លោក ប្រាយុទ្ធ ចន្ទអូចា បោសសម្អាតការទិញតំណែងក្នុងជួរប៉ូលិស

អន្តរជាតិ

លោក ប្រាយុទ្ធ ចន្ទអូចា បោសសម្អាតការទិញតំណែងក្នុងជួរប៉ូលិស

01, Feb 2017 , 8:39 pm

រូបភាព

ដោយ: តន ចាន់រិទ្ធារ៉ា

នាយករដ្ឋមន្ត្រីថៃ លោក ប្រាយុទ្ធ ចន្ទអូចា នឹងប្រើអំណាចពិសេសដែលផ្ដល់ដោយមាត្រា៤៤ នៃរដ្ឋធម្មនុញ្ញបណ្ដោះអាសន្ន ដើម្បីបោសសម្អាតការប្រើលុយដើម្បីទិញតំណែងក្នុងស្ថាប័នប៉ូលិស ពេលមានការរុះរើតំណែងម្ដងៗ។ លោក ប្រាយុទ្ធ សារភាពថា មានករណីទិញតំណែងច្រើនក្នុងជួរមន្ត្រីប៉ូលិស ហើយរដ្ឋាភិបាលលោក នឹងកម្ចាត់អំពើពុករលួយនេះ តាមរយៈការរៀបចំឡើងវិញដំណើរការដោះដូរតំណែងរបស់អង្គភាពប៉ូលិស។

មេដឹកនាំរបបសឹកថៃ ឧត្តមសេនីយ៍ ប្រាយុទ្ធ ចន្ទអូចា បានងាកមកផ្ដោតការប្រយុទ្ធប្រឆាំងអំពើពុករលួយក្នុងស្ថាប័នប៉ូលិស ដែលមានករណីទិញលក់តំណែងយ៉ាងច្រើនក្នុងស្ថាប័ននេះ។ លោក ប្រាយុទ្ធ និយាយថា ការតែងតាំង ឬដោះដូរតំណែងសព្វថ្ងៃនេះ ដែលស្ថិតក្រោមការសម្រេចដោយគណៈកម្មការប៉ូលិសមានឧបនាយករដ្ឋមន្ត្រី Prawit Wongsuwon ជាប្រធាន មិនដំណើរការឡើយ។ ដូចនេះ រដ្ឋាភិបាល ត្រូវតែកែប្រែដំណើរការនេះ។

បើតាមកាសែតបាងកកប៉ុស្តិ៍ លោក ប្រាយុទ្ធ បានលើកឡើងគោលការណ៍ក្នុងការតែងតាំងមន្ត្រីប៉ូលិស ដោយលោកនិយាយថា មន្ត្រីផ្ដល់ប្រឹក្សានៅគ្រប់កម្រិតទាំងអស់ នឹងផ្ដល់មតិលើការតែងតាំងណាមួយ មុនមេប៉ូលិសជាតិសម្រេចចិត្តចុងក្រោយ។ ប៉ុន្តែលោកបញ្ជាក់ដែរថា ដំណើរការបែបនេះ បានផ្លាស់ប្ដូរ ដោយពេលនេះឧបនាយករដ្ឋមន្ត្រី Prawit Wongsuwon ដែលជាប្រធានគណៈកម្មការប៉ូលិស ជាអ្នកសម្រេចចិត្តចុងក្រោយទៅវិញ។

ថ្លែងបន្ទាប់ពីកិច្ចប្រជុំរួមគ្នារវាងគណៈរដ្ឋមន្ត្រី និងក្រុមប្រឹក្សាជាតិដើម្បីសន្តិភាព និងសណ្ដាប់ធ្នាប់ នាយករដ្ឋមន្ត្រី ប្រាយុទ្ធ និយាយថា លោក Prawit ដែលជារដ្ឋមន្ត្រីការពារជាតិដែរនោះ ត្រូវពិចារណាលើការតែងតាំងច្រើនជាង៣០០ ហើយនេះគឺជារឿងធុញទ្រាន់ណាស់។ លោកបន្តថា គួរតែមានដំណើរការ ពិនិត្យលើបេក្ខភាពនីមួយៗនៅគ្រប់ថ្នាក់ទាំងអស់សិន មុនបញ្ជូនមកថ្នាក់លើសម្រេច។

មេដឹកនាំរដ្ឋប្រហារឆ្នាំ២០១៤ រូបនេះ ចង់ស្ដារទំនុកចិត្តលើស្ថាប័នប៉ូលិសឡើងវិញ ដោយលោកនឹងរៀបចំដំណើរការតែងតាំង និងផ្ទេរតំណែងមន្ត្រីប៉ូលិស ដែលកន្លងមក រងការចោទប្រកាន់ពីសាធារណជនលើការកង្វះតម្លាភាព និងភាពមិនប្រក្រតីទាក់ទងការទិញតំណែងជាដើម។ ពាក់ព័ន្ធបញ្ហានេះ អ្នកនាំពាក្យរដ្ឋាភិបាលនិយាយថា លោក ប្រាយុទ្ធ បានណែនាំឧបនាយករដ្ឋមន្ត្រី Wissanu Krea-ngam ឲ្យព្រាងបទបញ្ជាមួយក្រោមមាត្រា៤៤ ដើម្បីកែប្រែដំណើរការតែងតាំងនេះ។

នៅក្រោមបញ្ជាថ្មី មន្ត្រីផ្ដល់ប្រឹក្សានៅគ្រប់កម្រិត នឹងត្រូវបានអនុញ្ញាតឲ្យតែងតាំង និងផ្ទេរតំណែងមន្ត្រីនៅក្រោមចំណុះអង្គភាពខ្លួន។ ស្នងការប៉ូលិសជាតិ នឹងសម្រេចជាចុងក្រោយ ហើយដំណើរការនេះ ក៏នឹងធ្វើដូចគ្នានៅស្ថាប័នកងទ័ពដែរ។ អ្នកនាំពាក្យដដែលបញ្ជាក់ដែរថា របៀបថ្មីនេះ នឹងមិនអាចដោះស្រាយបញ្ហាបានទាំងស្រុងឡើយ ដ្បិតពុករលួយកើតចេញពីមនុស្សផ្ទាល់ តែវាអាចកាត់បន្ថយការជ្រៀតជ្រែករបស់គណៈកម្មការប៉ូលិស៕