អន្តរជាតិ
កិច្ចចរចាក្រុង Astana៖ ក្រុមឧទ្ទាមបដិសេធសេចក្តីព្រាងរដ្ឋធម្មនុញ្ញស៊ីរីដែលរុស្ស៊ីរៀបចំ
× ក្រោយការជជែកពិភាក្សាដោយប្រយោលនៅទីក្រុង Astana ប្រទេសកាហ្សាក់ស្ថាន អស់ពីរថ្ងៃ តំណាងរដ្ឋាភិបាលស៊ីរី និងក្រុមឧទ្ទាមក៏នៅមិនទាន់អាចរកដំណោះស្រាយនយោបាយបានជាដុំកំភួនដើម្បីបញ្ចប់សង្គ្រាមស៊ីរីដែរ។ ប៉ុន្តែភាគីសន្យាជួបគ្នាម្តងទៀតនៅហ្សឺណែវនៅខែក្រោយ ដើម្បីចរចាគ្នាទៀត ដោយវាស្ថិតក្រោមការដឹកនាំរបស់អង្គការសហប្រជាជាតិ។
យ៉ាងណាមិញ រុស្ស៊ីដែលជាសហស្ថាបនិកនៃវេទិកាចរចា Astana បានដាក់សេចក្តីព្រាងរដ្ឋធម្មនុញ្ញស៊ីរីថ្មីលើតុដោយបង្ខំឲ្យក្រុមឧទ្ទាមទទួលយក តែក្រុមនេះបដិសេធ។ រុស្ស៊ីហាក់ដូចជាអន្ទះសារចង់ឲ្យសង្គ្រាមនេះឆាប់ចប់ជាងប្រជាជនស៊ីរីទៀត។
វេទិកាចរចាសន្តិភាពស៊ីរីក្រុង Astana ប្រទេសកាហ្សាក់ស្ថាន បានបញ្ចប់ទៅវិញនៅថ្ងៃអង្គារទី ២៤ មករាដោយមិនមានលទ្ធផលជាដុំកំភួនឡើយ។ ប៉ុន្តែភាគីជម្លោះនឹងជួបជជែកពិភាក្សាគ្នាបន្ថែមទៀតនៅទីក្រុងហ្សឺណែវ ក្រោមការរៀបចំនិងគាំទ្រពីសំណាក់អង្គការសហប្រជាជាតិវិញម្តង។ ប៉ុន្តែផ្លូវឆ្ពោះទៅរកសន្តិភាព ហាក់បីដូចជាឆ្ងាយ និងរលាក់ខ្លាំងបន្តិច ព្រោះការបន្តលូកដៃកាន់តែជ្រៅរបស់ប្រទេសធំៗក្នុងតំបន់។
កិច្ចពិភាក្សាដោយប្រយោលដែលផ្តួចផ្តើមដោយប្រទេសបី រុស្ស៊ី,តួកគី និង អ៊ីរ៉ង់នេះ មិនមានលទ្ធភាពជំរុញឲ្យគូភាគីសម្រេចបានដំណោះស្រាយនយោបាយឡើយ តែវាមានគោលដៅសំខាន់ជំរុញឲ្យមានការអនុវត្តបទឈប់បាញ់ឲ្យបានពេញលេញប៉ុណ្ណោះ។ ពាក់ព័ន្ធការចរចានេះ សារព័ត៌មាន Al Jazeera បានចុះផ្សាយថា ក្រុមឧទ្ទាមស៊ីរីមិនពេញចិត្តតួនាទីអ៊ីរ៉ង់ក្នុងការស្វែងរកសន្តិភាពនៅស៊ីរីឡើយ។
យោងតាមសេចក្តីថ្លែងការណ៍រួមដែលត្រូវបានដាក់ចេញក្រោយកិច្ចពិភាក្សា ការចរចាបន្ទាប់នឹងត្រូវរៀបចំឡើងនៅថ្ងៃ ៨កុម្ភៈនៅទីក្រុងហ្សឺណែវ ប៉ុន្តែរបៀបវារៈនៃកិច្ចប្រជុំនិងប្រធានបទនៃកិច្ចប្រជុំលម្អិតបែបនេះនោះមិនត្រូវបានគេដឹងឡើយ។
ទីប្រឹក្សាច្បាប់សម្រាប់ក្រុមប្រឆាំង Free Syrian Army លោក Osama Abu Zaid បានបញ្ជាក់ថា សេចក្តីថ្លែងការណ៍រួមដែលត្រូវបានដាក់ចេញគ្មានពាក់ព័ន្ធក្រុមប្រឆាំងឡើយ។ វាជាការបង្កើតឡើងដោយរុស្ស៊ី,អ៊ីរ៉ង់ និងតួកគីប៉ុណ្ណោះ។ ប៉ុន្តែអ្នកច្បាប់រូបនេះព្រលយថា ការឈានទៅចូលរួមក្នុងតុចរចានៅហ្សឺណែវ វាអាស្រ័យលើការទាមទាររបស់ខ្លួនត្រូវគេទទួលយកឬអត់។ ក្រុមប្រឆាំងដ៏ធំមួយនេះ ទាមទារឲ្យមាននីតិវិធីជាក់លាក់មួយសម្រាប់ឃ្លាំមើលនិងអនុវត្តបទឈប់បាញ់នៅស៊ីរី។ អ្វីដែលក្រុមឧទ្ទាមចង់បានបំផុតគឺហាមរាល់ក្រុមប្រដាប់អាវុធដែលគាំទ្រដោយអ៊ីរ៉ង់ចូលរួមក្នុងប្រតិបត្តិការរបស់រដ្ឋាភិបាលស៊ីរី និងការអនុវត្តបទឈប់បាញ់បានត្រឹមត្រូវរបស់ក្រុងតេអ៊ីរ៉ង់ដែរ។
-រុស្ស៊ីកំណត់ជោគវាសនាស៊ីរី?
យោងតាមទីភ្នាក់ងារព័ត៌មាន AFP នៅក្នុងតុចរចា តំណាងរដ្ឋាភិបាលរុស្ស៊ី បានយកសេចក្តីព្រាងរដ្ឋធម្មនុញ្ញមួយដាក់លើតុ និងស្នើឲ្យក្រុមឧទ្ទាមយកទៅពិភាក្សានិងសិក្សាបន្ថែម។ វាប្រៀបដូចជា រុស្ស៊ីហាក់មានសិទ្ធិសម្រេចលើជោគវាសនាស៊ីរីច្រើនជាងប្រជាជនស៊ីរីខ្លួនឯង។
បេសកជនរុស្ស៊ីសម្រាប់ដោះស្រាយបញ្ហាស៊ីរី លោក Alexander Lavrentiev បានបញ្ជាក់ថា៖ «យើងបានផ្តល់សេចក្តីព្រាងរដ្ឋធម្មនុញ្ញដែលរៀបចំឡើងដោយអ្នកជំនាញរុស្ស៊ីទៅឲ្យក្រុមប្រឆាំងរួចហើយ។ យើងធ្វើបែបនេះដើម្បីពន្លឿនដំណើរការរកដំណោះស្រាយជម្លោះស៊ីរី»។
ទោះជារុស្ស៊ីរៀបចំសេចក្តីព្រាងរដ្ឋធម្មនុញ្ញស៊ីរីក៏ដោយ ក្រុមប្រឆាំងមិនបានយកចិត្តទុកដាក់ និងបានបដិសេធជជែកពិភាក្សាលើសេចក្តីព្រាងរដ្ឋធម្មនុញ្ញនេះ។ទីភ្នាក់ងារព័ត៌មាន AFP ផ្សាយថា តំណាងក្រុមប្រឆាំងដែលបានចូលរួមក្នុងការជជែកពិភាក្សានោះបដិសេធជជែកពិភាក្សាលើសេចក្តីព្រាងរដ្ឋធម្មនុញ្ញនេះជាមួយក្រុងមូស្គូ។ ពួកគេមើលឃើញថា រដ្ឋធម្មនុញ្ញរៀបចំឡើងដោយមហាអំណាចខាងក្រៅសម្រាប់ស៊ីរីជារឿងមិនអាចទទួលយកបានឡើយ៕
Tag:
Astana
ស៊ីរី
ហ្សឺណែវ
© រក្សាសិទ្ធិដោយ thmeythmey.com