីកចម្រើនយ៉ាងម៉េច ជាពិសេសជួយជំរុញឲ្យគ្រូនៅតាមក្លិបនីមួយៗមានការប្រកួតប្រជែងគ្នាកាន់តែខ្លាំង»។

បើយោងតាម លោកអគ្គលេខាធិការសហព័ន្ធកីឡាកាយសម្ព័ន្ធកម្ពុជា ព្រឹត្តិការណ៍នេះមានអត្តពលិកចូលរួមប្រមាណជាជិត២០០នាក់មកពីក្លិបចំនួន៩ ហើយអត្តពលិកទាំងនេះត្រូវប្រកួតប្រជែងលើ១៣ប្រភេទវិញ្ញាសា។ លោក ណយ ផាណា បានបញ្ជាក់ថា ព្រឹត្តិការណ៍នេះគ្រោងនឹងចំណាយថវិកាប្រមាណជាជិត២ម៉ឺនដុល្លារដែលជាថវិកាផ្ទាល់របស់លោកឧកញ៉ា សុខ ហុង៕