កីឡាជាតិ
ជាតិ
ក្រសួងការពារជាតិមានការប្រកួតមិត្តភាពអន្តរជាតិដល់ទៅ៤ដងក្នុងខែមករានេះ
× ដើម្បីបង្កើនសមត្ថភាពនិងបច្ចេកទេសកីឡាករសម្រាប់ត្រៀមប្រកួតប្រជែងជើងឯកពានរង្វាន់លីកកំពូលកម្ពុជាឆ្នាំ២០១៧ ក្រុមជើងឯករងឆ្នាំ២០១៦ ក្រសួងការពារជាតិ(ទ័ព) ត្រូវជួបប្រកួតមិត្តភាពអន្តរជាតិ៤ដងក្នុង ខែមករា នេះ។ ជាក់ស្តែងនៅពហុកីឡដ្ឋានជាតិល្ងាចថ្ងៃទី៥ ខែមករា នេះ ទ័ពត្រូវជួបប្រកួតជាមួយក្រុម Melaka United ដែលជាក្រុមជើងឯកលីកលំដាប់ទី២របស់ម៉ាឡេស៊ី (2016 Malaysia Premier League)។
ក្រុមជើងឯករងពានរង្វាន់លីកកំពូលកម្ពុជាឆ្នាំ២០១៦ ក្រសួងការពារជាតិ (ទ័ព) នឹងធ្វើការប្រកួតមិត្តភាពអន្តរជាតិជាមួយក្រុមជើងខ្លាំងនៅតំបន់អាស៊ានចំនួន៤លើកនៅក្នុងខែមករានេះ។ ការប្រកួតដែលធ្វើឡើងជាបន្តបន្ទាប់នេះក្នុងគោលបំណងដកស្រង់បទពិសោធន៍ និងបច្ចេកទេស ដើម្បីពង្រឹងសមត្ថភាពកីឡាករឲ្យកាន់តែរីកចម្រើនសម្រាប់ត្រៀមប្រជែងដណ្តើមជើងឯកពានរង្វាន់លីកកំពូលកម្ពុជាឆ្នាំ២០១៧ ដែលចាប់ផ្តើមនៅខែកុម្ភៈខាងមុខ។
បើយោងតាម លោក ខូវ ឆាយ អ្នកចាត់ការទូទៅក្លិបក្រសួងការពារជាតិ ទ័ពត្រូវជួបប្រកួតជាមួយក្រុមលីកលំដាប់ទី២ Melaka United របស់ម៉ាឡេស៊ីនៅពហុកីឡដ្ឋានជាតិល្ងាចថ្ងៃទី៥ ខែមករា មុនស្វាគមន៍ក្រុមលីកកំពូលកំពូលម៉ាឡេស៊ីនៅថ្ងៃទី១១ ខែមករា នៅស្តាតចាស់។ បន្ទាប់មកក្រុមនេះនឹងធ្វើដំណើរទៅកាន់ទឺកដីថៃដើម្បីជួបជាមួយក្រុម Buriram United នៅថ្ងៃទី២២ ខែមករា និងជាមួយក្រុម Army United នៅថ្ងៃទី២៦ ខែមករា នៅទីក្រុងបាងកក។
«ទ័ពមានការប្រកួតមិត្តភាពអន្តរជាតិច្រើននៅឆ្នាំនេះ ព្រោះយើងចង់ឲ្យកីឡាករមានបទពិសោធន៍ជាលក្ខណអន្តរជាតិ ដើម្បីបង្កើនសមត្ថភាពនៃការលេងនៅលើទីលានរបស់គាត់។ យើងសង្ឃឹមថា នៅរដូវកាលឆ្នាំ២០១៧ យើងនឹងធ្វើបានល្អជាងរដូវមុន ហើយយើងនឹងខិតខំប្រឹងប្រែងឲ្យអស់ពីសមត្ថភាព ហើយសង្ឃឺមថា នឹងទទួលបានលទ្ធផលល្អជាងឆ្នាំមុន»។ លោក ខូវ ឆាយ ថ្លែងនៅក្នុងសន្និសីទសារព័ត៌មាននៅ Park Café កាលពីម្សិលមិញ។
ជាមួយគ្នានេះ លោក ទេព ឡុងរចនា គ្រូបង្វឹកក្រុមក្រសួងការពារជាតិរៀបរាប់ថា នេះជាឆ្នាំទី១ហើយដែលក្លិបក្រសួងការពារជាតិមានការប្រកួតលក្ខណមិត្តភាពអន្តរជាតិច្រើនដូច្នេះ។ តាមរយៈលោកសង្ឃឹមថា កីឡាករនឹងទទួលបានបទពិសោធន៍ និងបច្ចេកទេសថ្មីៗក្នុងការអភិវឌ្ឍន៍សមត្ថភាពរបស់ខ្លួនឲ្យកាន់តែរីកចម្រើន។ លោកជឿជាក់ថា ទៅថ្ងៃអនាគត់ក្រុមទ័ពនឹងក្លាយជាក្រុមមួយដែលមានកម្រិតស្មើនឹងក្រុមនៅប៉ែកអាស៊ី។
ដោយឡែក ងាកមកមើលការប្រកួតមិត្តភាពអន្តរជាតិជាក្រុម Melaka United របស់ម៉ាឡេស៊ីនៅពហុកីឡដ្ឋានជាតិនាវេលាម៉ោង៦:៤៥នាទីល្ងាចនេះវិញ។ អ្នកចាត់ការទូទៅរបស់ក្រុមទ័ព លោក ខូវ ឆាយ បានអះអាងថា ការប្រកួតនេះនឹងក្លាយជាជំនួនមួយដ៏ជក់ចិត្តបំផុត ព្រោះក្រុម Melaka United គឺជាក្រុមម្ចាស់ជើងឯកពានរង្វាន់លីកលំដាប់ទី២របស់ម៉ាឡេស៊ី ហើយក្រុមនេះក៏នឹងត្រូវប្រជែងក្នុងពានរង្វាន់លីកកំពូលម៉ាឡេស៊ីនៅឆ្នាំនេះផងដែរ។
ចំណែក លោក ទេព ឡុងរចនា គ្រូបង្គោលរបស់ក្រសួងការពារជាតិបានអះអាងមុនជំនួបនាល្ងាចនេះថា លោកនឹងដាក់កីឡាជើងខ្លាំងឲ្យចូលរួមលេងទាំងអស់ក្នុងជំនួបមួយនេះ ហើយលោកបានបញ្ជាក់ថា កីឡាកររបស់ទ័ពមិនមានអ្នកណាម្នាក់រងរបួសនោះឡើយ ហើយរំពឹងថា ជំនួបនេះនឹងក្លាយជាការប្រកួតមួយដ៏ល្អ និងជក់ចិត្ត។ គួរបញ្ជាក់ថា ការប្រកួតមិត្តភាពអន្តរជាតិនេះអាចចូលរួមទស្សនាដោយសេរីមិនមានការលក់សំបុត្រនោះទេ៕
Tag:
បាល់ទាត់
ទ័ព
ខូវ ឆាយ
ទេព ឡុងរចនា
Melaka
© រក្សាសិទ្ធិដោយ thmeythmey.com