កីឡាជាតិ
ក្លិបបឹងកេតអង្គរ អរគុណ លោក ប្រាក់ សុវណ្ណារ៉ា ក្រោយចែកផ្លូវគ្នា
×
លោក ប្រាក់ សុវណ្ណារ៉ា លែងជាគ្រូបង្វឹកក្រុមបឹងកេតអង្គរហើយ ចាប់ពីថ្ងៃនេះទៅ ។ នេះបើយោងតាមសេចក្តីជូនដំណឹងរបស់ក្លិបបឹងកេតអង្គរ នៅលើទំព័រហ្វេសប៊ុកផ្លូវការនៅថ្ងៃទី៧ ខែមករា នេះ។ ប៉ុន្តែមិនបានបញ្ជាក់ពីមូលហេតុនោះឡើយ ដោយគ្រាន់តែបញ្ជាក់ថា ការចែកផ្លូវនេះមានការឯកភាពគ្នាទាំងសងខាង។
ទំព័រហ្វេសប៊ុកផ្លូវការរបស់ក្លិបបឹងកេតអង្គរនៅថ្ងៃទី៧ ខែមករា នេះ បានបញ្ជាក់ថា លោក ប្រាក់ សុវណ្ណារ៉ា គ្រូបង្វឹកក្លិបបឹងកេតអង្គរ ឈប់ធ្វើជាគ្រូបង្វឹកនៅក្លិបបឹងកេតអង្គរហើយ ចាប់ពីថ្ងៃនេះតទៅ។ ទោះបីជាយ៉ាងនេះក្តីទំព័រហ្វេសប៊ុកនេះ មិនបានបញ្ជាក់ពីមូលហេតុនៃការចែកផ្លូវគ្នានេះឡើយ ដោយគ្រាន់តែ ល់ើកឡើងថា ចែកផ្លូវគ្នានេះ មានការព្រមព្រៀងគ្នាទាំងសងខាង។
ទោះបីក្លិបបឹងកេតអង្គរបញ្ជាក់ថា ការចាកចេញរបស់លោក ប្រាក់ សុវណ្ណារ៉ា មានការឯកភាពគ្នាទាំងសងខាងក៏ដោយ ប៉ុន្តែទំព័រហ្វេសប៊ុកនេះបានរៀបរាប់យ៉ាងដូច្នេះថា៖«ប៉ុន្តែក្លិបនិងលោកគ្រូ ទទួលស្គាល់នូវលទ្ធផលមិនសូវសមប្រកបក្នុងរយ:ពេលចុងក្រោយនេះ ហើយជឿជាក់ថា ការចែកផ្លូវគ្នានេះធ្វើឡើងដើម្បីផលចំណេញជាអតិបរមាចំពោះភាគីទាំងសងខាង»។
ទំព័រហ្វេសប៊ុកដដែល បានសង្កត់ធ្ងន់ថា ការចាកចេញពីក្លិបបឹងកេតអង្គររបស់លោក ប្រាក់ សុវណ្ណារ៉ា គឺមិនមានការល្អក់កករនឹងគ្នាននោះឡើយ។ ទោះបីជាក្លិបបឹងកេតបង្ហាញពីការបែកគ្នារវាងក្លិប និងលោក ប្រាក់ សុវណ្ណារ៉ា ប៉ុន្តែក្លិបនេះ ក៏បានលើកពីសម្បត្តិរបស់លោកផងដែរ។ «គ្រប់ៗគ្នានៅក្លិបបឹងកេតអង្គរសូមអរគុណដល់លោកគ្រូ ប្រាក់ សុវណ្ណារ៉ា ចំពោះការរួមចំណែកយ៉ាងសំខាន់ក្នុងជោគជ័យរបស់ក្លិបអំឡុងពេល២រដូវកាលចុងក្រោយនេះដោយយើងបានឈ្នះជើងឯកលីកកំពូលកម្ពុជាឆ្នាំ២០១៦ និងជើងឯករងក្នុងពានរង្វាន់ Toyota Mekong Club Championship 2015 ដែលធ្វើអោយលោកគ្រូក្លាយជាគ្រូជោគជ័យបំផុតម្នាក់ក្នុងប្រវត្តិសាស្ត្ររបស់ក្លិប»។ នេះជាការរៀបរាប់របស់ក្លិបបឹងកេតអង្គរ៕
Tag:
បាល់ទាត់
ប្រាក់ សុវណ្ណារ៉ា
បឹងកេតអង្គរ
ចែកផ្លូវ
© រក្សាសិទ្ធិដោយ thmeythmey.com