អន្តរជាតិ
សមាជិកបក្សសាធារណរដ្ឋ ដាក់ស្នើច្បាប់ដកអាមេរិកចេញពីអង្គការសហប្រជាជាតិ
× សេចក្តីស្នើច្បាប់មួយស្នើឡើងដោយក្រុមសមាជិកសភាបក្សសាធារណរដ្ឋស្តីពីការដកសហរដ្ឋអាមេរិកចេញពីអង្គការសហប្រជាជាតិត្រូវបានដាក់ឆ្លងសភាហើយ។ សេចក្តីព្រាងច្បាប់នេះ បើសិនជាវាត្រូវអនុម័តនឹងបញ្ចប់សមាជិកភាពរបស់អាមេរិកក្នុងអង្គការសហប្រជាជាតិ និងផ្តាច់រាល់ទំនាក់ទំនងទាំងអស់ដែលមានដែលមានទាំងអម្បាលម៉ានជាមួយអង្គការអន្តររដ្ឋាភិបាលនេះ។
សមាជិកសភាបក្សសាធារណរដ្ឋនៅរដ្ឋ Alabama លោក Mike Rogers បានដាក់សេចក្តីស្នើច្បាប់មួយទៅសភាសំដៅដល់ការដកអាមេរិកចេញពីអង្គការសហប្រជាជាតិ។ សេចក្តីស្នើច្បាប់នេះមានឈ្មោះជាផ្លូវការថា «ច្បាប់ស្តីពីការស្តារអធិបតេយ្យអាមេរិកឡើងវិញឆ្នាំ២០១៧» ។
បើតាមសារព័ត៌មាន Business Insider សេចក្តីស្នើច្បាប់នេះទទួលបានការជួយរៀបចំឡើងដោយបណ្តាសមាជិកសភាបក្សសាធារណរដ្ឋមួយក្រុមមានដូចជា Walter Jones, Andy Biggs, Jason Smith, Thomas Massie , John Duncan Jr និង Matt Gaetz។
សមាជិកព្រឹសភាអាមេរិក Andy Biggs បានលើកឡើងថា លោកបានចូលរួមរៀបចំសេចក្តីស្នើច្បាប់នេះដោយសារតែលោកជឿជាក់ថា អធិបតេយ្យរបស់អាមេរិកកំពុងរងការគំរាមកំហែងខ្លាំងដោយសារបន្តនៅជាសមាជិកនៃអង្គការនេះ។
«យើងត្រូវត្រឡប់ទៅមើលសមាជិកភាពរបស់ប្រទេសយើងក្នុងអង្គការសហប្រជាជាដើម្បីធានាថា ប្រយោជន៍អាមេរិកត្រូវបានការពារ និងគិតគូរ។ ខ្ញុំអរគុណដល់លោក Mike Rogers ដែលបានស្នើច្បាប់នេះឡើងនៅពេលនេះ»។ នេះជាការបកស្រាយរបស់លោក Andy Biggs។
យោងតាមសេចក្តីព្រាងច្បាប់នេះ វាមានចែងពីការផ្តាច់ជំនួយអាមេរិកសម្រាប់ផ្គត់ផ្គង់ប្រតិបត្តិការថែរក្សាសន្តិភាព។ លុបចោលច្បាប់សេចក្តីពីការចូលរួមរបស់អាមេរិកក្នុងអង្គការសហប្រជាជាតិឆ្នាំ ១៩៤៥។ អាមេរិកក៏ទារត្រឡប់មកវិញរាល់ទ្រព្យសម្បត្តិរបស់ខ្លួន និងបញ្ឈប់កិច្ចព្រមព្រៀងដាក់ទីស្នាក់ការកណ្តាលអង្គការសហប្រជាជាតិនៅអាមេរិកផង។ ក្រៅពីនេះ សេចក្តីព្រាងច្បាប់ដដែលកំណត់ថា អាមេរិកនឹងនិរាករណ៍ច្បាប់ស្តីពីការចូលរួមក្នុកម្មវិធីបរិស្ថានឆ្នាំ ១៩៧៣, ដកអភ័យឯកសិទ្ធិការទូតរបស់មន្ត្រីអង្គការសហប្រជាជាតិ និងដកខ្លួនចេញពីអង្គការសុខភាពពិភពលោក។
ថ្វីបើការអនុម័តច្បាប់នេះវាស្ថិតនៅលើផ្លូវវែងឆ្ងាយក៏ដោយ ការប៉ុនប៉ងរបស់សមាជិកសភាអាមេរិកក្នុងការទាញសហរដ្ឋអាមេរិកចេញពីអង្គការសហប្រជាជាតិ ជាសញ្ញាអវិជ្ជមានមួយសម្រាប់អនាគតនៃអង្គការនេះ ក៏ដូចជាបង្ហាញពីនិន្នាការប្រឆាំងការចូលរួមក្នុងស្ថាប័នពហុភាគី របស់អាមេរិកក្រោមរដ្ឋបាលលោក ដូណាល់ ត្រាំ។
កន្លងមកលោក ដូណាល់ ត្រាំ បានចាត់ទុកអង្គការសហប្រជាជាតិជាកន្លែងប្រមូលផ្តុំគ្នារវាងមេដឹកនាំពិភពលោក ដោយពួកគេគ្រាន់តែនិយាយពិភាក្សាគ្នាប៉ុណ្ណោះ។ លោកធ្លាប់សន្យាថា ក្រោមអាណត្តិលោក ទំនាក់ទំនងរវាងអាមេរិកនិងអង្គការសហប្រជាជាតិនឹងប្រែប្រួលផង។
យ៉ាងណាក៏ដោយ វាអាចថា ការគំរាមចាកចេញពីអង្គការសហប្រជាជាតិនេះជាការសងសឹកឲ្យអ៊ីស្រាអែល ក្រោយពេលដែលក្រុមប្រឹក្សាសន្តិសុខអង្គការសហប្រជាជាតិអនុម័តដំណោះស្រាយប្រឆាំងសកម្មភាពសាងសង់លំនៅដ្ឋានប្រជាជនអ៊ីស្រាអែលលើទឹកដីប៉ាឡេស្ទីនចុងឆ្នាំមុន។ ក្រោយការបោះឆោ្នតអនុម័តដំណោះស្រាយ សមាជិកសភាបក្សសាធារណរដ្ឋដែលគាំទ្រអ៊ីស្រាអែលគំរាមផ្តាច់ជំនួយអង្គការសហប្រជាជាតិ ខណៈលោក ត្រាំ បានសន្យាកែទម្រង់អង្គការសហប្រជាជាតិថែមទៀតផង៕
Tag:
ដូណាល់ ត្រាំ
UN
Mike Rogers
© រក្សាសិទ្ធិដោយ thmeythmey.com