អ្នកជំនាញកំពុងព្យាបាលសង្គ្រោះ«ដើមស្ពង់»វ័យចំណាស់នៅខ្លោងទ្វារទន្លេអុំនៅសៀមរាប

ជាតិ

អ្នកជំនាញកំពុងព្យាបាលសង្គ្រោះ«ដើមស្ពង់»វ័យចំណាស់នៅខ្លោងទ្វារទន្លេអុំនៅសៀមរាប

15, Jan 2017 , 1:00 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ស្ពង់ចំណាស់មួយដើម ដែលមានទីតាំងនៅជាប់ខ្លោងទ្វារទន្លេអុំ ត្រូវបានចុះជួយសង្គ្រោះដោយក្រុមការងាររបស់អាជ្ញាធរជាតិអប្សរា។ ដើមស្ពង់ដែលចុះជួយសង្គ្រោះ និងព្យាបាលនេះ គឺគល់ និងចុងរបស់វាពុកផុយដោយសារអាយុកាល ក៏ដូចជាផលប៉ះពាល់ដោយកត្តាមនុស្ស។

ក្រៅពីប្រាសាទ ដើមស្ពង់គឺជាទីចាប់អារម្មណ៍របស់ភ្ញៀវទេសចរផងដែរ។ ស្ពង់ត្រូវបានគេដឹងថា មានដុះច្រើននៅក្នុងតំបន់អង្គរ ជាពិសេសនៅប្រាសាទតាព្រហ្ម។

លោក លឹម សៀងហួត បុគ្គលិកជំនាញតាមដានសុខភាព ផ្នែកព្យាបាលដើមឈើនៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរា បានឲ្យដឹងថា ស្ពង់ដែលចុះព្យាបាលនេះ គឺមានបញ្ហាចំនួន៣សំខាន់ៗ។ ទី១ ឫសរបស់ដើមអំពិល និងស្នាយ បានដុះជែងនឹងគល់ស្ពង់។ ទី២ ការដើរជាន់ឫសពីសំណាក់ភ្ញៀវទេសចរ ព្រោះវានៅជាប់នឹងផ្លូវដើរ ធ្វើឲ្យស្ពង់មានលទ្ធភាពតិចតួចក្នុងការស្រួបយកជីវជាតិក្នុងដី និងទី៣ អាយុកាល ការពុកផុយ និងមានសត្វកណ្តៀរឡើង។

តាមបទពិសោធន៍របស់លោក សៀងហួត ដែលបានចុះព្យាបាលដើមស្ពង់ជាច្រើនរយដើមនៅក្នុងឧទ្យានអង្គរបាននិយាយថា ស្ពង់ដែលអាចលូតលាស់ឡើងវិញក្រោយព្យាបាលហើយ គឺលទ្ធភាពខ្ពស់សម្រាប់តែស្ពង់ដែលមានសាច់ខ្ចីតែប៉ុណ្ណោះ ដោយឡែកសម្រាប់ស្ពង់ចាស់ វាពិបាកព្រោះថា កោសិការបស់វាមួយចំនួនធំបានងាប់ទៅហើយ។

លោក សៀងហួត បានរៀបរាប់ពីបច្ចេកទេសព្យាបាលដើមស្ពង់យ៉ាងដូច្នេះថា៖«ការព្យាបាលដើមស្ពង់តាមរយៈការកោសសំបកពុកផុយចេញ លាបជ័រទឹក ដើម្បីការពារពីការជ្រាបទឹកចូលក្នុងសាច់ និងចុងក្រោយមានការបិទដីដំបូកដើម្បីឲ្យសាច់ឈើដុះឡើងវិញ។ បន្ទាប់មក ក្រុមការងារនឹងបន្តតាមដានរយៈពេល៦ខែទៅមួយឆ្នាំ ដើម្បីដឹងពីការវិវត្តន៍ថ្មីរបស់ដើមស្ពង់»៕