កីឡាជាតិ
លោក ណយ ផាណា៖ ពានរង្វាន់ IOC President’s Trophy មានតម្លៃខ្ពស់ជាងគេក្នុងចលនាអូឡាំពិក
×
ក្រោយគណៈកម្មាធិការអូឡាំពិកអន្តរជាតិ(IOC)ប្រកាសប្រគល់ពានរង្វាន់ប្រធានគណៈកម្មាធិការអន្តរជាតិ«IOC President’s Trophy» ដល់សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីថ្ងៃទី៥ ខែមករា។ ថ្នាក់ដឹកនាំសហព័ន្ធកីឡាជាតិកម្ពុជា បានចាត់ទុកពានរង្វាន់នេះមានតម្លៃខ្ពស់ និងកម្រនឹងទទួលបាន។
លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជាបានចាត់ទុកពានរង្វាន់ IOC President’ Trophy របស់សម្តេចនាយករដ្ឋមន្ត្រី ហ៊ុន សែន ដែលទទួលបានពីគណៈកម្មាធិការអូឡាំពិកអន្តរជាតិ(IOC) ជាពានរង្វាន់មួយដ៏មានតម្លៃ និងកម្រទទួលបាន។ ពីព្រោះលោកថា វាជាពានរង្វាន់មួយដែលមានតម្លៃខ្ពស់ជាងគេ ក្នុងចលនាអូឡាំពិក ពោលគឺប្រទេសដែលទទួលបានពានរង្វាន់នេះ ជាប្រទេសដែលមានការរីកចម្រើនឆាប់រហ័យផ្នែកវិស័យកីឡានៅលើឆាកជាតិ និងអន្តរជាតិ។
លោក ណយ ផាណា នៅខាងឆ្វេង
អគ្គលេខាធិការសហព័ន្ធកីឡាកាយសម្ព័ន្ធរូបនេះ បានវាយតម្លៃខ្ពស់លើពានរង្វាន់ IOC President’s Trophy នេះថា ជាពានរង្វាន់ដ៏ឧត្តុង្គឧត្តម និងស័ក្តិសមបំផុតសម្រាប់សម្តេចនាយករដ្ឋមន្ត្រីកម្ពុជា។ «សហព័ន្ធកីឡាកាយសម្ព័ន្ធកម្ពុជា ពិតជាមានមោទនភាពចំពោះពានរង្វាន់ដ៏ឧត្តុង្គឧត្តមនេះ ព្រោះវាជាពានរង្វាន់មួយដ៏ស័ក្តិសមបំផុតសម្រាប់សម្តេចនាយករដ្ឋមន្ត្រី ហ៊ុន សែន ក្នុងការយកចិត្តទុកដាក់ខ្ពស់ ឧបត្ថម្ភគាំទ្រវិស័យកីឡាជាតិ និងចលនាអូឡាំពិក»។ នេះជាការបញ្ជាក់របស់លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធ។
គួរបញ្ជាក់ថា សម្តេចនាយករដ្ឋមន្ត្រី ហ៊ុន សែន ត្រូវបានគណៈកម្មាធិការអូឡាំពិកអន្តរជាតិប្រកាសប្រគល់ពានរង្វាន់ប្រធានគណៈកម្មាធិការអូឡាំពិកអន្តរជាតិ«IOC President’ Trophy» កាលពីថ្ងៃទី៥ ខែមករា កន្លងទៅ។ ប៉ុន្តែការប្រគល់នឹងទទួលពានរង្វាន់នឹងប្រព្រឹត្តទៅនៅថ្ងៃទី២៥ ខែមករា ឆ្នាំ២០១៧ នៅវិមានសន្តិភាព៕
Tag:
កាយសម្ព័ន្ធ
IOC
ណយ ផាណា
© រក្សាសិទ្ធិដោយ thmeythmey.com