អន្តរជាតិ
ថៃទិញនាវាមុជទឹកពីចិនដើម្បីប្រជែងជាមួយប្រទេសជិតខាង
× កងទ័ពជើងទឹកថៃ បានចាប់ផ្ដើមពង្រឹងសមត្ថភាពរបស់ខ្លួនដោយបានទទួលលុយ១៣,៥ពាន់លានបាត ដែលស្មើនឹងជាង៣៨២លានដុល្លារ ដើម្បីទិញនាវាមុជទឹកមួយគ្រឿងដែលផលិតនៅចិន។ បើគម្រោងការនេះដំណើរការទៅមុខរលូន ទ័ពជើងទឹកថៃ នឹងមាននាវាមុជទឹកថ្មីលើកដំបូងចាប់តាំងពីឆ្នាំ១៩៥១ ។ នាវាមុជទឹកដែលគ្រោងទិញនេះ អាចនឹងចូលបម្រើការក្នុងជួរកងទ័ពជើងទឹកថៃនៅរយៈពេល៦ឆ្នាំខាងមុខនេះ។
អ្នកនាំពាក្យកងទ័ពជើងទឹកភូមិន្ទថៃ Jumpol Loompikanon បាននិយាយថា កងទ័ពជើងទឹកបានទទួលលុយគ្រប់គ្រាន់ហើយក្នុងការទិញនាវាមុជទឹកប្រភេទ Yuan Class S26T មួយគ្រឿងដែលផលិតដោយចិន។ ទឹកប្រាក់១៣,៥ពាន់លានបាតសម្រាប់ទិញនាវាមុជទឹកនេះ គឺជាផ្នែកមួយនៃថវិកាចំណាយប្រចាំឆ្នាំ២០១៧ ដែលត្រូវបានសភាអនុម័តរួចរាល់ហើយ។
យោងតាមកាសែតបាងកកប៉ុស្តិ៍ អ្នកនាំពាក្យខាងលើបន្តថា ដំណើរការទិញនាវាមុជទឹក Yuan Class S26T នឹងធ្វើឡើងក្នុងឆ្នាំ២០១៧ ។ នេះ គឺជានាវាមុជទឹកមួយក្នុងចំណោមនាវាមុជទឹកទាំងបីដែលកងទ័ពជើងទឹកថៃ ត្រៀមទិញពីចិនក្នុងតម្លៃសរុប ៣៦ពាន់លានបាត។ នាវាមុជទឹក S26T អាចផ្ទុកបានទម្ងន់២៦០០តោន បំពាក់ដោយប្រព័ន្ធរុញច្រានខ្យល់ ដែលអនុញ្ញាតឲ្យនាវាមុជទឹកនេះ អាចស្ថិតក្នុងទឹកបានដល់ទៅ៣សប្ដាហ៍។
ប្រភពព័ត៌មានដដែលបន្តថា នាវាមុជទឹក Yuan Class S26T នឹងមានតម្លៃថ្លៃជាងនាវាមុជទឹកពីរផ្សេងទៀត ដ្បិតតម្លៃនៃការទិញនាវាមុជទឹកនេះ នឹងរួមបញ្ចូលទាំងការតម្លៃនៃការបំពាក់អាវុធក្នុងនាវា, ការចំណាយលើការហ្វឹកហាត់ទាហានបម្រើការ និងការចំណាយលើការថែទាំផ្សេងទៀត។ ហើយការទិញនាវាមុជទឹកនេះ ធ្វើឡើងក្រោមរូបភាពកិច្ចព្រមព្រៀងរវាងរដ្ឋាភិបាលថៃ និងចិន ក្រោយគណៈរដ្ឋមន្ត្រីថៃអនុម័តកិច្ចសន្យារួចរាល់។
តាមពិតទៅ ទ័ពជើងទឹកថៃ ក៏ធ្លាប់មាននាវាមុជទឹកខ្នាតតូចចំនួន៤គ្រឿងដែរ។ នាវាមុជទឹកដែលផលិតនៅជប៉ុនទាំងនេះ ត្រូវឈប់ដំណើរការក្នុងឆ្នាំ១៩៥១ ។ ចំណែកនាវាមុជទឹកទាំងបី ដែលគ្រោងទិញពីចិន នឹងចូលមកបម្រើការក្នុងជួរកងទ័ពជើងទឹកវិញម្ដង។ យ៉ាងណាមិញ គម្រោងទិញនាវាមុជទឹកថ្មីទាំងបីគ្រឿង ក៏រងការរិះគន់មិនតិចដែរ។
ក្រុមអ្នករិះគន់ខ្លះនិយាយថា ការចំណាយលុយសន្ធឹកសន្ធាប់នេះ គឺជារឿងខ្ជះខ្ជាយ ហើយខ្លះទៀតសង្ស័យថា នាវាមុជទឹកនេះ អាចធ្វើដំណើរក្នុងជម្រៅទឹកនៃឈូងសមុទ្រថៃបានឬយ៉ាងណាដែរ។ ប៉ុន្តែទ័ពជើងថៃក៏បញ្ជាក់វិញថា ការទិញនាវាមុជទឹកនេះ ជារឿងចាំបាច់ដើម្បីការពារប្រទេស និងដើម្បីប្រជែងជាមួយប្រទេសជិតខាង ដែលសមត្ថភាពទ័ពជើងទឹកកំពុងកើនឡើងខ្លាំងក្នុងរយៈពេលចុងក្រោយនេះ។
មកទល់ពេលនេះ សមាជិកអាស៊ានជាច្រើន បានខិតខំពង្រឹងសមត្ថភាពជើងទឹករបស់ខ្លួន។ ក្នុងនោះម៉ាឡេស៊ី មាននាវាមុជទឹក២គ្រឿង, សិង្ហបុរីមាន៤គ្រឿង និងគ្រោងទិញ២គ្រឿងបន្ថែមទៀត។ ក្រៅពីនេះ វៀតណាមមាន៦គ្រឿង ខណៈដែលឥណ្ឌូណេស៊ី កំពុងរកទិញនាវាមុជទឹកផលិតនៅអាល្លឺម៉ង់២គ្រឿង និងទិញពីថ្មី៣គ្រឿងទៀតពីកូរ៉េខាងត្បូង៕
Tag:
ថៃ
ចិន
នាវាមុជទឹក
© រក្សាសិទ្ធិដោយ thmeythmey.com