កីឡាជាតិ
ជាតិ
រូបមន្តពានលីកកំពូល៖ លេខ១ចាំវគ្គផ្តាច់ព្រ័ត្រ លេខ៣ និង៤ ប្រជែងគ្នាដើម្បីជួបលេខ២នៅវគ្គ១/២
× ការប្រកួតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៧ (Cambodian League 2017) នឹងបើករដូវកាលថ្មីនាខែកុម្ភៈ នេះ។ រដូវកាលថ្មីនេះ មាន១២ក្រុមចូលរួមដោយធ្វើឡើងនៅលើទីលានចំនួន៧ផ្សេងៗគ្នា។ ហើយរូបមន្តនៃការប្រកួតមានលក្ខណៈខុសប្លែកពីរដូវកាលមុន។
នៅថ្ងៃទី១៨ ខែកម្ភៈ ឆ្នាំ២០១៧ ខាងមុខនេះ ការប្រកួតបាល់ទាត់ដណ្តើមពានរង្វាន់ក្របខ័ណ្ឌលីកកំពូលកម្ពុជាប្រចាំឆ្នាំ២០១៧(Cambodian League 2017) នឹងបើករដូវកាលថ្មីរបស់ខ្លួន។ ដោយឆ្នាំនេះមានក្រុមចូលរួមទាំងអស់ចំនួន១២ ពោលគឺមានការកើនឡើងចំនួនពីរក្រុមបើប្រៀបធៀបទៅនឹងរដូវកាលមុនដែលមានតែ១០ក្រុម។
សម្រាប់ការបើករដូវកាលថ្មី២០១៧ ពានរង្វាន់លីកកម្ពុជាក៏មានការផ្លាស់ប្តូររូបមន្តប្រកួតខុសប្លែកពីរដូវកាលមុនផងដែរ ខណៈរូបមន្តថ្មីនេះមិនមានវគ្គ Play off នោះទេ។ ប៉ុន្តែវាបានផ្តល់តម្លៃខ្ពស់សម្រាប់ក្រុមលេខ១ និងលេខ២ក្នុងវគ្គជម្រុះទាំងពីរជើង។
ក្រុមដែលឈរលេខ១ក្នុងវគ្គសន្សំពិន្ទុទាំងពីរជើងត្រូវឈរចាំនៅវគ្គផ្តាច់ព្រ័ត្រ រីឯក្រុមលេខ២ឈរចាំនៅវគ្គពាក់កណ្តាលផ្តាច់ព្រ័ត្រ ខណៈក្រុមលេខ៣ និងលេខ៤ត្រូវប្រជែងគ្នា ដើម្បីស្វែងរកក្រុមឈ្នះឡើងទៅកាន់វគ្គពាក់កណ្តាលផ្តាច់ព្រ័ត្រ។
សម្រាប់រដូវកាលថ្មីនេះ ក្រុមទាំង១២ត្រូវប្រកួតប្រជែងគ្នានៅលើ៧ទីលានផ្សេងៗគ្នា រួមមានពហុកីឡដ្ឋានជាតិ, កីឡដ្ឋានខេត្តស្វាយរៀង, កីឡដ្ឋានខេត្តសៀមរាប, កីឡដ្ឋានវេស្ទើន, កីឡដ្ឋាន RSN, កីឡដ្ឋានកងយោធពលខេមរភូមិន្ទ និងកីឡដ្ឋានគីរីវង្សសុខសែនជ័យ។
ជាមួយគ្នានេះ ការប្រកួតបើកឆាករដូវកាលថ្មីនៅថ្ងៃទី១៨ ខែកុម្ភៈ មានការប្រកួតចំនួន៣គូ ក្នុងនោះក្រុមម្ចាស់ជើងឯកឆ្នាំចាស់បឹងកេតអង្គរ ជួបប្រកួតជាមួយក្រុមម្ចាស់ជើងឯករងក្រសួងការពារជាតិនៅពហុកីឡដ្ឋានជាតិ។ រីឯក្រុមណាហ្គាវើលជួបជាមួយក្រុមអគ្គិសនីកម្ពុជានៅកីឡដ្ឋានខេត្តស្វាយរៀង និងក្រុមខេមបូឌានថាយហ្គឹរតទល់ជាមួយក្រុមស៊ីម៉ាក់នៅកីឡដ្ឋានខេត្តសៀមរាប។
គួរបញ្ជាក់ថា ក្រុមទាំង១២ដែលត្រូវប្រជែងគ្នារួមមាន បឹងកេងអង្គរ, ក្រសួងការពារជាតិ, ព្រះខ័នរាជស្វាយរៀង, ណាហ្គាវើល, ខេមបូឌានថាយហ្គឺរ, ប៉ូលិស, ស៊ីម៉ាក់, ភ្នំពេញក្រោន, វេស្ទើនភ្នំពេញ, អាស៊ីអឺរ៉ុបយូណាយធីត, អគ្គិសនីកម្ពុជា និងក្រុមគីរីវង់សុខសែនជ័យ៕
© រក្សាសិទ្ធិដោយ thmeythmey.com